१ कोरन्थी 5 - मध्य पुरविया थारूबेबिचारके बारेमे चेताबनी 1 बास्तममे तोरासबके बिचमे बेबिचार छौ से बात सुनैचियौ, एहेन बेबिचार त गैर-यहुदीयोसब नै करैछै। कथिलेत तोरासबमेसे एक गोरे आपने सतमहताइरके राखनेचिही। 2 तैयो तुसब घमन्ड करैचिही! तोरासबके त बरु सोक करे परतियौ आ एहेन काम करैबलाके तोरासबके बिचसे निकालैले परतियौ। 3 हम तोरासबके बिचमे नै चियौ, तैयो आत्मामे हम तोरेसबसङे चियौ। हम तोरासबसङे भेल जखा एहेन काम करैबलाके नियाइ कैरसक्ने चियै। 4 जब तुसब अपनासबके परभु येसुके नाममे भेला हैचिही त हमर आत्मा तोरेसबसङे रहैछौ आ परभु येसुके सक्तीयो ओतै रहैछै। 5 उ लोकके सैतानके हाथमे सोइप दहै, ताकि ओकर पापी स्वभाब नास हेबे आ परभुके नियाइके दिनमे ओकर आत्मा बाचे। 6 तोरासबके करल घमन्ड ठिक नै छौ। कन्हिके खमिरसे सानल पुरे आँटाके खमिरा बनाइछै, कि से बात तोरासबके थाह नै छौ? 7 तोरासबके बिचसे पुरन्का खमिर हटा, तब तुसब खमिर बिनाके सुध अँटा हेब्ही। कथिलेत अपनासबके निस्तार पाबैनके थुमा, खिरिस्ट बली भ्याचुकल छै। 8 तैखातिर हमसब अधलाह आ दुस्ट कामके पुरन्का खमिरसे बनल रोटीसे नै, महज खमिर नै मिझर्याल, सुध आ सत्यताके रोटीसे निस्तार पाबैन मना। 9 हम तोरासबके बेबिचार करैबला लोकसबके सङहत नै कर कैहके चिठीमे लिखने छेलियौ। 10 ओकर मतलब तुसब बेबिचार करैबला, लोभ करैबला, लुटपाट करैबला या मुरतिपुजा करैबलासबसे बिलकुले सङहत नै कर कैहके नै कहलियौ, नै त तोरासबके सन्सारे छोइरके जाइले परतौ। 11 हम त खिरिस्टियन भाइ चियै कहैछै महज बेबिचार करैछै, लोभ करैछै, मुरतिपुजा करैछै, दोसरके निन्दा करैछै, मतबाला आ दोसरके ठकैछै, एहेन लोकसबसङे बैठके नै खो कैहके लिखने चियौ। 12 कथिलेत मन्डली बाहरके लोकसबके नियाइ करनाइ हमर काम नै चियै। महज मन्डली भितरके लोकसबके नियाइ करैबला काम तोरासबके करैले नै परतौ से? 13 बाहरके लोकसबके नियाइ परमेस्वर करतै महज पबितर धरमसास्तरमे एहेन लिखल छै, “तुसब आपन बिचसे दुस्ट लोकसबके निकाइल दहै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.