१ कोरन्थी 16 - मध्य पुरविया थारूपरमेस्वरके जनसबके लेल भेटी 1 यरुसलेममे रहल परमेस्वरके जनसबके लेल भेटी जम्मा करैके बिसयमे हम गलातियाके मन्डलीसबके जे कहने छेलियौ तहिनङे तुहुसब कर। 2 हरेक हप्ताके पहिन्का दिन तुसब आपन-आपन कमाइ अनुसार कुछ अलग कैरके जम्मा करैतरह, ताकी हम तोहर लग एबौ त भेटी जम्मा करैले नै परे। 3 जब हम एबौ त तोरासबके जम्मा करल भेटी यरुसलेममे लजाइके लेल तोरासबके चुनल लोकके हम सिफारिस कैरके पठ्यादेबौ 4 यदि हमरो जाइले परतै त उसब हमरसङे जाइले सक्तै। पावलके भेटघाट करैके योजना 5 हम माकेडोनिया परदेसके यातरा करलाके बाद तोरासबलग भेटघाट करैले एबौ, कथिलेकी पहिने माकेडोनिया जाइके हमर योजनाछै। 6 सकभर हम तोरासबसङे कुछदिन रहबौ या हेतै त पुरे जार मास ओतै बिताइबौ। तकरबाद हम जते जेबै त तुसब हमर यातराके बन्दोबस करैले सकबिही। 7 अइ बेर हम तोरासबसे एक छिन भेटघाट कैरके जाइले नै चाहैचियौ। यदि परभुके इक्छा हेतै त, कुछ समय तोरासबसङे बिताबैके आसा राखने चियै। 8 महज पेन्तिकोसके पाबैन तक हम एफिसस सहरमे रहबौ। 9 हमर बिरोध करैबलासब बहुतो भेलोपरभी परभाबसाली कामके लेल एकटा बरका केबार हमर लेल खुइल गेलछै। 10 तिमोथी तोरासबलग एतौ त, ओकरा कोनो किसिमके दिकत हैले नै दिहे, कथिलेकी ओहो हमरे जखा परभुके काम करैछै। 11 अहैलेल कोइ नै ओकरा अपमान करे। महज सान्तीसे ओकरा आपन यातरामे पठ्यादहै आ उ हमरलग आबे। कथिलेकी भाइसबसङे एतै कैहके हम ओकर बाट ताकैचियै। 12 आब भाइ अपोल्लोसके बिसयमे हमरा कुछ कहैके छै, कि हम ओकरा औरो भाइसबसङे मिलके तोरासबसङे भेटघाट करैके बहुतो आगरह करनेछेलियै, महज अखैन ओकरा आबैके एकोरती इक्छा नै छै। महज मौका पाबते मातर उ एतै। 13 होसियार भ्याके बिस्बासमे अरल रह। साहसी आ बौकार हो। 14 जे काम करैचिही, उ परेमसे कर। 15 भाइसब तोरासबके थाहे छौ, कि स्तिफनासके परिबार अखैयामे बिस्बास करैबलासबमेसे पहिल्का चियै। उसब परमेस्वरके जनसबके सेबामे अपनाके अरपन करने छै। 16 तुसब एहेन लोकसबके आ ओइसबसङे सेबा आ मेहनत करैबलासबके अधिनमे रह कैहके आगरह करैचियौ। 17 स्तिफनास, फोरटुनाटस आ अखाइकस एलासे हम बहौत खुस भेलियै, कथिलेकी तोरासबके अनुपस्थितीमे जे कुछ कमि छेलै उसब पुरा कैरदेल्कै। 18 उसब हमर आ तोरासबके मनके सेहो उत्साहित बनाइनेछौ। ओहैसे तोरासबके एहेन लोकसबके आदर करैले परतौ। अन्तिम गोरलगी 19 एसियाके मन्डलीसब तोरासबके गोरलगी पठाइनेछौ। अकिलास आ पिरिस्किला आ ओइसबके घरमे भेल बिस्बासीसब सेहो परभुमे तोरासबके हिरदयसे गोरलगी पठाइनेछौ। 20 अतेका सब भाइ तोरासबके गोरलगी पठाइनेछौ। तुसब सेहो एक-दोसरके पबितर परेमसे गोरलगी कर। 21 हम पावल, आपने हाथसे यि गोरलगी लिखैचियौ। 22 कोइ परभुके परेम नै करतै त उ सरापित हेबे। हे अपनासबके परभु, आबु! 23 परभु येसु खिरिस्टके अनुगरह तोरासबसङे रहे। 24 खिरिस्ट येसुमे हमर परेम तोरासबसङे रहे। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.