Smasmalkra 11 - DAWAN BÎLA AISKA

¹ Patam ba liura lulks; baha ningkara piu kum lubia ra wal prawma.

² Dîa brisma ba sip sma ba kat yui bas, kan man kaikras dîa saura kuntrikam ra aula ba.

³ Kasbrika ba lî banhwan sa kaka, laya ba tasba purara auhbia. Dus ba yahbra ra kauhras, apia kaka waupasa ra kauhbia, anira kauhbia ba ra, baha kat takaskbia.

⁴ Pâsa ra kaiki ba sip mâ mangkras, bara kasbrika ra kaiki ba sin mâ sip krikras.

⁵ Pâsa ba anira auya man sip kaikras sma baku, sim tuktan ai yapti biara ra aipaswi ba baku, man lika Gâd diara dauki ba kaikras sma, witin diara sut papaskra ba.

⁶ Saumukkam mâ ba titan ra mangks, bara tutni ra sin mangks, kan man kaikras ani ba yamni takaia ba, tâura, apia ningkara mangkram ba wal, apia kaka wâlsut pâwan kabia.

⁷ Yu ingnika ba pain pali sa, bara yamni sa wan nakra ba lapta ra kaikaia.

⁸ Sakuna upla nani ba mani ailal raya iwi kra baha liliaka sut bribia, ai kupia kraukbia tihmia yua nani ba ailal kabia, bara diara nani sut aula ba bahki baman sa.

Wahma nani ra kupia kraukanka

⁹ Liliam bri bas wahma bara tiara nani, man kau wahma sma ba ra, tiara sma ba ra; man sip sma ba ra diara pain ba lihki bas. Swis kupiam brinka mita mai bri wabia bara dîa sut kaikma ba wal, kuna kupiam krauki bas baha nani sut ba Gâd mita lâmka daukbia.

¹⁰ Kupiam ra trabil taki lukisma ba sut swis, bara pât wahwisma ba lulki swis, kan man wahma bara tiara sma yuam yamni ba, sut bahki man sa.