Sofonías 1 - DAWAN BÎLA AISKA

Dawan ai kupia sauhkbia ba yua

¹ Dawan naha bîla nani ba Sofonías ra aisin, Amón luhpia waitna Josías Juda kingka aimaki kan ba piua ra. Sofonías ba Cusí luhpia waitna, naha ba Guedalías luhpia, witinka lika Amarías luhpia, naha sin Ezequías luhpia.

² Dawan naha kasak aisisa: “Tasba ra diara nani bâra ba sut âpu pali daukaisna.

³ Upla, daiwan, piawira, bara inska nani sut sauhki tikamni, watawikira nani ba mina prukaika mangkamni bara tasba wina upla sut âpu daukamni.” Dawan naha kasak aisisa:

⁴ “Juda uplika nani mapara yang mihti sakbamni, Jerusalem ra iwi nani ba mapara sin. Baal gâdka kuninkira ba naha tasbaya wina diki sakamni, bara ai prîska nani nina ba sin.

⁵ Utla nani bahna ra uli, slilma nani ra ai pura suni ba, ai gâdka Milcom mawanra ai lula kriki ai pura suni ba bara yang nini ra sin swer taki ba sut sauhki tikamni.

⁶ Baha nani yang wina ilihwi taki ba, yang ra sin ai plikras hilpki sin makabras nani ba sut sauhki âpu tikamni.”

⁷ ¡Man nani, Dawan mawanra sâp bas, kan Dawan yua pat aula sa bamna! ¡Dawan ba sakripais kum daukaia pat ridi pali sa, bara paiwan uplika nani ba sin, Dawan lamara ridi daukan sa!

⁸ Dawan aisisa: “Baha sakripais daukaia yua ra, wihta nani ba, king luhpia waitna nani bara upla wala nani sut iwanka natka wala dauki nani ba, yang klala yabamni.

⁹ Baku sin baha nani dur purak pâli dimi nani ba, bara baha nani kunin aisi implikan dukia nani ni, ai dawanka watla banhki nani ba sin, klala yabamna baha yua ra.”

¹⁰ Dawan ba kasak aisisa: “Baha yua ra Jerusalem ra Inska Atkaia Getka ba wina upla nani ini hilp makabi kabia. Upla wala baha lamara iwi nani ba sin, ai pura mata inbia. Bara il bîla nani ba wina, diara nani kauhi binka tara taki ba wali kabia.

¹¹ ¡Ini, uhbi banhwi bas, tawan pîska pakni ra iwi banhwisma uplika nani ba, kan baha nani diara âiatkra sut ba prubia, baha nani sut lalah wal, diara kwahki wauhi atki ba sin!

¹² “Baha yua ra, yang lamp kum brih, Jerusalem uplika nani ba tilara pliki kaikamni. Baha uplika nani ai âuyapah pali taki ba klala yabamna, bara witin nani luki aisisa: ‘Dawan diara daukbia apia; ¡yamni sin apia, saura sin apia!’

¹³ Baha mita sika, ai dukia kukanka nani ba wal brih wabia, ai watla nani ba sin slingban kabia. Ai watla nani lika mâkbia, sakuna bahara iwbia apia; wain nasla nani sin daukbia apia, bara sin dibia apia.”

¹⁴ ¡Dawan yua tara aula ba, pat baila sa! ¡Pat klutka sa, baku sin isti pali aula! Dawan yua binka tara ba, saura, tahpla pali kabia, ¡kau kupia karnakira nani ba sin ini wini kabia!

¹⁵ Lawanka tara yua kum kabia, kupia wirha bara sari pali. Slingbi sauhkaia diara âpu kabia, tihmia tara pali aihwa baman kabia, kasbrika distika tihuka tara yua aimakbia.

¹⁶ Trumpit puhbi karna winaia yua kabia, tawan tara karna nani mâkan ba ra, tawer purara paskan ba mapara sin.

¹⁷ Dawan ba kasak aisisa: “Upla nani ra yang aihni munamna, nakras baku tauki kabia, kan witin nani maipara saura daukan bamna. Upla tâlia ba lî laiwi baku kabia, wîna tara ba daiwan tâskika baku pura-pura paski swin kabia.”

¹⁸ Dawan lawanka ba yua ra, upla silbar bara gul bri ba mita swaki sâkbia apia, kan Dawan kupia baiwanka pauta klauhan baku ba mita, kuntrika aiska ba âpu daukbia. ¡Tasba ra iwi nani ba sut, wan nakra klipan kumi ra âpu daukan kabia!