Sakaraya 14 - DAWAN BÎLA AISKA

Jerusalem pura luanka lâs ba

¹ Dawan lâ daukaia yua ba pat aula, Jerusalem, dukiam nani mihtam dakbia ba, kli man nani tilamra yui maikan kabia.

² Baha yua, Dawan mita nisan nani sut ba asla daukbia, Jerusalem mapara aiklabaia. Witin nani tawan tara ba pura lubia, watla wina diara sut saki bribia, mairin nani ra sin alki saura muni, tawanka bakriki uplika nani ba alba briaia brih wabia. Bakriki baman Jerusalem ra takaskbia.

³ Baha ningkara, Dawan nisan nani ba mapara aiklabaia wabia, witin aiklabaia yua aiklabi ba baku.

⁴ Baha yua ra Jerusalem lamara lalma tani ra, Oliv Dusa nani bâra ba ilka ra Dawan bubia. Bara ilka ba baiki langnika tara kum lalma wina muna kat daukbia. Ilka tnaya kum yahbra tani ra lakbia, tnaya wala ba waupasa tani ra.

⁵ Bara man nani baha ilka nani langnika bîla taki plapma tnaya wala ba kat, langnika ba Asal kat auya bamna. Ozías king aimaki kan piua ra, tasba nikban bara damikam nani plapata ba baku plapma. Bara Dawan Gâdki ba witin ai uplika kasakkira nani ba wal aikuki balbia.

⁶ Baha yua ra kauhla wan daukbia apia, lî klaswan sin âpu kabia.

⁷ Baha yua ba aihka pali kabia, Dawan baman baha tânka kaikisa. Baha piua ra kakna wih tihmia wal aihka aihka apia, kumi ra kabia, kan ingni ba tihmia ra ban ingwi kabia.

⁸ Baha ningkara Jerusalem wina lî kauhla taki kabia bara aubi kabia lî piua ra, mani piua ra sin, bakriki ba Kabu Pauni ra aubi kabia bara bakriki wala ba muna kabuka tara ra aubi kabia.

⁹ Baha yua ra, wan Dawan ba tasba aiska ra king aimakbia. Wan Dawan kumi baman kabia, ai nina sin kumi baman kabia.

¹⁰ Naha tasbaya aiska tasba langni takbia, Gueba wina Rimón, Jerusalem waupasa tani ba kat. Bara Jerusalem ba, purara bukan kabia baha tasbaya langnika ba Benjamín getka ba wina Walpa Kutbanka un rayka Dimaika ba kat (baha ba kan piua ra Get Almuk mâki kata ba); bara Hananel aihwakaika ba wina king batana laya taibi saki ba watla nani kat kulkisa, bahara upla nani iwi kabia.

¹¹ Âu, Jerusalem ra kli upla iwi kabia, witin nani ba kli sauhki tikan kabia apia. Witin nani sin baha wina kli taki waia lukbia apia.

¹² Sakuna Jerusalem mapara aiklaban ba nisanka nani mapara, Dawan mita klala karna pali yabia: uplika nani kau raya tauki bara wîna ba pat sukwi kabia; nakra nani ba sin sukwi kabia, twisa ba sin bîla kat sukwi lubia.

¹³ Baha yua ra Dawan mita upla nani ba sibrin tara ni tayahkbia. Upla kumi bani ai uplika mihta ra alkbia, bara pana pana ai walka mapara ai mihta buki kabia.

¹⁴ Baha Juda uplika nani sin Jerusalem ra aiklabia, bara ai lamara iwi nisanka nani tasbaya wina dukia kukanka nani ba mihta dakbi bribia, silbar, gul bara kwala sin.

¹⁵ Baha klala karna upla ra bara aras nani, muyul nani, kiamil nani, biriku nani bara daiwan wala nani sin sut ai waihla nani ai kiampka ra bri ba purara sin kauhaia sa.

¹⁶ Baha taki lubia ba ningkara, Jerusalem mapara aiklaban uplika nani pruras raya kau swin kabia nani bani Jerusalem ra wabia King, karnika sut bri ba Dawanka ra mayunaia bara Utla Papakni liliaka ba sin dauki kaia.

¹⁷ Bara baha tasbaya nisanka nani ba tila wina King, karnika sut bri Dawanka ba ra mayunaia Jerusalem ra waras sa kaka, baha nani tasbaya purara lî auhbia apia.

¹⁸ Idsip uplika nani waras kabia kaka, Dawan mita witin nani ra klala yabia, baku natka ra ani nisanka wala nani sin Utla Papakni liliaka daukaia waras kabia nani ba sin klala yabia.

¹⁹ Baha klalka ba Idsip uplika nani ra, nisan wala nani ra sin prukan kabia, Utla Papakni liliaka daukaia witin nani waras kabia ba ra.

²⁰ Baha yua ra, aras nani nana ra bil lupia nani wilki ba taya ra sin naha bîla na ulban kaia sa: “Dawan mihta ra mangkan sa”. Bara tempel bilara dikwa tara nani ba, kâp tara nani altar ra ba sin aihka sakan kabia Dawan dukia.

²¹ Dikwa nani sut Jerusalem ra, Juda ra bâra ba, karnika sut bri Dawanka dukia aihka sakan kabia. Ya ya sakripais daukaia wabia ba dikwa nani ba bribia, wîna nani Dawan ra yaban ba piakbia. Baha yua ra diara wauhi âiatkra nani Dawan karnika sut bri ba tempelka ra âpu kabia.