१ कोरन्थी 10 - मध्य पुरविया थारूमुरतिपुजाके बारेमे चेताबनी 1 हे हमर भाइसब, मोसाके पछा लागैबला अपनासबके पुरखासबके कि भेल छेलै से बात हम तोरासबके याद दिलाबैचियौ। उसब सब गोरेके मिसर देससे बादल रस्ता देखाइत ल्यागेलै आ उसब समुन्दरके बिचसे पार भ्याकेगेलै। 2 बादल ओइसबके रस्ता देखाइत ल्यागेलै आ उसब समुन्दरके बिच हैत मोसाके पछा गेलै आ यि उसबके लेल बप्तिस्मा ल्याल जखा भेलै। 3 उ सबकोइ एके किसिमके आत्मिक भोजन खेल्कै, 4 आ सबकोइ एके आत्मिक पानी पिल्कै, कथिलेत उसब सङे-सङे यातरा करैबला आत्मिक चटानसे निकलल पानी पिल्कै आ उ चटान खिरिस्ट छेलै। 5 महज परमेस्वर बहुतो गोरेसङे खुस नै छेलै आ उसब मरुभुमिमे नास भेलै। 6 आब ओकरेसब जखा हमसब खराब इक्छा नै राखबै कैहके यि घटना अपनासबके चेताबनीके लेल चियै। 7 उसबमेसे कतहेक गोरे करल जखा तुसब मुरतिपुजा नै कर। यह्या बात पबितर धरमसास्तरमे लिखल छै, “लोकसब भोजमे खानपिन करैले बैठलै आ मोज-मज्जा करैले लाग्लै।” 8 अपनासब ओकरेसब जखा बेबिचारमे नै फस जनङ उसब फस्लै आ एके दिनमे तइस हजार लोक मरलै। 9 अपनासब खिरिस्टके परिक्छा नै करैके चाही, जनङ ओइसबमेसे कतहेक गोरे करल्कै आ साँपसब धैरके मरलै। 10 अपनासब गनगन नै कर जनङ ओइसबमेसे कतहेक गोरे करल्कै आ मिरतुके दुत ओइसबके नास करल्कै। 11 यि सब घटनासब अपनासबके खातिर उदाहरन हेबे कैहके अपनासबके चेताबनीके लेल लिखल गेलै। आब हमसब अइ सन्सारके अन्तके समयमे आइबगेल चियै। 12 तैखातिर जे अपनाके ठार भेलचियै कहैछै, उ होसियार रहे, नै त उ खैसपरतै। 13 तोरासबके जिबनमे आबैबला सब परिक्छासब लोकसबके बिचमे आबैबला जखा हैछै। परमेस्वर बिस्बासयोग्य छै, जे तोरासबके सहे नै सकैबला परिक्छामे नै पारतौ। जब तु लोभमे परबिही परमेस्वर तोरा उ परिक्छासे बचैयोके लेल सहायता करतौ। तब तु सहैले सकबिही। 14 तैखातिर, हे हमर पिरिय भाइ-भैयासब, मुरतिपुजासे दुरे रह। 15 तुसब बुधियार लोक चिही कैहके हम यि बात कहैचियौ, तुसब आपनेसे हमर कहल बातसबके गौरसे बिचार कर। 16 जब हमसब परभु-भोजके बाटी ल्याके परमेस्वरके धन्यबाद दैचियै, कि उ बाटीसे पियैचियै त हमसब खिरिस्टके लहुमे सहभागी नै भेलियै से? आ उ रोटी, जकरा हमसब तोइरके खेलियै, कि खिरिस्टके देहमे सहभागी नै भेलियै से? 17 रोटी एकेटा छै आ हमसब बहुतो गोरे चियै तैयो एके देह चियै, कथिलेत हमसब एकेटा रोटीसे खाइचियै। 18 इजराएली लोकसबके बारेमे बिचार कर। कि उसब बेदीमे चरहाइबला चिजसब ख्याके बेदीमे सहभागी नै भेलै से? 19 हम कि कहैले चाहैचियौ? कि मुरतिके चरह्याल चिजके कोनो महत्व छै? या कि मुरतिके कोनो महत्व छै? 20 हमर कहैके मतलब यि चियै कि, जे बली मुरतिपुजा करैबलासब चरहाबैछै उ परमेस्वरके नै बल्की भुत-परेतसबके चरहाबैछै आ हम नै चाहैचियौ कि तुसब भुत-परेतसबसङे सहभागी हो। 21 तुसब परभुके बाटी आ भुत-परेतसबके बाटी दुनुसे पियैले नै सकबिही। तहिनङे तुसब परभुके भोज आ भुत-परेतसबके भोज दुनु खाइले नै सकबिही। 22 अनङकैरके परभुके रिस उठेनाइ डरलागैबला बात नै चियै से? कि अपनासब ओकरसे बौकार चिही? बिस्बासीसबके स्वतन्तरता 23 तोरासबमेसे कोइ-कोइ कहैचिही, “सब चिज करैले पाबैछै” महज सब चिजसे भलाइ नै हैछै। दोसर सब कहैछै, “सब चिज करैले पाबैछै” महज सब चिजसे फैदा नै हैछै। 24 कोइ आपन मातरे भलाइ नै, बरु दोसरके सेहो भलाइ खोजे। 25 मासुके दोकानमे कथी बेचैछै, बिबेकके खातिर कोनो सबाल नै कैरके खो। 26 कथिलेत पबितर धरमसास्तरमे लिखलछै, “पिरथिबी आ अइमे भेल सब चिज परमपरभुवेके चियै।” 27 यदि कोइ परभुमे बिस्बास नै करल लोक तोरासबके भोजमे नौता दैछौ आ जाइले मन लागैछौ त जो आ तोरा जे-जे खाइले दैछै, बिबेकके खातिर बिना सबाल कैरके खो। 28 महज कोनो लोक तोरा “यि त मुरतिके चरह्याल चिज चियौ” कहैछौ त, बताइबला लोकके खातिर आ बिबेकके लेल उ नै खो। 29 हमर कहैके मतलब तोहर बिबेकके लेल नै, महज उ बताबैबला लोकके बिबेकके लेल चियै। तुसब कहैले सकबिही, “दोसरके बिबेकके लेल आपन स्वतनरता कथिले जाँच करबै? 30 यदि हम परमेस्वरके धन्यबाद द्याके खाइचियै त, धन्यबाद द्याके ख्याल भोजनके लेल कथिले हमरा दोसर लोक दोस लगाइतै?” 31 तैखातिर तुसब खो, पि या जेकुछ कर, सबकुछ परमेस्वरके महिमाके लेल कर। 32 तुसब ककरो ठेस लागैबला काम नै कर, चाहे यहुदीके, चाहे गिरिकके या चाहे परमेस्वरके मन्डलीके हेबे। 33 हमर करल जखा कर। हम अपना खुस हैबला काम नै करलियै। महज सबकोइ मुक्ती पाबे कैहके सब तरहसे सबके भलाइ खोजैचियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.