Smasmalkra 7 - DAWAN BÎLA AISKA

Tânka kau yamni nani ba tâura daukaia

¹ Kau yamni sa, wan nina pain mayunanka ba wihki, isint kîa painka ba wal. Kau yamni sa prura yua ba wihki, aisubi taki yua ba wal.

² Kau yamni sa, pruan kum bikaia waia ba wihki lilia pliska ra wih lilia briaia ba wal, kan prura ba sika upla sut yua tnata lâska ba bara raya nani ba, aitani sa sin ai kupia kraukaia.

³ Kau yamni sa inaia, kikaia ba wal, sip sa upla mawanra saura baku kaikaia, sakuna kupia ra lika yamnika yabisa.

⁴ Sinskira ba prura ra lukisa, sakuna sinskas nani ba, lilia takaia baman lukisa.

⁵ Kau yamni sa sinskira mita lawi dauki ba walaia wihki, sinskas nani mayunra ba wal.

⁶ Sinskas nani kikra ba, pauta klauhan kiaya ra ami bin ba baku sa, bara sin bahki baman sa.

⁷ Taiban lâka ba sinskira ra sauhkisa, bara sauhkanka lâka ba, ai daukanka natka ra sauhkisa.

⁸ Kau yamni sa, diara kum danh daukaia tâ krikaia ba wal. Kau yamni sa wan kupia alki takaskaia ba wihki wan kupia karna briaia ba wal.

⁹ Kupiam sauhkanka mita yarka mai brih wabiara, kan kupia sauhkanka ba, upla sinskas nani dukia sa.

¹⁰ Aima kumi sin makabi walpara, dîa kan piua luan ba kau yamni kan, baha makabi walanka ba, sinskira apia sa.

¹¹ Yamni bara hilp lâka kum sa, sins lâka briaia ba, naha tasba ra iwi uplika nani ra, baha purkara ai almukka nani prapatika kum wal auya sa kaka.

¹² Kan sins lâka ba, lalah wal baku wan kaina sunisa, sakuna sins lâka yamnika ba sika, sinskira nani ra rayaka yabisa.

¹³ Kasak pali kaiks, Gâd diara daukan ba: ¿ya sip sa witin warha daukan ba wapni daukaia?

¹⁴ Ahkia man ra diara yamni taki ba, baha yamnika wal liliam bas, sakuna saura takbia sa kaka, luki kaiks kumi bani ba dukiara, kan baha nani ba Gâd wina sa, kan upla sip ai dahra walbia apia, ai kainara dîa brih aula ba.

¹⁵ Naha nani sut na rayaki bahki na tilara kaikri, upla yamni nani pruisa, ai kupia yamnika brisa kuna, bara saurakira nani ai saurka ba tilara ban raya sa.

¹⁶ Yamni sma ba wina kau yamni kaia lukpara, baku sin sins brisma ba kau sinskira takaia lukpara. ¿Dîa muni silp tawi aisawaisma?

¹⁷ Saura wina kau saura kaia lukpara, baku sin sinskas lâka ba wina sin kau sinskas kapara. ¿Dîa dukiara piuam kau ba ra pruaia?

¹⁸ Kau yamni sa naha na dutki pali alkaia wan mihta alkan ba wina baha ba lanhkaia apia. Gâd ra kulki ba naha diara nani sut na wina pain takbia.

¹⁹ Sins lâka ba kau karnika yabisa, sinskira ra, wihta tara matawalsip tawan kum bilara ba wal.

²⁰ Ban sakuna tasba ra upla wapnikira kumi sin âpu sa, diara yamni baman piu sut ra dauki ba, bara aima kumi sin saura daukras ba.

²¹ Upla diara sut mai wi ba, bîla wali daukpara, bara man walma apia albikam ninamra aisi piua ra.

²² Baku ba ra, man sin kasak damra walisma aima ailal ra, man sin uplikam dukiara saura aisaram ba.

Sins lâka plikanka ba

²³ Naha nani sut na, sins lâka wal laki kaikri, sinskira kaia ai daukan; sakuna yang alkaia ba wina laihura kan.

²⁴ ¡Yang alkaia sna ba wina laihura baman sa, diara nani sut naha tasba ra ba! ¡Tihu pali sa, upla kumi sin tânka bribia apia!

²⁵ Bara yang sins lâka plikri, diara tânka briaia sin, bara stadi munaia bara plikaia sins tânka kum wal prakaia. Bara daihra walri sinskas kaia ba yamni apia sa, sinskas kaia ba saura pali sa.

²⁶ Diara kum wal prawri ba prura wal kau tahpla sa: mairin ai kupia wal warbanka dauki ba, bara ai klahkla wal wilki bri ba. Dawan kupia lâka uplika nani baha wina swakbia saurakira nani ba ai sînka bilara kauhbia.

²⁷ Yang trai muni plikisna diara nani ba dîa muni daukaia ba.

²⁸ Yang, Smasmalkra sna ba, naha ni pliki sakri sa, kan yang plikisna pali ba dukia wal prawras. Tausin tila wina waitna kumi sakri sa, sakuna baha sut tila wina mairin kumi sin sakras.

²⁹ Naha baman yang sakri sa: Gâd ba upla ra kasak pain paskan sa, sakuna witin ai rayaka ba sauhkan sa.