Smasmalkra 10 - DAWAN BÎLA AISKA

¹ Kukas pruan kum ba bisbaya sa bara kîa pain ra sauhkisa. Sinskas lâka nani isti ba dukiara kau aisisa, sins lâka kulkanka kau bri ba wal.

² Sinskira lukanka ba pain lâka ra tniwisa, sakuna sinskas nani lukra ba saura ra man tniwisa.

³ Sinskas ba, diara sut dauki ba ra marikisa, ai lukanka nani ba umpira sa, ban aisi wabia ba ra, sinskas nani ba baha wala nani sa.

⁴ Wihta aimaki ba man wal ai kupia baikbia sa kaka, man kupiam sauhkpara; upla nani swakwanka tara ba saika sika, diara nani ba tânkira daukaia ba.

⁵ Tânka briri swakwanka kum naha tasba ra dauki ba plamaika ba, wihta aimaki nani ba wina bal takisa.

⁶ Sinskas nani ra wark tara daukaia yabisa, bara upla kau tara ba wark bahki ba yabisa.

⁷ Yang kaikri alba nani ba aras ra uli wataukisa, bara king luhpia waitna nani ba, ai mina wapi taukisa, alba kan baku.

⁸ Ya unta dauki ba, bahara kauhisa. Ya kutbanka kriki ba, piuta mita samisa.

⁹ Ya walpa warkka taki ba, baha wal latwan brisa. Ya pauta baiki ba, sip sa baha wal insauhkaia.

¹⁰ Asa ba malika tiwbia, bara kli mala daukras sa kaka, karna tâm baiki klakaia sma. Kau yamni sa diara nani ba pain daukaia, bara sins lâka ra daukaia.

¹¹ ¿Dîa hilp sa ki, piuta âialkra ba, piuta ba bui kau yabakras kan tawi sami ba?

¹² Sinskira bîla aisanka nani ba, upla pain walisa, sakuna sinskas aisanka ba ai wîna ra sauhkisa:

¹³ mahka aisisa ba ra, sinskas sturka man aisisa; kau aisi auya ba ra, kau sturi tanis aisisa.

¹⁴ Sinskas ra sturi aisaia ba danh takras sa. ¿Ya sip sa wiaia dîa takaia ba, upla kumi sin nu âpu sa wan kanra dîa takaia ba?

¹⁵ Sinskas ba wark taki dring pruisa, tawan ra waia yabalka kat sin kaikras.

¹⁶ ¡Alai kabia ani kuntrika, tuktan kum king mangki bri ba, bara king luhpia nani ba sihkru dauki lalalwisa!

¹⁷ ¡Lilia pali sa, ani kuntrika king kulkanka bri kan mangki bri ba, bara tawan wihtka nani sin ai piu kat plun pîsa, ai karnika briaia dukiara bara bla takaia dukiara lika apia!

¹⁸ Sringwaskira watla bahna ba kauhisa; ai watla aiska ra diara daukras ba.

¹⁹ Plun ba lilia piaia dukia sa bara wain ba sin, rayaka ra lilia yaia dukiara sa, sakuna baha dukiara lalah âpu sa.

²⁰ King dahra aisapara, lukankam wal sin apia. Yuyakira dahra saura aisapara, yakan kama sin, kan piawira nani ba pâlisa bara sip sa wih wiaia.