Sakaraya 8 - DAWAN BÎLA AISKA

Gâd pramiska nani

¹ Dawan, karnika sut bri ba, naha bîla nani na aisaia ai win:

² “Yang Dawan, karnika sut alki brisna, naha bîla nani na aisisna: Saion ki tâwan lawisna, bamna karna lawisna.

³ Yang kli Jerusalem ra waia sna bahara iwaia. Bara tawanki nina ba Tawan Kasakkira mâkan kabia, Dawan, karnika sut bri ba ilka nina ba Holikira mâkan kabia.

⁴ Dama nani, kuka nani ba sin ai dusa brih wapi tauki ba, tawan tara watla latka nani ra iwi kabia, witin nani almuk pali takan bamna.

⁵ Tuktan waitna, tuktan mairin nani ailal tawan yabalka ra puli banhwi kabia.

⁶ Naha sut aisisna, baha piua kat baku takaia sip apia lukisa upliki nani, kau raya nani ba lukanka ra bâra bamna, sakuna yang maipara sip apia ba âpu sa. Yang Dawan, karnika sut brisna, kasak aisisna:

⁷ Yang bui upliki nani ba pri daukamni, lalma kuntrika, muna kuntrika uplika nani karnika ba wina,

⁸ bara Jerusalem kat brih wamna bahara iwbia wisi. Baku ba ra witin nani ba yang upliki kabia, bara yang lika ai Gâdka kamna, kasakka lâka ra bara lâ wapni daukaia lâka ra sin.”

⁹ Dawan, karnika sut bri ba, naku aisisa: “Man nani, Dawan karnika sut bri ba tempelka kli mâkaia karna bûi bas; naha yua prapit nani dîa aisi ba walan sa, Dawan watla playka nani bapan ba dukiara.

¹⁰ Naha piua kat upla nani mana bara daiwan nani mana aibapaia diara âpu sa. Waihla bâra ba mita, upla nani tilara kupia kumi lâka sin âpu sa, kan yang mita daukri upla nani ba pana pana mapara saura kaia.

¹¹ Sakuna nanara naha uplika nani na tila wina kau raya kabia ba, kaina piua ra, yang bui witin nani wal daukatna ba baku kli daukaia apia sna. Yang Dawan, karnika sut brisna, kasak aisisna.

¹² Kan kupia kumi lâka ba, witin nani tilara mangkan kabia. Wain kiwka nani, ai mâ alkan kabia; tasba wina sin plun pâwi kabia; kasbrika wina sin diwas laya yabia. Upliki nani kau raya banhwi nani ba ra naha sut na ai dukia kaia yabamna.

¹³ Juda bara Israel luhpia nani, man nani nisan nani tilara mai lahtuban uplika nani kapram, baku sin nanara, yang bui man nani sut sma ba swaki mai saki yamni mai munan uplika nani mai daukamna. ¡Sakuna man nani si bripara! ¡Man nani karna bûi bas!”

¹⁴ Dawan, karnika sut bri ba, naku aisisa: “Damikam nani kupi baikan bara klala yabaia lukri ba, kupi lakras ban daukri.

¹⁵ Ban sakuna, nanara Jerusalem bara Juda uplika nani ra, yang diara yamni daukaisna. Bahamna, man nani si bripara.

¹⁶ Naha sika man nani piu bani dauki kaia sma: Piu bani pana pana sturi kasak ba aisi kama, lâ daukaia watla nani ra kupia kumi lâka bukaia dukiara, lâ aisi dauki bas;

¹⁷ bara pana pana saura munpara, swer taki kunin aisapara. Kan baha sut yang misbara kaikisna. Yang, Dawan, kasak aisisna.”

¹⁸ Dawan karnika sut bri ba mita naku ai win:

¹⁹ “Kati 4 ra, kati 5 ra, kati 7 ra bara kati matawalsip ra man nani plun piras puram suni katma ba, nanara lilia briaia yua ra tawbia, Juda kiamka nani lilia briaia yua ra tawbia. ¡Bamna man nani latwan kaiks, kasakka lâka ba, kupia kumi lâka ba sin!”

²⁰ Dawan, karnika sut bri ba, naha aisisa: “Tawan tara nani ra iwi uplika nani ba sin balaia sa.

²¹ Tawan kum uplika nani ba tawan wala uplika nani ra wabia: ‘¡Man nani, kaisa Dawan, karnika sut bri ba, plikaia waia, witin ra wan pura sunaia yamni wan munaia dukiara!’ Bara wala nani ba pana wibia: ‘¡Yang nani sin wamna!’

²² Jerusalem ra upla ailal nisan sât ailal pali balbia, Dawan karnika sut bri ba ra, ai pura suni yamnika ba briaia pliki.

²³ Bara baha yua ra, Ju apia nisanka nani ba tila wina, upla matawalsip bal Ju uplika kum prâka ra alki bara wibia: ‘¡Yang nani sin man wal wan ai daukisa, kan yang nani walri, Dawan ba man nani wal sa!’ ”