Smasmalkra 4 - DAWAN BÎLA AISKA

¹ Ningkara yang lukanki ba, naha tasba ra taiban lâka nani dauki ba ra aman pali mangkri, bara kaikri taiban lâka mununhtara nani ba, inisa, kuna upla kumi sin âpu baha maisa nihkaia; bara tataibra nani ba bui kau pali karna munisa kuna maisa nanihkra nani lika âpu.

² Bara yang wîri, kau lilia sa baha nani pat pruan ba, kau rayaka bri nani ba wal.

³ Ban sin naha nani wâlsut ba, yamni pali iwi kabia, kau aisubi takras nani ba, baha nani kau kaikras sa naha tasba ra saurka nani dauki ba.

⁴ Kaikri wark ailal takaia ba, bara nahki taki ba, bisnis uplika kum wala ra tuman lâka brih aula, bara baha sin bahki sa, pâsa ra alkaia baku.

⁵ Upla wisa: “Taniskira ai mihta kruski brisa bara ai wîna ra sauhkisa.”

⁶ Sakuna yang wisni: “Kanra yamni sa, ris prahni kum briaia ba bara swapan pali takaia, pâsa ra alkaia trabil taki ba baku.”

⁷ Tani wala ra tawi kaikri ba ra, diara bahki wala kaikri naha tasba ra.

⁸ Upla yakan ba, ai uplika âpu, ai luhpia âpu, ai muihni sin âpu ba, sip ris briras; ai dukia kukan bara lukan baman sip swapras, bara makabi sin walras: “¿Bara ya dukiara wark uya takisna? ¿Dîa kan wan wîna yamni briaia dukia apia wisna?” Kan naha na sin lukanka bahki sa bara karbanka wirha kum sa.

Asla ba karnika brisa

⁹ Kau yamni sa wâl ba wihki kumi ba wal, kan ai warkka ba mana kau yamnika sâkbia bamna.

¹⁰ Witin nani kumika ba kauhisa kaka bara wala ba mita bukisa. ¡Sakuna alai kabia yakan ba kauhisa kaka, upla wala âpu, ya witin ra bukaia!

¹¹ Baha purkara, upla wâl krikri ra prawbia kaka, pana pana ai laptika bribia, ¿sakuna yakan kaka nahki lapta takbia?

¹² Upla kumi ra sip sa pura luaia, sakuna upla wâl ra sip mapara buras. Baku sin trit awa yumhpa ba ban pali dakbia apia.

Wahma ba almuk ba mita apia sika sinskira ba

¹³ Kau kanra yamni sa, wahma kum umpira sakuna sinskira ba wihki king almuk kum tanis, upla smalkan walras ba wal.

^14-15 Ban sin wahma ba, naika baha kingka watlika ra, king aimakbia ba, silak watla wina king iwaika kat balan kra, apia kaka umpira ba wina king lâka ra ulan kan, kaikri naha tasba uplika nani bui tâ baikanka yan ba.

¹⁶ Baha upla ailalka sip kulki sakras ba, witin baha nani purara king aimakbia; sakuna baha nani, bara kiamka nani ba sin ai âuyapah kabia apia, witin wal. Baha sut ba bahki baman sa, bara pâsa ra alkaia brin dauki baku sa.