Rut 3 - DAWAN BÎLA AISKA

Booz kupia lukanka yamni ba

¹ Yu kumi Noemí Rut ra win: —Luhpi mairin, yang lika man mayam kum pliki maikaia sna, man ra diara nani sut yamni baman taki kaia ba mata.

² Kaiks wan taya waitna Booz, witin ai warkka uplika mairin nani aikuki taki katma ba, naha tihmia witin ai nasla ra auya barli mâ ba pukbi sakaia.

³ Bamna man aihtabi taks, isintkam aimaks, kwala kau pain ba dims, bara nasla ra was. Ban sakuna, witin mai kaikbiara, bîla kaiki bas witin ai pata pih bara dih lubia ba ningkara.

⁴ Bara man pain kaikma witinka anira yapaia aitnikbia ba. Man bahara was bara pura bika ba ai mina wina bukma, bara baha kat aitnikma. Bara witin mita mai wibia man dîa daukaia sma ba.

⁵ Rut pana aisin: —Âu, man dîa sut ai wisma ba daukamna.

⁶ Rut lika mahka taki insla ra wan, bara ai piarkika witin ra win ba kat daukan.

⁷ Bamna Booz plun pin bara diara laya sin din, bara ai âuyapah pali takan. Baha wina mâ nani asla kukan ba lamara mahka yapaia aitnikan. Bara Rut sâpkira balan, pura bika ba ai mina wina bukan, bara bahara aitnikan.

⁸ Tihmia wâl bakriki kat Booz kupia krawan, bara witin aikarwi tawan ba ra, tâ iwan mairin kum ai minakla ra aitniki kan kaikan.

⁹ Bara witin aisin: —¿Man ba ya? Bara witin pana aisin: —Yang sika Rut, man warkkam dadaukra ba. Man bui yang taiya waitna ba ra tâi baikaia sma. Man prâmka mahta ba yang purira praki mayam ai bris.

¹⁰ Booz tawi win: —¡Dawan ai yamnika maikbia! Man param marikisma mayam pruan ba kau ban lukisma, man lika wahma umpira sapa, apia kaka yuyakira sapa plikras katma bamna.

¹¹ Bamna si bripara, luhpi, yang tawanki uplika nani sut ai dahra walisa man ba mairin kasakkira sma. Bamna man bui yang ra dîa makabisma ba kat daukamna.

¹² Âu, kasak sa yang na man tamya, ban sakuna, waitna wala kum bâra sa kau man tamya pali ba.

¹³ Man naha tihmia nâra bas. Yauhka titan baha waitnika mai briaia wibia kaka, baku takbia. Sakuna witin mai briras kaka, yang bui Dawan mawanra mai wisna, yang mai brimna. Bamna yapi bas.

¹⁴ Bara Rut baha tihmia aiska Booz minakla kat yapi lalawan. Lalma kahbi kan kau puk ba ra witin buan, kan Booz bila win: “Upla kaikaia apia sa naha mairin insla ra balan kan ba.”

¹⁵ Bamna Booz witin ra win: —Prâmka tara ba daiks bara pain alks. Rut ai prâka ba alki bri kan, bara witin bahara barli mâ bîk kum baku auhbi Rut pahpaya ra sunan, bara mairin ba mahka tawan ra wan.

¹⁶ Rut ai piarkika ra kli balan ba ra, witin bui Rut ra makabi walan: —¿Nahki mai takan ki, luhpi mairin? Bara Rut witin ra diara sut win, Booz mita witin ra diara nani yaban ba sin.

¹⁷ Baha purkara witin aisin: —Barli mâ sin aikan bara ai win yang mihti bîla baman man ra balamna apia.

¹⁸ Bamna Noemí bila: —Kupiam takaski bri bas, luhpi, dîa takbia ba kaikma. Baha waitnika naiwa takaskbia apia, naha tânka wapni daukbia ba kat.