१ कोरन्थी 4 - मध्य पुरविया थारूखिरिस्टके सेबकसब 1 तुसब हमरासबके खिरिस्टके सेबकसब आ परमेस्वरके रहसके बात परकट करैबला सम्झैले परतौ। 2 सेबकसब मालिकके बिस्बासयोग्य हैलेपरतै। 3 महज हमर बिस्बायोग्यताके बारेमे तुसब या अदालतसे नियाइ करबिही तैयो उ हमर लेल बरका बात नै चियै। बास्तममे हम्हु आपन नियाइ आपनेसे नै करैचियै। 4 हमर आपने गल्ती हमरा थाह नै छै, महज यि हमरा निरदोस चियै कैहके साबित नै करैछै। हमर नियाय परभुवे करतै। 5 तैखातिर परभु नै आबैतक ककरो दोस नै लगा। आब अन्हारमे घोसरल बातसब उ इजोतमे लाबतै आ लोकके मनभितरके बिचारसब परकट करतै। तब सबलोक परमेस्वरसे आपन परसन्सा पाबतै। 6 हे हमर भाइ-भैयासब, तोरासबके भलाइके लेल हम आपने आ अपोल्लोसके उदाहरन द्याके यि सब बातसब लिख्नेचियौ, ताकि तुसब पबितर धरमसास्तर अनुसार जियैले सिख आ तुसब एक गोरेके पक्छ ल्याके दोसरके बिरोध कैरके घमन्डी नै हो। 7 के तोरासबके औरोसे बरका बनेल्कौ? कि तोरासबसङे जे छौ, उ परमेस्वर नै देल्कौ? यदि तुसब उ पाबनेचिही त, कथिले घमन्ड करैचिही? 8 तुसब सोचैचिही कि पहिने सबकुछ पाइबलेने चियै, पहिने धनिक भेलचियै। बिना हमरासबसे तुसब रजा बइनगेल चिही। साँचोके तुसब राज करतिही त, हम्हुसब तोरासबसङे राज करतियौ! 9 कथिलेत हमरा एहेन लागैए कि परमेस्वर हम परेरितसबके मिरतुदन्ड पाबैबला कैदीसब जखा बिजय जुलुसके सबसे पछा राखनेछै। हमसब सन्सार, स्वरगदुतसब आ लोकसबके अगा तमसा बैनगेल चियै। 10 हमसब खिरिस्टके सेबक भेलासे लोकसबके नजरमे मुरुख भेलचियै, महज तुसब त खिरिस्टके लेल बुधिमान चिही। हमसब कमजोर चियै, महज तुसब बौकार चिही। लोकसब त तोरासबके आदर करैछौ महज हमरासबके अनादर करैछै। 11 हमसब अखुन्तो भुखल आ पियासल चियै, फाटल-चिटल बस्तर पिन्हैचियै आ मार-पिट खाइचियै आ हमरासबके रहैबला घरो-दुवार नै छै। 12 हमसब आपन हाथसे काम कैरके मेहनत करैचियै। जे हमरासबके सराप दैछै ओकरासबके हमसब आसिरबाद दैचियै आ सताबट आबैछै त हमसब सहैचियै। 13 जब लोकसब हमरासबके अपमान करैछै तब नमर्से ओकरासबके जबाफ दैचियै। अखुनतक हमसब सन्सारके मैल आ कुरकुट बनल चियै। 14 हम तोरासबके लाजमे पारैके लेल नै, महज हमर पिरिय बालकसब जखा चेताबनी दैले यि बात लिखैचियौ। 15 तोरासबके खिरिस्ट येसुके बारेमे सिखाइबला दसो हजार गुरुसब भेलोपर पिता त बहुत नै छौ। महज सुसमाचार परचार कैरके खिरिस्ट येसुमे हम तोरासबके पिता भेलचियौ। 16 तैखातिर हम तोरासबके बिन्ती करैचियौ कि, तुसब हमर देखासेखी कर। 17 अहैसे हम तोरासबलग तिमोथीके पठाबैचियै। उ परभुमे हमर पिरिय आ बिस्बासयोग्य बेटा चियै। हम सबठाम आ मन्डलीमे सिख्याल अनुसार खिरिस्ट येसुमे हमर जिबन केहन छेलै, से बात उ तोरासबके बतेतौ। 18 हमरा तोरासबलग फेनसे आबैले हिम्मत नै छै कैहके तोरासबमेसे कोइ-कोइ घमन्डी भेलचिही। 19 महज परभुके इक्छा हेतै त, हम तोरासबलग जल्दीए एबौ। उ घमन्डी लोकसबके बात मातरे नै महज उसबके सक्ती केहैन छै से पता लगाइबै। 20 कथिलेत परमेस्वरके राज बातमे नै, महज सक्तीमे छै। 21 तुसब कथी चाहैचिही? हम तोरासबलग अनुसासनके लाठी ल्याके एबौ कि परेम आ नम्र आत्माके साथ एबौ? |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.