Sakaraya 12 - DAWAN BÎLA AISKA

Jerusalem uplika kli ai tasbaya ra iwbia

¹ Naha bîla nani sika Dawan, Israel dukiara aisisa. Kasbrika purara paskan ba, tasba playka tara bapan ba, upla ra sin rayaka yan Dawanka ba, kasak aisisa:

² “Yang bui Jerusalem ba wain laya kapka kum baku daukamna, bara nisan nani sut ai lamara iwi ba bla taki banhbia. Witin nani Jerusalem kutbi bribia, bara Juda tawanka tara wala nani ba ra sin aiklabia.

³ Baha piua ra nisan nani sut dukiara Jerusalem ba walpa wirha pali daukamna. Ani nisanka baha bukaia munbia ba latwan bribia. Nisan nani sut asla taki Jerusalem mapara bubia,

⁴ ban sakuna, baha piua ra aras nani ba sut tayahkaisna, bara uli nani ba sut lal saura takbia. Sakuna Juda masraka nani ba lika, aihwaki kaiki kabia, nisan nani araska ba lika diara kaikras daukamna.

⁵ Baha kaikbia ba ra Juda wihtka nani ai mânka naku aisabia: ‘Dawan, karnika sut bri ba, Jerusalem ra iwi nani ba Gâdka sa, witin baha nani ra karnika yabisa.’

⁶ Baha piua ra Juda wihtka nani ba masku aswi baku daukamna pauta tilara, pauta klauhan kum baku plawar mâ dâki wilkanka nani tilara. Witin nani mita nisan nani ai aihkika ra bara ai smihka ra, ai lamara iwi nani ba sut âpu daukbia, sakuna Jerusalem uplika nani ba kli tawi bal ai tawanka ra iwi kabia.

⁷ “Ban sakuna, Juda taika nani ba pas, yang, Dawan mita, swaki sakamna, Debit masraka bara Jerusalem ra iwi nani ba sin, Juda masraka nani ba wal kau tara kulkan kaia apia ba mita.

⁸ Yang, Dawan, Jerusalem ra iwi uplika nani ba kan kahbamna. Upla kau swapni pali nani ba, Debit wal kau karna kabia, Debit kiamka nani ba Dawanka kabia, Dawan insalka baku, witin nani tâura aimaki ba.

⁹ Baha piua ra ani nisanka Jerusalem mapara bubia ba, sauhki tikamna.

¹⁰ “Kupia yamni ai pura suni kaia spiritka wal, Debit kiamka nani ba Jerusalem ra iwi uplika nani ba banhkamni. Bara baha nani witin ra saban ba kat kaikbia, bara witin pura mata sari pali ini banhbia, luhpia waitna kumi baman kan, apia kaka tawahkia kan sarka ini ba baku.

¹¹ Bara Jerusalem ra sari pali bri inanka tara pali kum takbia, gâd Hadad-rimón dukiara Meguido tasbaya langnika ra inan tara ini ba baku.

¹² Upla taika nani kumi bani ai kuntrika ra ai tilara sari pali bribia: Debit kiamka nani ba, bara mairin nani ba sin; Natán kiamka nani, bara mairin nani ba sin;

¹³ Libai kiamka nani, bara mairin nani ba sin; Simí kiamka nani, bara mairin nani ba sin;

¹⁴ baku sin upla kiamka wala nani sut, kumi bani ai mânka ra nani ba sin.