Marcos 10 - Mushuj Testamento Diospaj Shimi

‘Ama shitanacuchun’ yachachishcami

¹ Jesusca chaimanta ña llujshishpaca, Jordán yacu chʼimbanij, Judeapi caj llajtacunamanmi shamurca. Pai shamujpica, cutinmi achcacuna tandanacumurca. Paicunamanpish Pai yachachij cashca shinallatajmi, cutin yachachicurca.

² Chaipimi fariseocuna Jesuspajman cʼuchuyamushpaca, pandachishun yuyashpa: —¿Mandashcapica, ‘Cusaca huarmita shitanallami’ ninchu, imatagari?— nishpa tapurcacuna.

³ Ashtahuanpish Jesusca: —Moisesca, ¿imatataj cancunataca, mandashca?— nircami.

⁴ Paicunaca: —Moisesca, “Huarmitaca shitashcata ricuchij shuj quillcata rurashpaca, shitanallami” nishcami— nircacunami.

⁵ Jesusca cashnami cutichirca: —Cancunallataj chʼahuan shungu cajpimi, chashna mandashpa quillcarca.

⁶ Ashtahuanpish Taita Diosca, callaripi tucuita ruracushpaca, “Cʼarita, huarmitami rurarca.”

⁷ Chaimanta “Cʼarica, yaya mamamanta raquirishpa, paipaj huarmihuan tandanacushpa causachun.

⁸ Ishquimantaca, shujlla aichami tucunga.” Ña mana ishquichu, ashtahuanpish ishquimantaca shujllami tucun.

⁹ Taita Dios chashna tandachishcataca, amataj runaca chʼicanyachichun— nircami.

¹⁰ Yachacujcunaca, huasipi cashpami Jesustaca, chaillatataj cutin tapurcacuna.

¹¹ Jesusca cashnami nirca: —Maijanpish paipaj huarmita shitashpa shujtajhuan caźarajca, huainayashpa quiquin huarmitami llaquichin.

¹² Shinallataj, maijan huarmipish cusata shitashpa caźarajca, huainayanllatajmi— nircami.

Jesusca huahuacunatami bendiciashca

¹³ Chai qʼuipami, Jesús tuparichun nishpa, huahuacunata ricuchij shamurcacuna. Ashtahuanpish yachacujcunaca, huahuacunata pushamujcunataca, sinchita rimashpami jarcarcacuna.

¹⁴ Chaita ricushpaca, pʼiñarishpami Jesusca cashna nirca: «Saquichij huahuacuna Ñucapajman shamuchun, ama jarcaichijchu. Taita Dios mandacunca chashnacunapajmi.

¹⁵ Maijanpish Taita Dios mandacunta mana shuj huahua shina chasquijca, chaimanca manataj yaicungachu, chaica chashnatajmi» nircami.

¹⁶ Chashna nishpaca, huahuacunata marcashpami, paicunapaj jahuapi maquita churashpa bendiciarca.

Achcata charij mosomi Jesus-huan parlashca

¹⁷ Chaimanta llujshishpa ñanpi yaicujpimi, ñapish shuj runaca callpashpa chayamurca. Chaipi Paipaj ñaupajpi cungurishpaca: —Alli Yachachij, huiñai causaita charingapajca, ¿imatataj rurana cani?— nishpami tapurca.

¹⁸ Shina nijpi Jesusca, cashnami nirca: —¿Ima nishpataj Ñucataca alli ningui? Allica pi mana tiyanchu, shujllami tiyan. Paica Taita Diosmi.

¹⁹ Mandashcapi ima nicushcataca, canllataj yachanguimi: “Ama huainayangui, ama huañuchingui, ama shuhuangui, ama pita yanga llullashpa juchachingui, ama umangui, cambaj yaya mamatapish cʼuyangui” ninmi— nircami.

²⁰ Shina nijpi paica: —Yachachij, chaitaca huambramantapachamari tucuita pajtachicuni— nishpami cutichirca.

²¹ Chashna nijpi Jesusca, cʼuyaj ñahuihuan ricurashpami: —Shujca illanrajmi, can tucui charishcacunata cʼatushpa huajchacunaman cugri. Chashna rurashpami, jahua pachapica achcata charingui. Chai huasha, cambaj cruzta japishpa, Ñucata catilla— nircami.

²² Chashna nijpica, paica achcata charij cashcamantaca, anchata nanarishpa llaquijlla rircallami.

²³ Chashna rijpica Jesusca, muyujta ricushpami, Paipaj yachacujcunataca: —¡Achcata charijcunaca Dios mandacunpica, mana jahualla yaicungacunachu!— nirca.

²⁴ Chaita uyashpa, Paipaj yachacujcuna jatunta mancharicujpimi, Jesusca cutintaj cashna nirca: —¡Huahuacuna, ima charishcacunallapi shunguta churajpajca, Taita Dios mandacunman yaicunaca manataj jahuallachu!

²⁵ Dios mandacunman shuj charij yaicunaca, yallitaj sinchimari. Camellota auja rinrinpi pasachisha nicushcatapish yalli sinchimi— nircami.

²⁶ Shina nijpicarin paicunapurami ashtahuan mancharinacushpa: —¿Shinashpaca, pitaj quishpiri tucungari?— ninacurcacuna.

²⁷ Chaimantami Jesusca, paicunata ricurashpa: —Runacunapajca sinchitajmari, ashtahuanpish Taita Diospajca, mana sinchichu. Taita Diospajca tucui imapish jahuallamari— nircami.

²⁸ Chashna nijpi Pedroca: —Ñucanchijca tucuita saquishpami, Cantaca caticunchij— nircami.

²⁹ Shina nijpimi Jesusca, cashna nirca: —Mana nij tucunillachu, maijanca alli huillaita crishpa Ñucata catingaraicumi quiquin huasita, huauquicunata, panicunata, yaya mamata, huarmita, huahuacunata, allpacunata saquin.

³⁰ Paica, cunan punllallatajmi yallihuan chasquin. Huasicunata, huauquicunata, panicunata, mamacunata, huahuacunata, allpacunatapish patsaj cutihuan yallitami chasquin. Shamuj punllapicarin, huiñai causaitamari chasquinga.

³¹ Shina cajpipish achcacunami, puntapi cajcunaca huashayangacuna. Ashtahuanpish catilla cajcunami, puntapi cangacuna— nircami.

Jesusca cutinmi Paita huañuchinata huillashca

³² Jerusalenmanmi, ñanta huichiman ricurcacuna. Jesús ñaupashpa ricujpimi, yachacujcunaca mancharinacushpa, manchailla caticurcacuna. Chaimantami chunga ishquillata chʼicanchishpa, Pai imalla tucuna cashcata, cashna huillai callarirca:

³³ «Cunanca Jerusalenmanmi huichiyacunchij. Runa Aichayuj Ñucataca pushaj curacunaman, Mandashcata yachachijcunamanmi cungacuna. Paicunami Ñucataca juchachishpa, ‘Huañunami cangui’ nishpa, mana israelcunaman cunga.

³⁴ Paicunaca, chanzata rurashpa azotingacunami, chʼucangacunami, huañuchingacunapishmi. Ashtahuanpish quimsa punllapica causarishallami» nircami.

Jacobohuan Juanhuanmi puntapi tiyarinata mañashcacuna

³⁵ Chashna nijpimi, Zebedeopaj churi Jacobopish, Juanpish Jesuspajman cʼuchuyashpaca: —Yachachij, ñucanchij mañashcata ari ninguipishchari— nircacuna.

³⁶ Shina nijpi Jesusca: —¿Imatataj rurachun ninguichij?— nishpami tapurca.

³⁷ Chashna nijpimi, paicunaca: —Quiquinpaj sumaj mandanapica, shujtaca alli ladoman, caishujtaca lluqui ladoman ñucanchijta tiyachihuangui— nircacuna.

³⁸ Shina nijpi, Jesusca: —Imata mañacushcatapish mana yachanguichijchu. ¿Ñuca ubyanataca, ubyai tucunguichijchari? ¿Bautiźarinatapish, Ñuca bautiźarinapi bautiźari tucunguichijchari?— nircami.

³⁹ Chashna nijpi paicunaca: —Ari, rurashunllami— nishpa cutichijpi, Jesusca cashnami nirca: —Chaica chashnatajmari. Ñuca ubyanataca, cancunapish ubyagringuichijmi. Bautiźarinatapish, Ñuca bautiźarishcapi bautiźaringuichijmi.

⁴⁰ Ashtahuanpish Ñuca alli ladopi, lluqui ladopi tiyachinaca mana Ñuca maquipichu. Chaipica, maijanpaj allichishca cashpaca, chaitami tiyachinga— nircami.

⁴¹ Caishuj chunga yachacujcuna chaita uyashpaca, Jacobohuanpish, Juanhuanpish pʼiñarircacunami.

⁴² Chaimantami Jesusca, tucuicunata cayashpa cashna nirca: —Cancunallataj yachanguichijmi, llajtacunata mandajcunallami, llajtapi causajcunataca sarushpa charincuna. Llajtacunapi jatun nishcacunami, paicunallata servichishpa charincuna.

⁴³ Ashtahuanpish cancunaca, mana chashna cana canguichijchu. Maijan cancunapuramanta jatun casha nishpaca, cancunata servij cachun.

⁴⁴ Cancunapuramanta maijanpish puntapi casha nishpaca, tucuicunata servij cachun.

⁴⁵ Ñuca, Runa Aichayuj cashpapish, mana servishca puringapaj shamurcanichu. Ashtahuanpish Ñucaca servingapajpish, huañushpa achcacunata quishpichingapajpishmi shamurcani. Chaimantami chashna mandani— nircami.

Mana ricuj Bartimeotami Jesús alliyachishca

⁴⁶ Ñami Jericoman chayamurcacuna. Jericomanta Jesús Paipaj yachacujcunandij, achca gentecunandij cutin llujshicujpimi, Timeopaj churi Bartimeoca, ñan cʼuchupi mañashpa tiyacushca carca. Paica, mana ricujmi carca.

⁴⁷ Paica, ‘Nazaretmanta Jesusmi shamucun’ nijta uyashpaca: —¡Davidpaj Churi Jesús, ñucata llaquihuaiari!— nishpami capari callarirca.

⁴⁸ Chashna caparicujpica, achcacunami upallachun nishpa jarcarcacuna. Ashtahuanpish paica: —¡Davidpaj Churi, ñucataca llaquihuaiari!— nishpami, ashtahuan caparirirca.

⁴⁹ Jesusca chaipi shayarishcahuanmi: —Cayaichij— nirca. Mana ricujta cayajcunaca: —Alliyachigrinmari, jatari, cayacunmari— nircacunami.

⁵⁰ Chashna nijpica paica pillurishcatapish shitashpami, jatarishcahuan Jesuspajman shamurca.

⁵¹ Pai shamujpimi Jesusca: —¿Imatataj rurachun ningui?— nishpa tapurca. Chashna tapujpica, mana ricujca: —Yachachij, ñuca ñahuicunata allichihuai— nircami.

⁵² Shina nijpi Jesusca: —Ricui, can crishcamantami alliyangui— nircami. Chashna ninca, ñahui ricujpica, Jesusta catishpa ñanta rircallami.