Lucas 17 - Mushuj Testamento Diospaj Shimi

‘Pita ama juchapi urmachinguichijchu’ nishcami

¹ Jesusca Paipaj yachacujcunataca, cashnami nirca: —Ñitcachij millaica tiyangatajmi. Shina cajpipish maijan ñitcachijca, ¡ai, imachari tucunga!

² Cai uchillacunata ñitcachij canapaj randica, jatun cutana rumita cungapi huatashpa, mama cucha chaupipi shitashca canarajmi alli canman.

³ Chaimanta alli yuyaihuan causaichij. Cambaj huauqui canta llaquichijpica, cunashpa jarcangui. Can jarcajpi cutirijpica, perdonangui.

⁴ Shuj punllapi canchis cutin canta llaquichijpipish, canchis cutinllataj: “Mana allitamari rurashcani, perdonahuai” nishpa llaquirijpica, perdonanguilla— nircami.

⁵ Huillagrichun mingashcacunaca, Apunchij Jesustaca: —Ñucanchijman ashtahuan crina yuyaita cuhuai— nircacunami.

⁶ Shina nijpimi, Apunchij Jesusca cashna nirca: —Uchilla mostaza muyu shinallatapish crina yuyaita charishpaca, cai sicómoro yurata: ‘Caimanta anchui, jatun cuchapi tiyarigri’ nijpipish, cancuna nishcata uyashpa chaiman rinmanllami.

⁷ ¿Maijan cancuna shuj runata charishpaca pai yapushpa, mana cashpaca michishpa tigramujpica: “Shamui, cunanca micuj tiyarilla” ninguichijchu?

⁸ Chashna ninapaj randica: “Utca utca micunata yanushpa ñucamanraj carai, chai qʼuipa canca micunguillami” ninguichijmi.

⁹ Chashna rurachishpapish, cancuna mandashcata rurashcamantaca, mana paguillapish ninguichijchu, ¿nachuchij?

¹⁰ Shinallataj, cancunapish Dios tucui imallata rurai nishcata rurashpapish: “Ñucanchijca imata rurana cashcallatami rurashcanchij. Ima alli servijcunallapish mana canchijchu” ninami canguichij— nircami.

Leprahuan ungushca chunga runacunatami alliyachishca

¹¹ Jerusalenman Jesús ricushpaca, Galilea llajtata, Samaria llajtatami rirca.

¹² Shuj aillu llajtaman chayajpica, leprahuan ungushca chunga runacunami Jesus-huan tupangapaj shamurcacuna. Paicunaca, Jesuspajmanta carullapi shayarishpami:

¹³ —¡Yachachij Jesús, ñucanchijta llaquihuaiari!— nishpa caparircacuna.

¹⁴ Chashna caparijpi, Jesús paicunata ricushpaca: —Richij, curacunaman ricuchirigrichij— nircami. Chashna nishpa cachajpica, ñanta ricushpallataj alliyarcallacunami.

¹⁵ Chai alliyajcunamanta shujca, Taita Diosta ‘Sumajmari cangui’ nishpami tigramurca.

¹⁶ Ña Jesuspajman chayamushpaca, Paipaj ñaupajpi pambacama cumurishpami, pagui nirca. Chai runaca, Samaria llajta runami carca.

¹⁷ Jesusca, paitaca cashnami nirca: —Chungatamari alliyachircani, ¿caishuj iscunca maipitaj?

¹⁸ Cai mana Israel runallamari, Taita Diosta sumajyachingapajca tigramushca— nircami.

¹⁹ Chashna nishca huashaca, chai runataca: —Canca alliyachinata crishcamantami, alliyashcangui. Jatarishpa rilla— nishpami cacharca.

Dios ima punlla mandangapaj tiyarinatami tapushcacuna

²⁰ Fariseocunaca, Jesustaca: —¿Ima punllataj Taita Diosca mandangapaj tiyaringa?— nishpami tapurcacuna. Chashna tapujpimi, Jesusca cashna nirca: —Taita Dios mandanaca, mana ñahui ricunallachu.

²¹ Mana ‘Caipimari, chaipimari mandacun’ nishpa pi ricuchingachu. Taita Diosca, ñamari cancunapaj chaupipi mandacun— nircami.

²² Cutin paipaj yachacujcunataca, Jesusca cashnami nirca: —Runa Aichayuj Ñuca mandana punllapi, shuj punllallatapish causasha nina chayamucunmi. Shina cashpapish, mana ricunguichijchu.

²³ Chashna yuyacujpitajmi ‘Paica caipimari, chaipimari’ ningacuna. Chashna nijpipish, pajta cringuichijman, pajta catinguichijman.

²⁴ Runa Aichayuj Ñuca shamushpaca, relampa achij nishpa, tucuita achijyachij shinami shamusha.

²⁵ Ashtahuanpish cunanca, achca llaquicunata apanarajmi cani. Cai runacuna pʼiñashca canarajmi cani.

²⁶ Ima shinami ñaupa yaya Noé causai punllacunapi tucurca, chashnallatajmi Runa Aichayuj Ñuca shamuna punllacunapish canga.

²⁷ Huambuj jatun huasipi Noé yaicungacamaca, allita micucurca, ubyacurca, caźaracurca, caźarachicurcami. Noé ña ucuman cajpi tamya callarijpimi, allpata yacu millpujpi tucuicuna huañurca.

²⁸ Cutin shinallataj ñaupa yaya Lot causai punllacunapipish allita micucurca, ubyacurca, cʼatucurca, randicurca, tarpucurca, huasichicurcacunami.

²⁹ Chashna ruracujpi Lot ña Sodoma pueblomanta llujshijpica, jahuamanta ninahuan azufrehuan tamyashpami, tucuicunata huañuchirca.

³⁰ Chashnallatajmi Runa Aichayuj Ñuca shamui punllapipish canga.

³¹ Chai punllapica, maijanpish huasi jahuapi cashpaca, ucupi ima tiyajta apangapaj ama yaicuchun. Shinallataj maijan chagrapi cashpapish, huasiman ama tigrachun.

³² Lotpaj huarmi ima tucushcata yuyarichij.

³³ Quiquin causaita llaquijca, chingaringami. Quiquin causaita mana llaquijca, quishpiringami.

³⁴ Cancunaman huillanimi: Chai tutaca, shuj camapi ishqui dormicungami, shujca japi tucunga, shujca saquishca cangami.

³⁵ Shinallataj ishqui huarmicuna cutacungami, shujca japi tucunga, shujca saquishca cangami.

³⁶ Shinallataj ishqui runacuna chagracungami, shujca japi tucunga, shujca saquishca cangami— nircami.

³⁷ Chashna nijta uyashpaca: —Apu, ¿maipitaj chashnaca tucunga?— nijpi: —Huañushca siricunpimi, ullahuangacuna jundanga— nircami.