१ कोरन्थी 15 - मध्य पुरविया थारूखिरिस्ट मरलसे जीके उठलै 1 हे हमर पिरिय भाइ-भैयासब, आब हम तोरासबके परचार करल सुसमाचारके बारेमे फेरसे याद कराइले चाहैचियौ, तुसब जे सुसमाचार गरहन करलिही आ तैमे अस्थिर चिही। 2 हमर परचार करल उ सुसमाचारमे बिस्बास करैले नै छोरबिही त तुसब उदार पाबबिही, नै त तोरासबके करल बिस्बास बेरथ हेतौ। 3 हम जे पाबलियै ओह्या सबसे मुख बिसयके रुपमे तोरासबके सोइप देलियौ, अरथात पबितर धरमसास्तर अनुसार खिरिस्ट अपनासबके पापके खातिर मरलै। 4 उ गारलगेलै आ पबितर धरमसास्तर अनुसार तेसर दिनमे परमेस्वर ओकरा फेरसे जिबित करल्कै। 5 तब उ पतरुस लग देखा परलै, तकरबाद बारहो चेलासब लग परगट भेलै। 6 तकरबाद उ पाँच सयसे बेसि बिस्बासी भाइ-भैयासब लग एके साथ परगट भेलै। ओकरा देखैबलासब कतहेक गोरे मैरगेलै आ कतहेक गोरे अखुन्तो जिबित छै। 7 तकरबाद उ याकुब आ सब परेरितसब लग परगट भेलै। 8 सबसे पछा, समय नै पुगल अबस्थामे जलमल लोक जखा हमरो लग परभु परगट भेलै। 9 हम परेरितसबमेसे सबसे तुच्छ चियै। हम परेरित कहैके योग्यके नै चियै कथिलेत हम परमेस्वरके मन्डलीके सताइने चियै। 10 महज हम जे चियै, उ परमेस्वरके अनुगरहसे चियै आ हमर उपर करल ओकर अनुगरह बेकार नै भेलै। हम औरो परेरितसबसे बेसि मेहनत करलियै। बास्तममे काम करैबला हम नै, महज हमरसाथमे भेल परमेस्वरके अनुगरहसे काम करनेचियै। 11 तैखातिर चाहे हम, चाहे औरो परेरितसब, हमसब ओह्या परचार करैचियै, ओइमे तुसब बिस्बास करनेचिही। मरल लोकसब जीके उठैबला बात 12 परमेस्वर खिरिस्टके मरलसे जीयाके उठेल्कै कैहके हमसब परचार करैचियै त, कनङके तोरासबमेसे कोइ-कोइ मरल लोक जीके नै उठतै कहैचिही? 13 यदि मरल लोकसब जीके नै उठैछै त खिरिस्टो मरलसे जीके नै उठलै। 14 यदि खिरिस्ट मरलसे जीके नै उठलै त अपनासबके परचार बेरथ हैछै आ तोरोसबके बिस्बास बेरथ हेतौ। 15 अतबेहेक नै, अपनासब त परमेस्वरके बारेमे झुठ बोलैबलासब जखा हेब्ही, कथिलेत परमेस्वर खिरिस्टके मरलसे जीयाके उठेल्कै कैहके हमसब गबाही दैचियै। यदि मरल लोकसब जीके नै उठैछै त, परमेस्वर सेहो खिरिस्टके जिबित नै करल्कै। 16 यदि मरलसबके जीके नै उठेतै त, खिरिस्ट सेहो मरलसे जिबित नै कर्याल गेलै। 17 खिरिस्ट मरलसे जिबित नै कर्याल गेलछै त, तोरासबके बिस्बास बेरथ छौ आ तुसब अखुन्तो आपन पापमे चिही। 18 तब त खिरिस्टमे बिस्बास कैरके मरलहासब सेहो नास भेल छै। 19 यदि खिरिस्टमे अपनासबके आसा अइ जिन्गीके लेल मातरे राखने चियै त, अपनासबके सबलोकसे बेसि दयाके खाँचो परैछै। 20 बास्तममे, खिरिस्ट त मरलसे जीयाल छै, जे मरलसबमेसे पहिल्का फल चियै। 21 कथिलेत जनङ एकटा लोकके कारन सब कोइके मरे परलै, तहिनङे एकेटा लोकके कारन मरल लोकसब जीके उठतै। 22 जनङ आदममे सबकोइ मरैछै, तहिनङे खिरिस्टमे बिस्बास करैबला सबकोइ जिबित हेतै। 23 महज हरेक लोक आपन-आपन पालमे जीके उठतै। सबसे पहिने खिरिस्ट जीके उठतै, तकरबाद खिरिस्ट फेर एतै तखैन ओकरमे बिस्बास करैबला सबकोइ जीके उठतै। 24 तब सन्सारके अन्त हेतै। तैबखत सब सासन, अधिकार आ सक्तीके नास कैरके खिरिस्ट आपन पुरे राज परमेस्वर पिताके सोइपदेतै। 25 कथिलेत खिरिस्ट आपन सब दुस्मनसबके आपन टाङके तरमे नै राखैतलिक ओकरा राज करैये परतै। 26 तैमे सबसे पछा नास हैबला दुस्मन त मिरतु चियै। 27 कथिलेत पबितर धरमसास्तरमे एहेन लिखल छै, “परमेस्वर सबकुछ खिरिस्टके अधिनमे राइख देनेछै।” महज यि परस्ट छै कि “सबकुछ” कहाइके मतलब परमेस्वर सबकुछ खिरिस्टके अधिनमे राइख देनेछै महज आपने खिरिस्टके अधिनमे नै छै। 28 जब सब चिज खिरिस्टके अधिनमे राखैछै तब बेटा स्वयम परमेस्वरके अधिनमे रहैछै। जे सबचिज आपन बेटाके अधिनमे राइखदेनेछै ताकी परमेस्वर सब चिज उपर अधिकार करे। 29 यदि मरल लोकसब जीके नै उठतै त, मरल लोकसबके सम्झनामे लेल बप्तिस्माके कोन अरथ भेलै त? यदि मरल लोकसब जीके नै उठैछै त लोकसब ओइसबके लेल कथिले बप्तिस्मा लैछै? 30 यदि मरलसे जिके नै उठतै त हमसब मैरके जि उठैके बारेमे परचार कैरके आपन जिबनके कथिले घरीघरी खतरामे पारबै? 31 हे हमर भाइ-भैयासब, तोरासबके कारन परभु येसु खिरिस्टमे हम गर्भसे यि कहैले सकैचियौ, कि हम दिन-दिने मिरतुके खतरामे परैचियै। 32 लोकसबके हिसाबसे कहैचियौ त, एफिसस सहरमे हम जङली जानबरसब जखा लोकसबसङे लराइ कैरके हमरा कि फैदा भेलै? यदि मरल लोक जीके नै उठैछै त “खो आ पि, कथिलेत हमसब त काइल मैर जेबै।” 33 एहन बातसबके धोखामे नै पर। कथिलेत खराब सङहतसे असल लोक सेहो बिगरैछै। 34 होसमे या आ आबसे पाप नै कर। कथिलेत तोरासबमेसे कतहेक गोरे परमेस्वरके नै चिनहने चिही। यि त तोरासबके लेल सरमके बात चियौ। मरलसे जीके उठैबला देह 35 तोरासबमेसे कोइ कहतौ, “मरल लोकसब कनङके जीके उठतै आ उसब केहन किसिमके देह धारन कैरके एतै?” 36 हे मुरुख लोक! तुसब जे बिया छिटैचिही, से बिया नै मरतै त जलमबे नै करतै। 37 तुसब गहुम या कोनो किसिमके अन छिटैचिही त बिया मातरे छिटैचिही, बरहल गाछ त नै रोपैचिही। 38 महज परमेस्वर आपन इक्छा अनुसार ओइ बियाके रुप दैछै। हरेक किसिमके बियासे अलग-अलग परकारके गाछके रुप दैछै। 39 तहिनङे सबके देह एके किसिमके नै हैछै। लोकसबके देह एक किसिमके छै त जिब-जानबरसबके देह दोसरे किसिमके आ चिरै-चुरगुनसबके एक किसिमके छै त माछसबके दोसरे किसिमके देह हैछै। 40 देह सेहो स्वरगिय आ सन्सारिक हैछै। स्वरगिय देहके इजोत एक किसिमके हैछै त सन्सारके देहके इजोत दोसरे किसिमके हैछै। 41 सुरुजके इजोत एक किसिमके, चानके दोसर किसिमके आ तरासबके इजोत तेसर किसिमके छै। कथिलेत एकटा तराके इजोत दोसर तराके इजोतसे अलग हैछै। 42 मरल लोकसब जीके उठतै त तहिनङ हेतै। जे देह बिनासमे गारैछै, उ नास नै हैबला देह ल्याके जिबित हैछै। 43 अनादरमे उ गारल जाइछै महज महिमामे जिबित हैछै। कमजोरीमे उ गारल जाइछै महज सक्तीमे जिबित हैछै। 44 भौतिक देहमे उ गारल जाइछै महज आत्मिक देहमे जिबित हैछै। यदि भौतिक देह छै त आत्मिक देह अबस्य हैछै। 45 तैखातिर पबितर धरमसास्तरमे एहेन लिखल छै, “पहिल्का लोक आदम जिबित परानी भेलै।” महज अन्तिम आदम अरथात खिरिस्ट जिबन दैबला आत्मा चियै। 46 पहिने आबैबला आत्मिक नै महज भौतिक देहमे छेलै, पाछु आबैबला भौतिक देहमे नै महज आत्मिक चियै। 47 पहिल्का लोक आदम पिरथिबीके माटीसे बन्याल छेलै, महज दोसर लोक खिरिस्ट स्वरगसे एलै। 48 पिरथिबीके लोकसब माटीसे बनल पहिल्का लोक जखा हैछै। तहिनङे स्वरगके लोकसब स्वरगसे एल लोक जखा हैछै। 49 जहिनङे हमसब अखुन माटीसे बनल लोकके रुपमे धारन करनेचियै, तहिनङे एक दिन हमसब स्वरगके लोकके रुपमे धारन करबै। 50 हे हमर पिरिय भाइ-भैयासब, हम तोरासबके यि बात कहैले चाहैचियौ, कि मासु आ लहुसे बनल अपनासबके देह परमेस्वरके राजके हकदार हैले नै सक्तै। तहिनङे नास हैबला देह कहियो नास नै हैबला देहके हकदार हैले नै सक्तै। 51 सुन! हम तोरासबके एकटा रहसके बात कहैचियौ, अपनासब कोइ नै मरबिही, महज सबकोइ परिबरतन हेतै। 52 यि परिबरतन आँखके एक मटकीमे, तुरहीके अन्तिम आबाजमे हेतै। तै समयमे तुरही बज्तै तब मरल लोकसब सबदिनके लेल जिबित हेतै आ अपना जिबित भेलसब परिबरतन हेबै। 53 कथिलेत अपनासबके नास हैबला देह नास नै हैबला देहके रुपमे परिबरतन हेतै आ मरनसिल देह अमर रहैबला देहके रुपमे परिबरतन हैलेपरतै। 54 जब नास हैबला देह नास नै हैबला देहमे आ मरनसिल देह अमर रहैबला देहके रुपमे परिबरतन हेतै, तब पबितर धरमसास्तरमे एहेन लिखल बचन पुरा हेतै, “मिरतु हारलै, जित पुरा भेलै।” 55 “ए मिरतु, तोहर जित कते? ए मिरतु तोहर खिल कते?” 56 मिरतुके खिल पाप चियै आ पापके सक्ती बेबस्था चियै। 57 महज परमेस्वरके धन्यबाद हेबे, जे अपनासबके परभु येसु खिरिस्टसे अपनासबके बिजय दैछै। 58 तैखातिर हे हमर पिरिय भाइ-भैयासब, बिस्बासमे बलगर आ अस्थिर रह। तुसब परभुके काममे बरहैत जो, कथिलेत तुसब जानैचिही कि परभुमे तोरासबके मेहनत बेरथ नै हेतौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.