Sins Lâka 3 - DAWAN BÎLA AISKA

Kupia kraukanka nani sins lâka briaia dukiara

¹ Luhpi waitna, smalkanki nani ba âmya tiwbiara; bara kupiam ra yarka lâika bîla nani ba alki yamni bribia,

² bara rayaka kum yari brima bara kupia kumi lâka manis kira ni.

³ Latwan lâka ba lulki swipara bara kasakka diara rait ba sin; lilura awa baku man brih tauks, sinskam ra ulbi bris,

⁴ baku bamna, Dawan bara upla nakra ra kupia yamni lâka, aitani kulkan lâka sâkma.

⁵ Dawan ra kupiam aiska ni kasak luki bas, bara man sinskam lâka ba kat tniwi kapara.

⁶ Diara daukisma nani sut ra, Dawan ba tâmra bri bas, bara witin mai brih wabia yabal wapni bâk.

⁷ Man ba sinskira pali sma lukpara; Dawan ra kulkanka yas, bara saura ba wina mahka tawi was,

⁸ baha sika wînam tara saika kau pain ba, wînam tara ra sin karna mai sakaia sip ba.

⁹ Dawan ra kulkanka yas man yuyakam nani ba wal, dusam mâ tawahkia nani sut ba wal sin.

¹⁰ Baku lika aibanhbia pura lui kira, patam watla bara wainkam auhbaia watla nani ba sin.

¹¹ Luhpi, Dawan bui klala maiki ba, man bahki baku kulkpara, man sin lawi mai dauki ba ra bahki kulkpara.

¹² Kan ani uplika ra Dawan mita latwan kaiki ba, witin smalki lawi daukisa, sim aisa kum ai luhpia ra yamni kaiki naku wapni daukaia muni ba baku.

¹³ Lilia sa sins lâka pliki saki uplika ba, diara tânka alki latan kaiki uplika ba sin,

¹⁴ kan baha sinska lâka pliki kukaia ba, kanra yamni sa silbar kukaia ba wal; baha sinska lâka pura praki briaia ba, gul pain wal kau manakira sika.

¹⁵ Baha sinska ba lika, walpa klauhira nani wal kau manakira sa; bara dîa dîa sut brin mai dauki ba, baha wal prakaia sip apia sa.

¹⁶ Mihta aihkika ba yua nani yari wankisa; bara smihka ba lika, yuya bara kulkanka lâka wankisa.

¹⁷ Man minam taibanka nina blikaia ba painkira pali sa; man yabalkam nani ra taukaia ba sika kupia kumi ra iwaia kaia.

¹⁸ Sins lâka ba, rayaka lâka sa ya baha bri ba; ¡dutki bri alki uplika nani ba, lilia pali sa!

¹⁹ Dawan sins lâka bara diara daukaia smatka ni, kasbrika bara tasba ba sin paskan;

²⁰ ai sinska lâka ni daukan kabu ba baiwi takan kaia, bara kasbrika nani ba wina sin diwas laya tahwi ba.

²¹ Luhpi, piu bani wapni lâka ba alki bas, âuya mâira lâka ba namkra wina lap tiwbiara.

²² Baha nani man mampara lî kârma rayaka baku kabia namna ra mai sakahkaia lilura awa kum baku.

²³ Bâra mika yabalkam ra âuyapah kainam kat tauki kama, bara minam sin pruki kama apia ban kaia ra.

²⁴ Man ris brima taim sibrin mai daukbia apia; man aitnikma ba ra, âmyapah pali yapma.

²⁵ Sirang tara, wan dara walras pât aula ba sibrinka ra lukpara, upla watawi nani purara sauhki tikaia lâka aula ba dukiara sin apia.

²⁶ Kan Dawan mita âmyapah maikbia, witin kat lukaia bara minam alkaika wina dakbi mai sâkbia kauhma ra kra sîa.

²⁷ Man ra makabi ba yaia apia wipara, baha daukaia man mihtam ra diara brisma ba ra ani piua ra man mihtam ra brisma yamni daukaia ba.

²⁸ Yauhka dukiara swipara hilpka lâka naiwa yabaia sip sma ba ra.

²⁹ Saura daukaia lukisma ba daukpara, man ra kasak luki iwi ba mapara.

³⁰ Upla wal unsabaia plikpara, upla kumi sin saura mai munras sa kaka.

³¹ Upla kupias nani ra tumpara, witin dauki ba tnata luki sin daukaia lukpara.

³² Dawan watawikira nani ra waihla kaikisa, kuna pain nani ra ai kupia aiska kulkisa.

³³ Dawan upla watawikira watla ba saura lakisa, sakuna kasakkira nani watla ba yamni munisa,

³⁴ Upla lawaska kakikra ra Dawan mita lawaska kikisa, sakuna bawikira nani ra kupia yamni lâka yabisa.

³⁵ Sinskira nani lika kulkanka lâka ba ai dukia bribia, sakuna taniskira nani ba ai swira tara lâka baman ai pura lui tawbia.