Smasmalkra 2 - DAWAN BÎLA AISKA

¹ Baku sin kupi wal aisari: “Nanara trai munamni, yang lilia kaia; bara sin lilia briaia rayaki ra”, baha sut ba bahki baman takan.

² Bara yang kikaia wîri baha sin sinskas lâka sa, bara lilia lâka ba sin bahki sa.

³ Kupi ba sins lâka tihuka ni aibanhwan, wain laya ba diaia munri bara wîni aiska bahara yâri; kaikri upla ba baha plikisa sapa ai piua kunhku bri ba tilara.

⁴ Wark tara nani daukri, king watla nani sin paskri, wainki nasla nani sin briri.

⁵ Dusi mâ nani mangkaia giadinka sin paskri, bara bahara dus mâira mangkaia sâtka sut ba mangkri.

⁶ Lî alkaia watla nani sin paskri, insla mangkri ba lî laikaia dukiara.

⁷ Alba waitna bara alba mairin nani atkri purkara duki daukaika nani waitla ra aisubi takan nani briri, bara bîp ailal, sîp ailal sin briri, yang kainira Jerusalem ra iwi kan nani ba purkara.

⁸ Gul bara silbar, yang ailal kuki briri, baha ba kainara king wala nani dukia kan, bara tasba tara wala nani sin. Aiwawanra waitna, mairin sin briri, upla kira lilia takaia lâka briri, bara lili mairin nani ailal, ailal sin briri.

⁹ Upla tara kum kapri bara diara ailal briri, Jerusalem ra king nani kanra bâra kan ba wal kau purkara diara nani briri. Baha purkara sins lâka ba ai lulki swiras kan.

¹⁰ Brinka kumi ra apia wiras kapri; lilia lâka kumi ra sin apia wiras kapri, kupi aiska briri warkki nani sut ra; baha liliaka ba yang maina kan.

¹¹ Ningkara yang mihti warkka nani sut ba kulki kaikri, nahki karna ai munan ba, baha sut daukaia, bara tânka briri baha sut ba bahki baman ba, pâsa ra alkaia baku praiska, bara naha tasba ra diara yamni kum wina hilp briaia âpu sa.

¹² Ningkara yang sins lâka ba dukiara luki kaikri, sinskas lâka bara brinka lâka ba sin: ¿Dîa sip kau daukbia, yang ningkira king aimakbia ba, kan baha pat kanra daukan sa?

¹³ Bara yang kaikri sins lâka ba kau tara sa, tanis lâka ba wal, ingni ba kau yamni sa tihmia tara ba wal.

¹⁴ Sinskira ba ai nakra nani pain diara kaikisa, sakuna taniskira nani ba tihmia ra wataukisa. Ban sakuna tâinka briri, sut ra sim baku bîla kaikisa.

¹⁵ Bara yang kupi ra wîri: “Taniskira bîla kaiki ba, yang ra sin bîli kaikisa, baku ba ra sins lâka ailal ba yang ra bahki sa. ¡Baha nani sut sin bahki!

¹⁶ Kan upla kumi sin sinskira bara taniskira dukiara ai kupia kraukbia apia, piua nani lui auya ba wâlsut ai âuya tikisa, kan sinskira nani bara taniskira nani ba, wâlsut sim baku pruisa.”

¹⁷ Raya kaia ba ra misbara kaikri, kan diara nani sut naha tasba ra dauki ba, maipara sa. Kasak pali baha sut ba bahki man sa, ¡pâsa ra alkaia baku sa!

¹⁸ Tasba ra wark nani daukatna ba sut misbara kaikri, baha nani sut swiaia sna yang waitlika ra aula uplika ba ra.

¹⁹ Bara diara kum kasak ba lika: witin ba sinskira, apia taniskira kabia kra, yang naha tasba ra diara nani briri ba, sins lâka nani wal baku sin wark karna taki ni, baha sut ba dawanka takbia. ¡Bara naha sin bahki baman sa!

²⁰ Naha tasba ra diara daukri ba sut kaikri ba ra, karna inri wark uya takri ba dukiara.

²¹ Upla nani bâra sa ai warkka ra mangkisa sinska lâka nani, diara tânka nu ba, bara diara lan takan sinska lâka ba, ningkara upla wala kum warkka daukras uplika ra laki yabaia dukiara bribia wisi. ¡Naha sin bahki man sa, bara lâ kasak pali apia sa!

²² ¿Tnata piua ra upla ba dîa brisa uya wark taki bara naha tasba ra sin uya luki kaia ba?

²³ Ai yua nani sut ba pât wahwaia baman sa, wirhika kum wan kupia ra turbanka munisa; tihmia kat sin ai kupia lukanka ba ris briras sa. ¡Bara naha na sin bahki man sa!

²⁴ Upla ba diara kau yamni daukaia ba sika piaia bara diaia, bara ai rayaka ba lilia daukbia ai warkka mâ nani ba wal, baku sin kaikri, naha ba Gâd mihta wina sa.

²⁵ Kan, ¿ya pali ba sip sa piaia, bara ai liliaka sin bribia Gâd wina apia kaka?

²⁶ Baku bamna Gâd sins lâka yabisa, diara tânka briaia lâka; bara ai liliaka sin, yaura witin yamni luki uplika ra; sakuna saura dadaukra ra yabisa wahbi kukaia, ningkara ani uplika Dawan yamni kaiki ra yabisa; baku sin baha ba bahki baman sa, pâsa ra alkaia baku pitka.