१ कोरन्थी 14 - मध्य पुरविया थारूअगमबानी आ भसाके बरदानसब 1 परेम करैबला बातमे लागल रह आ आत्मिक बरदानसब पाबैके लेल उतकट इक्छा राख। खास कैरके अगमबानीके बरदानसब बोलैके लेल इक्छा कर। 2 कथिलेत जे आन भसामे बोलैछै उ लोकसबसङे नै, महज परमेस्वरसङे बोलैछै। उ कथी बोलैछै से कोइने बुझैछै, उ त पबितर आत्मासे रहसके बातसब बोलैछै। 3 महज जे अगमबानी बोलैछै, उ दोसर लोकसबके आत्मिक रुपमे बौकार बनाबैछै, हौसला दैछै आ सान्तबना दैछै। 4 जे आन भसामे बोलैछै, उ आपन आत्मिक बिरधी करैछै, महज जे अगमबानी बोलैछै, उ पुरे मन्डलीके आत्मिक बिरधी कराबैछै। 5 तु सबकोइ आन भसा बोल कैहके हम चाहैचियौ, महज ओकरसे बेसि तुसब अगमबानी बोल कैहके हम चाहैचियौ। कथिलेत आन भसामे बोलेसे त बरु अगमबानी बोलनाइ बरका चियै। आन भसाके अरथ खोइल दैबला लोक रहतै तब मातरे मन्डलीके बिस्बासीसबके आत्मिक तवरमे बलगर बनाइतै। 6 तैखातिर हे भाइ-भैयासब, यदि हम तोरासबके बिचमे आन भसामे बोल्बौ त तोरासबके कि फाइदा हेतौ? बरु परमेस्वरसे एल कोनो बातके परकास आ ग्यान-गुनके बात, अगमबानी या सिक्छा हम देबौ त तोरासबके फाइदा हेतौ। 7 बौसली या बिना बजासबसे परस्ट धुन नै निकलतै त, कि बइजरहलछै कैहके के कहैले सक्तै? 8 यदि तुरहीसे परस्ट धुन नै निकलतै त, युधके लेल के तयार हेतै? 9 तहिनङे यदि तोरासबके बोलल भसा लोकसब नै बुझैछौ त, तुसब कि बोलैचिही कैहके के बुझतौ? तुसब त हबामे बोलल जखा मातरे हेब्ही। 10 सन्सारमे बहुतो भसासब छै आ हरेक भसाके अपने-आपके अरथ छै। 11 यदि हम ककरो भसा नै बुझैचियै त, ओकरलेल हम परदेसी जखा हेबै आ उ हमर लेल परदेसी जखा हेतै। 12 तहिनङे तुसब आत्मिक बरदानसबके खातिर एकदमसे इक्छा करलासे, उ बरदानसब बेसिसे परयोग कर। अनङ करबिही त मन्डलीके बिस्बासीसब आत्मिक तवरसे बलगर हेतै। 13 तैखातिर जे आन भसामे बोलैछै, तकर अरथ बताबैके बरदानके लेल उ परथना करे। 14 यदि हम आन भसामे परथना करैचियै त, हमर आत्मा परथना करैछै, महज हम कथी बोलैचियै से हम आपने नै बुझैचियै। 15 आब हम कि करबै? हम आपन आत्मासे परथना करबै आ आपन मनसे सेहो बुझैबला भसामे परथना करबै। हम आपन आत्मासे भजन गाब्बै आ आपन मनसे सेहो बुझैबला आपन भसामे भजन गाब्बै। 16 तुसब आत्मामे परमेस्वरके परसन्सा करबिही महज तोहर बात नै बुझैबला लोक तोहर बातमे सहमति जनाबैले कनङके “आमेन” कहतौ? कथिलेत उ तोहर कहल बात नै बुझैछौ। 17 परमेस्वरके तु निकसे धन्यबाद देब्ही, महज ओइसे दोसर लोकके आत्मिक बिरधी नै करैछै। 18 हम परमेस्वरके धन्यबाद दैचियै, कथिलेत हम तोरासबसे बेसि आन भसामे बोलैचियै। 19 मन्डलीमे दस हजार सब्द आन भसामे बोलेसे त बरु औरो लोक हमर बात बुझे कैहके पाँचटा सब्द मातरे बोलैले चाहैचियै। 20 हे हमर भाइ-भैयासब, तुसब सोच-बिचारमे बचा जखा नै महज परिपक्क लोक जखा बन। खराब बातमे ठिक-बेठिक छुटयाबैले नै सकैबला बचा जखा हो। 21 मोसाके बेबस्थामे परमपरभुके बोलल बात एहेन छै, “गैर-यहुदीके लोकसबके भसामे आ परदेसीसबके भसामे हम यि लोकसबसङे बोल्बै, तैयो उसब हमर बात नै सुन्तै।” 22 जहिनङ आन भसासब बिस्बास करैबलासबके लेल नै महज बिस्बास नै करैबलासबके लेल चेन्हा चियै। तहिनङ अगमबानी त बिस्बास नै करैबलासबके लेल नै महज बिस्बास करैबलासबके लेल चेन्हा चियै। 23 जब मन्डलीमे सबलोक जम्मा भ्याके आन भसा बोल्तै तब मन्डली बाहरके या बिस्बास नै करैबला लोकसब ओते एतौ त, कि उसब तोरासबके पागल भेलचिही कैहके नै कहतौ? 24 महज सब गोरा अगमबानी करैबखत बिस्बास नै करैबला या मन्डली बाहरके लोक ओते एतौ त उ आपन भसामे बोलल बात सुन्लाके कारन आपन पाप थाह पाबतै आ आपनेसे जाँचैले सक्तै। 25 ओकर मन भितरके गुप्त बातसब बाहर एतै। तब उ ठेङहुनिया द्याके परमेस्वरके आराधना करतै आ “परमेस्वर साँचोके तोरासबके बिचमे छौ” तै बातके घोसना करतै। मन्डलीमे भेला हैबला समयके नियम 26 हे हमर भाइ-भैयासब, आब हम कथी कहबौ? तुसब एकसाथ जम्मा हैचिही त कोइ भजन गाबैछै, कोइ सिक्छा दैछै, कोइ परमेस्वरसे परगट भेल बात कहैछै, कोइ आन भसा बोलैछै आ कोइ आन भसाके अरथ खोइलदैछै। यि सब बातसबसे मन्डलीके आत्मिक तवरसे बिरधी कराबैछै। 27 कोइ आन भसा बाजैछै त दुइ गोरा या बेसिमे तिन गोरा एक-एक कैरके बाजे आ एक गोरा ओकर अरथ खोइलदेबे। 28 महज ओते अरथ खोलदैबला कोइ नै छै त आन भसा बोलैबला लोक मन्डलीमे चुप रहे, उ आपनेसङे आ परमेस्वरसङे बोले। 29 अगमबानी बोलैबला दुइ या तिन गोरा हेबे आ ओइसबके बोलल बात ठिक छै कि नै छै से औरोसब जाँच करे। 30 महज बोलैत खिना औरो ककरो परमेस्वरसे कोनो सत बात परकट हैछै त पहिनेसे बोलैबला लोक चुप हेबे। 31 तुसब सबकोइ एक-एक कैरके अगमबानी बोलैले सकबिही आ अहिनङ कैरके सबकोइ सिखे सकबिही तब सबकोइ उत्साह पाबबिही। 32 अगमबक्तासबके आत्मा अगमबक्तेसबके अधिनमे रहैछै। 33 कथिलेत परमेस्वर गोलमालके परमेस्वर नै चियै, महज सान्तीके परमेस्वर चियै। जनङ सब मन्डलीमे भेल्हा सन्तसबके तौरतरिका अनुसार परमेस्वरके बिस्बासीसबमे छै। 34 जनिसब मन्डलीके सभामे चुप रहैके चाही। ओइसबके बाजैके अनुमति नै छै, महज बेबस्थामे कहल जखा उसब अधिनमे रहे। 35 कोनो बातके बारेमे उसब पुछैले चाहैछै त, उसब घरेमे आपन-आपन घरबलाके पुछे। कथिलेत जनिसब मन्डलीमे बजनाइ सरमके बात चियै। 36 कि परमेस्वरके बचन तोरेसबसे सुरु भेलछौ? कि उ बचन तोरेसबलग मातरे एलछौ? 37 कोइ अपनाके अगमबक्ता या आत्मिक लोक सम्झैछै त हमर लिखल बात परभुके आग्या चियै कैहके ओकरा सुइकार करे। 38 महज कोइ अकर वास्ता नै करतै त, ओकरो नै वास्ता करतै। 39 अहै खातिर हे भाइ-भैयासब, अगमबानी बाजैले उटकट इक्छा राख आ आन भसा बाजैले मनाही नै कर। 40 महज सबकाम ठिक आ बेबस्थित ढङ से कर। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.