Sofonías 2 - DAWAN BÎLA AISKA

¹ Upla swirkas nani, man nani aidrubi asla taks,

² rais kapan taya baku puhbi saki kau lap mai tikras ba ra; Dawan lawanka lapta pali ba man nani puramra kau balras ba ra, Dawan lawanka yua man nani ra mai alkras ba ra.

³ Bawikira nani sut tasba aiska ra, Dawan lâka bîla wali dauki nani sma ba, man nani sut Dawan ra pliks. Bawikira lâka ra, wapni lâka ra diara nani dauks, baku kra yukuwaika sâkma, Dawan lawanka yua ra.

Israel lamara iwi nani ba klala bribia

⁴ Gaza tawanka tara ba âpu daukbia, Ascalón sin sauhki tikan kabia, Asdod ra iwi uplika nani ba sin baha yua pali kangbi sakan kabia, bara Ecrón uplika nani lika, pliska wina sakan kabia.

⁵ ¡Creta uplika nani, kabu un ra iwi banhwisma ba, sarkam pali ai daukisa! Gâd bui man nani mai sauhki tikaia dukiara pat aisin sa: “¡Kenan, filisteo nani kuntrika, bâra iwi banhwisma ba sut mai sauhki âpu mai tikaisna!

⁶ Baha kuntrika aiska, kabu un ra ba twi tasbaya takbia, bara bahara sepad nani asla taki, ai sîpka nani klarka paski bâra kabia.”

⁷ Juda uplika nani baha yua pâtka ra pruras swak takan kabia nani ba, Dawan ai Gâdka, witin nani tâwan aimaki balbia bara ai kuntrika ba bribia, bara piua yamni ra witin nani dimbia. Bara bahara ai daiwra daknika nani ba kaiki tihmia ra Ascalón watla nani ra dimi yapi kabia.

^8-9 Karnika sut alki bri Dawanka, Israel Gâdka ba, naku aisisa: “Moab uplika nani mita upla nani swira dauki kan ba walri. Amón uplika nani mita sin saura muni kan ba kaiki, witin nani upliki nani ra swira daukan, upliki nani tasbaya ra iwi, witin nani tara takan. Yang raya ban sna bamna swer taki aisisna: Sodoma uplika ra dîa takan ba baku, Moab ra takaia, Amón uplika nani ra sin, Gomora ra dîa takan ba baku takbia. Kiaya nani pâwaika langnika bara sâl sakaia tasbaya sin takbia; plis kum ban kaia ra yakan takaskaia ba. Upliki nani pruras swak takan kabia nani ba, bal dukia nani ba brih, bâra ai tasbaya ra iwbia.”

¹⁰ Moab bara Amón wal sika naha ai mana bribia, Dawan uplika nani ra swira daukan bamna, bara Dawan uplika hilpka wal tara takan bamna, Dawan karnika aiska bri ba.

¹¹ Dawan ai lawanka ba witin nani ra marikbia. Ai tasbaya aiska ra gâd bahki nani bri ba sut slingbi tikbia, bara tasba bani ra, kî nani ra iwi uplika nani ba sin sut, Dawan ra baman mayunbia.

¹² ¡Etiopía uplika, man nani sin, Dawan sordka ra pruma!

¹³ Witin ai mihta yahbra tani mapara sakban kabia, Asiria sauhki tikaia, Ninibi tawanka ba sin âpu daukan kabia, tasba lâwan upla iwras baku daukbia.

¹⁴ Watla nani sut daiki tikan kabia, bara baha watlika ra, sîp daknika nani bahara dimbia, daiwan wail nani sâtka sut sin. Watla slingwanka ra, iskri nani, sikiski nani dimi yapi kabia, katauhkatauh nani sin windarka dusa ra uli katauhki kabia.

¹⁵ Baha tawanka sika aimayunan lâka ni pura luan sa, kan witin nani baman sa luki kan. Naha tasba ra, witin nani ai tasbaya uplika nani baku upla wala âpu sa luki kan. ¡Nahki upla âpu yakan pali swin ba, daiwan wail nani watla takan ba! Ansa piua ra witin lamak lui wabia ba ra, wasbi bara saura kulkan lâka wal ailal mariki kabia.