Rut 2 - DAWAN BÎLA AISKA

Rut Booz nasla ra wan ba

¹ Noemí maya prahki Elimélec taika waitna kum bâra kan ai nina Booz. Witin sika waitna yuyakira pali bara sin tara kulkan kan.

² Yu kumi Rut Noemí ra win: —Aik insla nani ra wamna, bara mâ kriki uplika kum pan kaikamna, witin kra aikbia ai nina bliki mâ kauhan nani ba wahbi kaia. Bara Noemí win: —Was, luhpi mairin.

³ Bara mâ krakrikra nani mâ kauhan nani ai ninara swin yaba, mahka wahbi kan. Bara kaiks baha baku ban takan nasla ba Booz Elimélec taika ba dukia kan.

⁴ Bara Booz lika Betlehem wina insla ra wan, bara mâ kriki uplika nani ra lakula win: —¡Dawan ba man nani wal kabia! Bara witin nani pana witin ra win: —¡Dawan ai yamnika maikbia!

⁵ Baha wina Booz bui mâ krakrikra nani pura kakaira ra makabi walan: —¿Baha mairin tiara ba ya kiamka?

⁶ Bara pura kakaira ba witin ra win: —Witin sika Moab mairka, Noemí wal baha tasbaya wina balan ba.

⁷ Witin bui yang ra makabi walan mâ krakrikra nani nina blikaia, mâ swin nani ba wahbi kaia, bara witinka titan balan wina wark takisa, namika kat bal wirâ ris brisa.

⁸ Bamna Booz bui Rut ra aisin: —Luhpi mairin, yang ra wals, man insla wala ra mâ wahbaia wapara. Nahara takaski bas, yang warkki taki ba mairka nani tilara.

⁹ Man kaiki kama witin nani ansara wih krikisa, bara witin nani nina bliki kama, kan yang warkki tatakra nani ra pat wîri sa, witin nani diara mai munbia apia. Diran mai daukbia ba ra, lî watla tara nani witin nani banhkan ba, bahara wih di bas.

¹⁰ Bara Rut baha walan ba ra, tasba kat ai lal makupan, bara Booz ra makabi walan: —¿Man dîa muni yang ra ban yamni ai wisma, yang tasba wala uplika sna na?

¹¹ Bara Booz witin ra win: —Yang pat walri man piarkikam ra nahki yamni munram ba, mayam pruan ba ningkara; bara aisikam yaptikam tasbaya sin swiram, bara man kakaira apia uplika nani tasbaya ra balram.

¹² ¡Gâd bui mamna maikbia! Israel Dawan Gâdka mita diara aiska maikbia, witin ai tnawa distika ra mamdiskbia, kan witin ra balram bamna.

¹³ Bara mairin ba pana aisin: —Wihtki, man yamni pali ai wisma, bara aisinkam nani ba kasak maisi nihkra nani sa. Man sin bîla yamni ni yang ra aisaram, yang lika man warkkam tatakra mairin kulkanka pan briras sna sakuna.

¹⁴ Plun piaia piua ra Booz witin ra paiwi, win: —Nâra bal, brit na bri si pilala ra buski pis. Bara Rut mâ krakrikra nani tilara iwan, bara Booz mita barli mâ kâkan yaban bara ai biara banhki pin, plun kau swin.

¹⁵ Baha ningkara witin kli mâ wahbaia wan ba ra, Booz mita ai warkka tatakra nani ra adar yan: —Swis witin sin barli mâ klubanka nani tilara wahbi kabia, bara upla kumi sin witin ra diara wibiara.

¹⁶ Bara man nani sin swis mâ nani ban kauhi kabia man nani pali klubankam nani ba wina, bara baha nani sin witin wahbi kabia. ¡Upla kumi sin witin ra lawi daukbiara!

¹⁷ Bara Rut baha nasla ra mâ kauhan nani ba wahbi kan, ban tihmia kat. Baha wahban kan ba drusbi sakan ba ra, bîk bakriki takan.

¹⁸ Bara witin baha brih kli tawan ra wan, bara dîa wahban kan ba Noemí ra marikan. Bara witin plun pin tâka swin ba sin saki, witin ra yan.

¹⁹ Ai piarkika bui witin ra makabi walan: —¿Man naiwa ya nasla ra barli mâ wahbi kapram? ¿Ani wina mâ ailal wahbram? ¡Yamni pali kabia baha uplika man ra naku yamnika tara maikan ba! Bamna ai piarkika ra win, witin ya wal wark takan ba. Witin bila win: —Yang naiwa Booz nasla ra wark takri.

²⁰ Bara Noemí Rut ra win: —Dawan bui witin ra ai yamnika yabia. Witin sin nanara yamni wan munisa, kanra pat pruan nani wal yamni kata ba baku. Baha waitnika sika yawan wan taya pali, bara wan tâ baikaia aitani sa.

²¹ Rut bila: —Witin sin ai win, yang lika witin ai warkka albika tatakra mairin nani tilara ban wark taki kamna, insla ra mâ sut dâkan kabia kat.

²² Bara Noemí bui Rut ra win: —Luhpi, yang lukisna aitani kabia, man ba witin warkka tatakra mairin nani wal ban wark taki kama, bara insla wala ra sin wapara, upla kra saura mai munbiara sîa.

²³ Bamna Rut ban Booz warkka uplika nani tilara mâ nani wahbi kan, barli mâ bara plawar mâ krikaia piua luan ba kat. Bara witin ai piarkika wal ban iwi kan.