Sakaraya 11 - DAWAN BÎLA AISKA

¹ ¡Líbano, durkam nani ba kwâks, bara pauta klauhan mita yalamkam dusa nani ba angki âpu daukbia!

² ¡Awas dusa, man sin ins, yalam dusa ba kauhan bamna, baha dus pranakira nani kata ba sut sauhki tikan sa bamna! ¡Basán usupumka dusa nani man nani sin mâmna lulks, unta biara ra dus nani sut batakan bamna!

³ Sepad nani ba karna inisa, kan twi nani prana kata ba sut sauhki tikan bamna. Layan ihbi ba walisa Jordan lamara ai watla bri kan ba sut sauhki tikan sa bamna.

Sepad wâl ba

⁴ Naha bîla na Dawan Gâdki bui ai win: “Sîp nani ba aihwaki kaiki bas ikaia watla ra brih waia lâka daukan ba.

⁵ Sîp atki âikra nani pâtkira taki ba, ai dara walras sa, bara wauhi âiatkra nani ba wisa: ‘¡Dawan ra tingki, yang pat yuyakira sna!’ Sepadka nani pali ba sin ai sîpka nani ra umpira kaikras sa.

⁶ Bamna baha natka ra, yang sin naha kuntrika ra iwi uplika nani mapara kupi swapni daukamna apia, sakuna uplika nani kumi bani ba, ai uplika nani mihta ra, ai kingka mihta ra mangkamni. Baha nani mita tasbaya na sauhkbia, bara yang lika upla kumi sin witin nani mihta wina swaki sakamna apia. Yang, Dawan, kasak aisisna.”

⁷ Bara sîp nani ikaia watla ra brih waia lâ daukan ba, mahka main kaikri. Bara âiatkra nani aikuki atkaia lâka ba yang daukri. Bara dus wâl brih, nina nani ba naku mâkri: kumi ba wîri “Hilpka yabaia”, wala ba wîri “Asla kaia”.

⁸ Baha wina kati kumi baman bilka ra, sepad yumhpa misbara ai kaiki, kupi sauhki pali kan ba kangbi sakri.

⁹ Bara sîpka nani ra wîri: “¡Yang kli man nani sepadkam aimaki kamna apia! ¡Ya pruaia kaka, prubia si! ¡Âu, upla kum mita ikan kaka, ikbia si! ¡Bara kau pruras nani ba, pana pana ai walka wîna pi kabia!”

¹⁰ Bara yang kînki ba briri, nina ba mâkisa, “Diara yamni kaia lâka kînka ba” yang mita kriki baha ba, sainka kum baku kabia, Dawan nisan nani sut wal, lâ daukan lâka ba, bahki takan kabia wisi.

¹¹ Baha yua sîp âiatkra nani ai kaiki kan ba ai dara walan, witin nani wal lâ daukan ba bahki takan, tânka brin yang dauki katna ba sika, Dawan aisi kan ba.

¹² Bamna yang bui witin nani ra wîri: “Man nani yamni lukisma kaka, maina aibaps; apia kaka ban swis.” Bara witin nani silbar mâ 30 ai aibapan.

¹³ Dawan bui ai win: “Lalahka mâ nani ba bris, maina tara pali aihwa ai kulkan na, bara tempel lalahka watla ra bri si mangki swis.” Lalahka mâ nani 30 ba yang briri, bara bri si tempel lalahka watla ra mangki swiri.

¹⁴ Baha ningkara dus wala nina “Asla kaia” mâkri ba sin krikri, baha tânka Juda Israel wal ai muihni kaia lâka ba sauhki tikan sa.

¹⁵ Dawan bui ai win: “Nanara man sepad kum sîp nani yamni main kaikras ba natka dauks.

¹⁶ Kan yang naha kuntrika ra sepad kum mangkamna sîp aimawahkan ba dukiara diara lukras kabia ba, tiwan ba plikbia apia, insauhkan nani ba sîka daukbia apia, swapan ba sin plun yabia apia, sakuna sîp kau batana nani ba sut pibia, sûska nani sin swibia apia.

¹⁷ ¡Baha sepadka diara yamni sip daukras sîp daknika lulki swi ba, sari pali kabia! ¡Yarka sord ba ai klahkla bara ai nakra aihkika purara kauhbia! ¡Bara klahkla ba yarka lâwbia, nakra ba sin kaikras daukamna!”