Smasmalkra 12 - DAWAN BÎLA AISKA

¹ Man kau wahma bara tiara sma ba yua nani ra, Papaskrikam ra kupiam krauki bas, kau piua saura mai alkras ba ra; mankam nani balbia bara wima: “Baha wal liliaka kumi sin briras kapri.”

² Nanara dauks, wan yu ingnika, kati bara slilma nani tihmia takras bara kau kasbrika bâra sa, lî auhan ba ningkara.

³ Piua kum balbia king watla main kakaira ba, dusa tatatwan kabia, bara kupia karnira ba kauhan kabia; akbaia walpa nani kulki baman takaskbia, bara akbras swibia; windarku kaiki nani ba, mahka kaikras takbia.

⁴ Baha yua balbia ba ra, lata durka ba prakbia, akbaia walpaya binka ba âpu takbia; piawira nani ai lawana swika walbia, sakuna lâwanka ba sut kli walras takbia.

⁵ Purara ba mita sibrin daukbia, bara yabal ra ba pât nani bâra kabia. Amans dusa ba mahka tangnika baiwbia, tristrisia ba pât bribia, karnikam ba tiwbia, sip diara daukras kama. Bara upla ba lika ai watla ban kaia ra auya, bara yabal ra ini yahwi kabia pruan ba dukiara.

⁶ Kupiam krauks Papaskrikam ra nanara kau silbarkam awa aisawras ba ra, baku sin gulkam awa dakwi yuya baman takras ba ra, nanara kau sumika yuya man takras lî aubi ba, lamara sa, liwanhta sin klang lâwras ba ra.

⁷ Baha ningkara tasba yuya ba tasba ra tawbia patitara kata baku, ban spiritka ba lika Gâd ra wabia, baha ba witin mita yan bamna.

⁸ Yang, Smasmalkra ba, kli aisisni: ¡Brinka bahki baman, brinka bahki baman! ¡Sut ba bahki baman!

Prakaia ra aisanka ba

⁹ Smasmalkra ba kau sinskira takan bara kau diara tânka kaikaia lâka upla ra smalki kan, baku sin wark tara brin, sins lâka stadi munaia, bara mahka ai tânka kat wapnika mangkan.

¹⁰ Dîa sip pali ba kat daukan bîla nani tânka ba kaikaia, bîla tânka aisinka nani ba kat kasak ulbaia.

¹¹ Sinskira nani aisinka ba silak baku wan sabisa, bara aima kumi asla taki wahbi bara dus kakma tatwa ni sabi ba baku wan sabisa; baha ba sîp main kakaira kumi baman mita saban baku sa.

¹² Baha nani wina yawan saki ba, smalkanka tara nani baman, wauhtaya ailal ulbaia ba tnata âpu, ailal stadi muni ba wan swapkisa.

¹³ Smalkanka ba tnata alkan sa. Pat diara sut win sa, Gâd ra kulks bara ai lâka nani ba dauks, kan baha ba upla sut daukaia sa.

¹⁴ Gâd wan daukanka nani sut ba lâka daukbia, pain daukan, apia kaka saura daukan ba, bara dîa yukuwan ra daukan ba sin.