१ कोरन्थी 3 - मध्य पुरविया थारूमन्डलीमे मनमोटाब 1 हे हमर भाइ-भैयासब, हम तोरासबसङे बोलैतखिना आत्मिक लोकसबसङे बाजल जखा बाजैले नै सकलियौ महज सन्सारके लोकसबसङे बाजल जखा बाजल छेलियौ। खिरिस्टमे भरखर बिस्बास करल छोट बचासबसङे बाजल जखा बोललियै। 2 हम तोरासबके दुध पिएलियौ महज अन नै खिएलियौ, कथिलेत तुसब पचाबैले नै सकतिही। अखुन्तो तोरासबके दुधे पियाबे परतौ। 3 कथिलेत तुसब अखुन्तो सन्सारके लोकसब जखा जिबन बिताबैचिही। यदि तोरासबके बिचमे डाह आ झगरा छौ त, कि तुसब सन्सारके औरो लोकसब जखा बेबहार नै करैचिही से? 4 तोरासबमेसे कोइ “हम पावलके” आ कोइ “हम अपोल्लोसके” चियै कहैचिही त, कि तुसब सन्सारके लोकसब जखा नै भेल्ही से? 5 अपोल्लोस के चियै? आ पावल के चियै? हमसब त परमेस्वरके खट्याल सेबकसब मातरे चियै, जकरसे तुसब बिस्बास करलिही। हमसब त परभुके खट्याल काम मातरे करैचियै। 6 हम बिया छिटलियै, अपोल्लोस पानी पटाइल्कै महज बरहाबैबला काम त परमेस्वरे करल्कै। 7 तैखातिर बिया छिटैबला आ पानी पटाबैबला बरका नै चियै, महज बरहाबैबला परमेस्वरे सबसे बरका चियै। 8 बिया छिटैबला आ पानी पटाबैबला बराबर चियै आ परमेस्वर सबकोइके आपन-आपन मेहनत अनुसारके इनाम देतै। 9 कथिलेत सङे-सङे हमसब परमेस्वरके काम करैबला चियै आ तुसब परमेस्वरके खेत आ घर चिही। 10 परमेस्वरके देल अनुगरहसे हम एकटा घर बनाइबला सिपालु मिसतिरी जखा जग खरा करलियै आ दोसर कोइ तैमे घर बनाबैछै। तैमे घर बनाइबला हरेक लोक कनङके बनाबैछै से निकसे धियान देबे। 11 कथिलेत परमेस्वर जे जग बनाइनेछै उ जग येसु खिरिस्ट चियै, उ जग बाहेक कोइ नै दोसर जग बनाइले सक्तै। 12 कोनो लोक ओइ जगमे सोना, चानी, बहुमुल्य पथल, काठ, खर या लार-पुवारसे घर बनाबैले सकैछै, 13 महज नियाइके दिनमे परमेस्वर सबकोइके काम परकट करतै आ उसबके करल काम केहेन छै कैहके आइगसे जाँचल जेतै। 14 यदि जे लोकके काम आइगसे नास नै हेतै त, उ लोक इनाम पाबतै। 15 यदि जे लोकके काम आइगसे डैहके नास हेतै त, उ लोकके नोक्सानी हेतै। तैयो उ लोक बाच्तै जनङ कोनो लोक आइगसे पार भ्याके बाचैछै। 16 तुसब परमेस्वरके मन्दिर चिही आ परमेस्वरके आत्मा तोरासबमे बास करैछौ, कि तुसब नै जानैचिही? 17 यदि कोइ परमेस्वरके मन्दिरके नास करैछै त, परमेस्वर ओकरो नास करतै। कथिलेत परमेस्वरके मन्दिर पबितर छै आ उ मन्दिर तुहेसब चिही। 18 कोइ आपनेके धोखा नै देबे। यदि कोइ अइ सन्सारके हिसाबसे आपनेके बुधिमान ठानैछै त, उ साँचेके बुधिमान हैले आपनेके मुरुख बनाबे। 19 कथिलेत परमेस्वरके अगा सन्सारके बुइध त मुरुख बात चियै। जनङ पबितर धरमसास्तरमे लिखल छै, “उ बुधिमानसबके ओइसबके चतुराइमे पकरैछै।” 20 आ फेर दोसर ठाममे एहेन लिखल छै, “बुधिमानसबके बिचार बेरथके छै कैहके परमपरभु जानैछै।” 21 तैखातिर लोक उपर कोइ नै घमन्ड करे। कथिलेत सबकुछ तोरेसबके चियौ, 22 चाहे पावल, कि अपोल्लोस, कि पतरुस, या सन्सार या जिबन या मिरतु या अखुन्का समय या पछिल्का समय, सब तोरेसबके चियौ। 23 तुसब खिरिस्टके चिही आ खिरिस्ट परमेस्वरके चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.