Smasmalkra 6 - DAWAN BÎLA AISKA

¹ Naha tasba ra saurka wala kum upla sut tilara kaikisna ba sika:

² Gâd mita kukanka yabisa, yamni kaia lâka, kulkanka lâka sin, bara diara nitka bri ba luha apia kabia; sakuna baha wina brih ai âuyapah kaia yabras, upla wala ni liliaka ba brisa. ¡Naha sut ba bahki baman sa, kasak pali naha ba sari lâka sa!

³ Upla kum handat luhpa briaia sip sa, bara mani ailal raya kabia, sakuna piua ailal iwbia kra, ai lilia tara briras kaka, bara sin bikras sa kabia kaka, yang wisni kau yamni sa, luhpa prui takan ba, baha uplika ba wal.

⁴ Kan ban kra baha tuktika ba sainka tiwbia, tihmu tara tilara, bahara ai nina ba âuya tiwan kabia,

⁵ bara sin wan yu laptika kaikras kra kabia, kakaira sin takras kabia, kuna kau ris brin kabia wala ba wal.

⁶ Kan witin nani 2,000 mani kau iwan kaia sip sa, sakuna ai dukia kukan wal âuyapah bribia apia, ¡bara tnata ra sut pali ba sim pliska ra auya!

⁷ Upla ba kasak wark takisa plun piaia dukiara, sakuna sip ai âuyapah bribia apia.

⁸ ¿Dîa aihka brisa sinskira ba, tanis lâka âpu kaia ba, ai sinska lâka baman rayaka na mawanra bapi buaia?

⁹ Kau kanra tara sa, diara wan nakra ni kaiki ba wihki wan lukanka ra bri ba wal; sakuna naha pali na sin bahki man sa, sim pâsa ra alkan dauki ba baku sa.

¹⁰ Nanara diara nani bâra ba, kan piua wina nina nani yan sa, bara sin nu sa dîa ba; upla kum ba sip aiklabras sa, witin wal kau karna ba wal.

¹¹ Diara kum kasak sa: anira sturi ailal aisinka bâra ba pliska ra, bahki lâka manis bâra sa, bara diara kumi sin sip sakras baha wal.

¹² Ya kaikisa, dîa kau yamni kabia upla ba dukiara, ai yua bahki nani kulki baman bri ba tilara, baha ba wan rayaka sa. Ai yua nani ba dista baku lui auya, ¿ya sip sa wiaia, naha tasba ra witin prubia ningkara diara takaia ba?