Smasmalkra 3 - DAWAN BÎLA AISKA

Diara sut ai piua brisa

¹ Naha tasba ra diara sut ai piua brisa, diara sut ba ai piua kat takisa:

² Aisubaia piua bâra sa, pruaia piua sin. Mangkaia piua bâra sa, mangkan ba dâkaia piua sin.

³ Ikaia piua bâra sa, rakaia piua sin bâra sa. Sauhki tikaia piua bâra sa, bara paskaia piua sin bâra sa.

⁴ Inaia piua bâra sa, kikaia piua sin bâra sa. Sari briaia piua bâra sa, lilia yua sin bâra sa.

⁵ Walpa aihka aihka sakaia piua bâra sa, walpa wahbaia piua sin bâra sa. Klubi alkaia piua bâra sa, dakwi takaia piua sin bâra sa.

⁶ Trai muni daukaia piua bâra sa, daukras kaia piua bâra sa. Suni briaia piua bâra sa, lulkaia piua sin bâra sa.

⁷ Kalkaia piua bâra sa, sipaia piua sin bâra sa. Sâp kaia piua bâra sa, aisaia piua sin bâra sa.

⁸ Latwan kaikaia piua bâra sa, misbara kaikaia piua sin. War piua sin bâra sa, kupia kumi kaia lâka sin bâra sa.

⁹ ¿Upla ba dîa yamnika bribia, wark ailal taki ba wina?

¹⁰ Daira walisni, Gâd bui karban upla ra yabisa, baha wal witin ra yus kaia dukiara.

¹¹ Witin mita piua kat diara sut pranakira yamni daukan; upla kupia lukanka ra mangkan diara tnata âpu ba tânka, upla ai tânka sip briras sakuna, Gâd diara tara daukan ba, baku sin kau daukaia ba.

¹² Yang daira walisni, upla ba kau kanra yamni daukaia ba; lilia taki bara yamni kabia ba ai rayaka ra.

¹³ Baku bamna yawan pibia, dibia bara wan mihta warkka daukan nani ba kaikisa kaka, baha ba Gâd wankan sa.

¹⁴ Baku sin kaikisni, Gâd diara sut daukan ba ban kaia ra ba kabia. Baha sin kau pura prakras, bara dakbi sin sakras; Gâd ba baku daukan sa, bahara kaiki upla witin ra kulkbia dukiara.

¹⁵ Diara kumi sin âpu sa, kainara âpu kan ba, bara diara kumi sin bâra kabia apia pat diara bâra ba wina. Gâd daukisa luan ba kli yarka takbia dîa kan ba baku.

Rayaka kasak apia ba

¹⁶ Yang kaikaia sip kapri, naha tasba ra sauhki tikaia lâka bara saura daukaia nani ba uba sa, bara lâ kasak wapni nani ba bâra kaia sa.

¹⁷ Baku bamna, Gâd kasakkira nani lâka daukbia, saura dadaukra nani lâka sin, kan diara sut taki ba ai piua brisa, bara baha dauki ba dukiara sin.

¹⁸ Baku sin wisni, upla daukanka ba dukiara, Gâd mita upla nani traika kaikisa, ai tânka bribia, witin nani ba, daiwan baku sa.

¹⁹ Kan kasakka ba upla bara daiwan wal dîa takaia kan ba kumi sa, bara wala ba sin wâlsut pruisa; kan raya ba wingka puhbra sut sin brisa upla kau tara apia daiwan ba wâlsut ba bahki, bahki pali man sa.

²⁰ Sut plis kumi ra buisa; sut ba tasba yuya ni wan paskan, bara kli tasba yuya ra tawbia.

²¹ ¿Ya sip sa kaikaia upla spiritka ba kasbrika purara ulisa, bara daiwan piritka ba tasba mununhtara auya?

²² Yang daira walri, upla ba diara kau yamni âpu sa, ai warkka wina ai liliaka briaia ba; baha ba witin ra baku takan sa, kan witin ra, upla kumi bui sin brih balbia apia sa, witin pruan ningkara dîa dîa nani bal takbia ba kaikaia.