Juan 13 - Mushuj Testamento Diospaj Shimi

Yachacujcunapaj chaquicunatami Jesús maillashca

¹ Jesusca, cai pachamanta Yayapajman ña rina pajtashcata yacharcami. Chaimantami Pascua fiesta callarina ñaupa chishica, cai pachapi caj Paipajcunataca, ñaupaman cʼuyaj cashca shinallataj, tucuricama cʼuyashpa catishcata ricuchisha nirca.

² Ñami micushpa tiyacurcacuna. Diabloca ñaupamanmi, Simonpaj churi Judas Iscariotepaj shungupica, Jesusta japichina yuyaita churashca carca.

³ Jesusca, tucui imalla tiyajta Yaya Paipaj maquipi churashcata yacharcami. Shinallataj Diospajmanta shamushcamantaca, Diospajllamantaj tigrana tucushcatapish yacharcami.

⁴ Chaimantami Jesusca micucushcamanta jatarishpa, jahua churanata llujshichirishpa, chaquichina linsota changallirca.

⁵ Chaimantaca shuj capachopi yacuta churashpami, yachacujcunapaj chaquicunata huashan maillashpa, changallishca linsohuanca chaquichirca.

⁶ Ña Simón Pedropaj chaquicunata maillanaman cʼuchuyajpica, paica: —Apunchij Jesús, ¿maitataj Canca ñuca chaquicunata maillanguiari?— nircami.

⁷ Chashna nijpi Jesusca: —Ñuca cashna rurashcataca, cunanca mana entendinguichu. Ashtahuanpish qʼuipatamari entendingui— nircami.

⁸ Shina nijpi, Pedroca: —Ñuca chaquicunatatajca, manataj maillanguichu— nijpi Jesusca: —Ñucaman mana maillachishpaca, Ñucahuanca imata mana charinguichu— nircami.

⁹ Shina nijpi, Simón Pedroca: —Apunchij Jesús, shinashpaca ama chaquicunallata maillahuaichu, maquicunandij, umandij armachihuailla— nircami.

¹⁰ Chashna nijpi Jesusca: —Maijanpish ña armashca cashpaca, mana cutin armanchu, chaquicunallatami maillarin. Cancunaca, mana tucuicuna chuya cashpapish, ñamari chuya canguichij— nircami.

¹¹ Jesusca, pi Paita japichina cashcata yachashpami: “Mana tucuicuna chuya canguichijchu” nirca.

¹² Chaquicunata tucui maillashpaca, jahua churanata churarishpa, meźaman tigrashpa cutin tiyarishpami, paicunataca cashna nirca: —¿Imapaj Ñuca chashna rurashcataca yachanguichijchu?

¹³ Ñucata: Yachachij, Amo, nishpaca cancunaca allitamari ninguichij, chaillatajmari cani.

¹⁴ Ñucaca cancunapaj Amo, Yachachij cashpapish, cancunapaj chaquicunata maillanimi. Cancunapish chashnallatajmi caishuj chaishuj chaquicunata maillanacuna canguichij.

¹⁵ Cancunapish Ñuca rurashca shinallataj rurachunmi, chashnaca rurashpa ricuchini.

¹⁶ Servijca, mana amota yallichu. Mandashpa cachashcapish mana cachajtaca yallichu, chaica chashnatajmi.

¹⁷ Tucui caicunataca ñami yachanguichij. Cancuna cushi cangapajca, caicunata rurashpa catichijlla.

Judas japichinatami Jesús huillashca

¹⁸ Mana tucui cancunatachu chashna nini. Maijanllata Ñuca agllashcataca yachanimi. Dios Quillcachishcapi: “Ñucahuan tandata micujllatajmi, Ñucata pʼiñashpa huashaman jaitarca” nishcaca, pajtanatajmi can.

¹⁹ Ña chashna tucujpica Ñuca pi cashcata cancuna crichunmi, manaraj chashna tucujpi ñaupashpa huillacuni.

²⁰ Pipish Ñuca cachashcata chasquijca, Ñucatami chasquin. Pipish Ñucata chasquijca, ñucata Cachajtami chasquin, chaica chashnatajmari— nircami.

²¹ Chashna nishca qʼuipaca, Jesusca Paipaj espiritupi yallitaj llaquirishpami: —Cancunamanta shujmari Ñucataca japichinga, chaica chashnatajmari— nishpa huillarca.

²² Chashna nijpica yachacujcunaca, pita chashna nicushcata mana yachai tucushpami, mancharinacushpa, caishuj chaishuj ricunacurcacuna.

²³ Chashna nicujpica Jesús cʼuyashca yachacujmi, Paipi huancarishpa tiyacurca.

²⁴ Paitami Simón Pedroca, pita chashna nicushcata tapuchun señaschirca.

²⁵ Chashna rurajpi paica, Jesuspaj pechopi huancarishpami: —Apunchij Jesús, ¿pitagari?— nishpa tapurca.

²⁶ Chashna nijpi Jesusca: —Ñuca pimanmi tandata nuyuchishpa cuni, chaimari— nirca. Tandata nuyuchishpaca, Simonpaj churi Judas Iscariotemanmi curca.

²⁷ Chaita micushca, qʼuipami, Satanasca Judaspi yaicurca. Chaimantami Jesusca: —Can rurasha nicushcataca ña utca rurailla— nirca.

²⁸ Ashtahuanpish imata nishpa Jesús paita chashna nishcataca, meźapi tiyacujcunaca pi mana yacharcachu.

²⁹ Judasca cullquita huaquichijmi carca. Chaimantami maijancunaca, fiestapaj imallatapish randigrichun nishca canata, mana cashpaca huajchacunaman ashata cugrichun nishca canata yuyarcacuna.

³⁰ Judasca chai tandata micushcahuan, llujshishpa rircallami. Ñami tuta carca.

Jesusca Pedro Paita ‘Mana rijsinichu’ ninatami huillashca

³¹ Judas ña llujshishpa rijpimi, Jesusca cashna nirca: —Cunanmari Runa Aichayuj alli nishca cana chayamun. Taita Diostapish Ñucamantami alli ningacuna.

³² Taita Diosca, Paipaj Churi Ñucamantami alli nishca can. Chaimantami Ñucatapish Pai shinallataj alli nishcata ruragrin. Ñamari chaita ruragrin.

³³ Ñuca huahuacunalla, ña ashacamallami cancunahuan casha. Cunanca, cancunatapish judiocunata nishca shinallatajmi nini: Ñucataca mashcanguichijmi, shinapish Ñuca ricunmanca mana ri tucunguichijchu.

³⁴ Cancunataca manaraj mandashcatami mandashpa saquini: Caishuj chaishuj cʼuyanacuichij. Ima shinami Ñuca cʼuyarcani, chashnallataj cancunapish caishuj chaishuj cʼuyanacunguichij.

³⁵ Chashna caishuj chaishuj cʼuyanacujta ricushpami, tucuicuna cancunataca Ñuca yachacujcunataj cashcata rijsingacuna— nircami.

³⁶ Simón Pedroca, Jesustaca: —Apunchij Jesús, ¿maimantaj ricunguiari?— nircami. Shina nijpi Jesusca: —Ñuca ricunmanca, canca manaraj cati tucunguichu, qʼuipatami catimungui— nircami.

³⁷ Chaimantami Pedroca: —Apunchij Jesús, ¿imamantataj cunanllatajca, mana cati tucuni? Ñucaca Canmanta causaita cuna cajpipish, cushallami— nircami.

³⁸ Shina nijpi Jesusca: —¿Canca Ñucamanta causaita cunguimantajchu? Ashtahuanpish gallo manaraj cantajpimari Ñucataca, quimsa cutin, ‘Mana rijsinichu’ ningui, chashnatajmi rurangui.