Sakaraya 6 - DAWAN BÎLA AISKA

War waginka walhwal lilka aihka kaikan ba

¹ Lilka aihka wala kum kaikri. Bras ilka wâl lilapasku, war waginka walhwal taki aula kan.

² Wagin tâura ba, aras pauni nani aubi kan; wagin wala ba, aras siksa nani aubi kan;

³ yumhpika ba, aras pihni nani aubi kan; walhwalka ba lika, aras puputni nani mita aubi kan.

⁴ Insal yang wal aisi kata ba ra makabi walri: “Wihtki, ¿baha dîa tânka?”

⁵ Insal ba pana ai win: “Baha nani sika pâsa walhwal, Dawan mawan wina taki tasba aiska ra auya ba.

⁶ Aras siksa nani aubi waginka ba, yahbra tasbaya ra auya; aras pihni nani aubi waginka ba, muna tasbaya ra auya; bara aras puputni nani mita aubi waginka ba, waupasa tasbaya ra auya.”

⁷ Aras puputni nani ba bal takan, tasba aiska ra mahka taki waia. Insal ba witin nani ra win: “Tasba aiska ra watauki bas.” Bara witin nani baku daukan.

⁸ Baha ningkara insal ba karna ai winan: “¡Kaiks, baha nani yahbra tasbaya ra wan nani ba mita, baha tasbaya ra Dawan kupia baiwanka ba daskisa!”

Jasua lal ra kraun mangki ba

⁹ Dawan ai win naha bîla nani smalkaia:

¹⁰ “Upla nani ai tasbaya wina kangban Babilon ra wan kan, kli tawi balan nani ba: Heldai, Tobías, bara Jedaías, witin nani wina prisantka makas. Baha ningkara kau lapta dimras bara mahka Sofonías luhpia waitna, Jasua watla ra was.

¹¹ Silbar bara gul brima ba ni, kraun nani pasks, bara Josadac luhpia waitna, prîs tara, Jasua lal ra kraun kum mangks.

¹² Witin ra wis: ‘Dawan, karnika sut bri ba kasak aisisa, baha waitna nina Urhwi Takaia mâkan ba, witin ai wakia wina pâwi taki, Dawan tempelka ba witin kli mâkbia.

¹³ Dawan tempelka ba witin kli mâkbia, bara king kum ra kulkanka lâka yabi nani ba bribia. Witin ai iwaika ra iwbia bara tâura wihta aimaki kabia, bara prîs ba sin ai iwaika lamara iwbia, bara wal ai lukanka kumi laman lâka ra iwbia.

¹⁴ Bara kraun nani ba Dawan tempelka ra suni swibia, Heldai, Tobías, Jedaías, Josías Sofonías luhpia ba, naha nani ra tara kulkanka yabi ba wan kupia krauki kaia dukiara.’ ”

¹⁵ Upla nani laih wina balbia, Dawan tempelka kli paski ba bakahnu mâkaia; bâra mika man nani kaikma Dawan, karnika sut alki bri ba, ai blikan ba. Naha ban takbia, man nani bui Dawan Gâdkam bîla baikra wali ai bîla wali daukma ba ra.