Taitus 3 - DAWAN BÎLA AISKA

Lalukra nani nahki iwi kaia ba

¹ Uplikam nani kupia krauks, tâ bri nani ra bara wihta nani ra sin bawbia; baha nani bîla wali daukbia bara diara pain sât sât daukaia wilin nani kabia.

² Upla kumi nina ra sin saura aisi kabiara, sakuna kupia kumi lâka bri nani kabia bara upla wal asla uplika nani kabia, bara ai kupia swapnika ba upla sut ra latan mariki nani kabia.

³ Kan yawan pali na sin, pas piua sinskas nani kan bara Gâd bîla sin wali daukras. Yawan na aihka aimawahki tauki kan, bamna wan wîna brinka karna nani bara wan brinka dukia sât sât albika nani kata. Yawan na saurka lâka ra bara tuman lâka ra sin iwi kan upla wala nani mita misbara wan kaiki kan, bara pana yawan mita sin.

⁴ Sakuna, Gâd wan Sasakra ai kupia pihni bara ai latwanka lâka upla nani ra latan marikan ba ra,

⁵ witin swaki wan sakan. Baha ba lika yawan mita diara pain nani kra daukan tâwan lika apia, sakuna umpira wan kaikan ba mita. Sikbi wan sakan bâk witin mita swaki wan sakan, bara baha tânka ba lika, yawan na kli aisubi takan, bara Spirit Holikira mita rayaka raya wankan ba bâk sin.

⁶ Wan Sasakra Jisas Kraist bâk, Gâd Spirit Holikira aihwa pali ba wankan sa,

⁷ bara baku mika ai kupia yamnika ba mita, yawan na kasakkira wan kulkbia; bara baku sin raya ban kaia lâka wan kainara briaia ba, yawan bribia mata.

⁸ Naha na lika kasak pali sa, bamna yang want sna man ba naha dukia nani na ban ba kat aisi kama, bara baku mika Gâd ra kasak luki nani ba wark yamni nani baman dauki kabia. Naha diara nani na lika pain atia, bara upla nani ra hilp sa.

⁹ Sakuna blahwanka tanis nani, wan almukka nani sturka yari nani ba, Moses lâka tânka, unsaban nani bara aiklabanka nani ba, man lamara wapara. Baha diara nani ba bahki bara tânkas nani sa.

¹⁰ Upla kum mita serts ra dakwi takan lâka daukisa kaka, witin ba aima kumi, apia kaka aima wâl kupia krauks, bara bîlam walras sa kaka, kangbi sâks;

¹¹ kan baku man pat kaikisma baha waitnika ba warha takan sa, bara ai saurka mita pât ra dingkan sa.

Taitus ra kupia kraukanka nani

¹² Man ra Artemas, apia kaka Tíquico ba blikamna ba ra, trai muni Nicópolis ra bal ai kaiks, kan yang na kauhla piua ba bahara luaia wîri sa.

¹³ Zenas layar waitna ba, bara Apolos ba sin, man sip muni hilp muns, ai impakanka ba ban alki banhwi kabia dukiara, diara sut yabi, bara witin nani diara kumi sin luha kabia apia.

¹⁴ Bara wan uplika nani ba sin diara yamni ba dauki lan takbia, upla diara luha piua ra sin, witin nani mita hilp yabia, bara baku mika witin nani rayaka ba bahki lika kabia apia.

Prakaia lakula nani

¹⁵ Yang wal nani na sut mita, ai lakula mai blikisa. Kasak lukan lâka ra wan uplika nani ba, lakula wis. Gâd mita man nani sut ra yamni mai munbia.