Sakaraya 7 - DAWAN BÎLA AISKA

Kunin lâka ra kaiki plun piras kaia ba

¹ Darío mani walhwal king aimaki kan ba ningkara, kati 9, Quisleu katka, yua walhwal aimakan ba ra, Dawan ai prapitka Sakaraya ra, ai bîla dahra aisaia win.

² Baha piua nani ra Betel wina Sarézer, Réguem-mélec bara upla wala nani sin blikan, Dawan hilpka makabaia;

³ Dawan, karnika sut alki bri ba watla ra prapit nani ra, prîs nani ra makabi walaia: “¿Mani bani kati matsip aimaki ba ra, yang nani kaiki plun piras, sari bri banhwisna ba ban naiwa kat, baku ban dauki banhwi kaia sna ki?”

⁴ Dawan, karnika sut bri ba, witin bui yang ra ai win:

⁵ “Tasbayam uplika nani sut ra wis, prîs nani ra sin: ‘Man nani pat 70 mani, kati matsip aimaki ba ra, kati matlalkahbi pura kumi aimaki ba ra sin, sari bri, kaiki plun piras dauki banhwisma. Sakuna man nani bui yang ra yamni ai kulkaia dukiara daukras,

⁶ man nani plun pi bara di banhwisma ba, man nani liliakam briaia dukiara baman daukisma.’ ”

⁷ ¿Naha pali bîla nani na apia, patitara prapitka nani kan ba mita, aisi kan ba, Jerusalem ra upla ailal ai âuyapah iwi kan ba piua ra, tawan nani ai tnaya kir ba sin, Négueb tawanka nani ra, tawan lupia nani ra upla ailal iwi kan ba piua ra?

Dawan bîla wali daukras ba pâtka tara nani

⁸ Dawan bui prapit Sakaraya ra naha bîla nani aisin, bara naku win:

⁹ “Naku aisaia yang mai wisni: Man nani upla lâka aisi daukisma ba ra, lâ kasak wapni daukma; bara pana pana kupiam pihni lâka ra, walkam nani ra umpira kaiki bas.

¹⁰ Piarka nani ra, rau nani ra, tasba wala uplika nani tilamra ba, upla umpira nani ra, lâ wirhika witin nani purara kahbiara. Pana pana walkam ra sin saura munaia lukpara.”

¹¹ Ban sakuna, Dawan aisin ba, upla nani wali daukras kan. Sut ai kiamapara dauki si bara ai ninara tawan.

¹² Witin nani ai kupia karna daukan, walpa karna pali ba baku. Dawan, karnika sut bri ba, ai spiritka ni lâ smalkanka nani patitara prapitka nani ra win aisin ba, walaia apia win. Bamna Dawan kasak pali ai kupia baikan, bara naku win:

¹³ “Yang aisari, witin nani walan daukras bamna, witin nani ai pura sunbia bara yang sin walamna apia.

¹⁴ Baha mita yang pâsa karna taki baku, witin nani ba kakaira apia nisanka nani tilara yakabrira daukri, ai kuntrika ba upla iwras tasbaya daukri ba ra taki wan. ¡Kuntri kum pranakira pali kata ba, witin nani mita bîla man dauki swin!”