Rut 1 - DAWAN BÎLA AISKA

Elimélec nani Moab tasbaya ra takaskan ba

^1-2 Israel wihtka nani bui tâ bri kan ba piua ra, plun tiwan tara bâra kan tasba aiska ra. Bara Betlehem waitnika kum Juda tasbaya wina bal iwan, nina ba Elimélec, piua prahni kum Moab tasbaya ra takaskaia wan. Witin ai maya Noemí bara ai luhpia waitna nani Mahlón bara Quilión aikuki wan. Witin nani sut lika tawan almuk Efrata uplika kan, baha ba Betlehem Juda tasbaya kata. Bara witin nani Moab tasbaya ra bal takaskan.

³ Bara Noemí maya Elimélec kata ba pruan, bara witin ba piarka takan, ai luhpia waitna wâl ba aikuki takaskan.

⁴ Baha wahmika wâl ba Moab mairka nani wal ai maya brin; witin nani nina ba Orfá bara Rut kata. Bara witin nani baha pliska ra iwi kan mani matawalsip nani.

⁵ Bara Mahlón Quilión wâlsut pruan, bara piarka Noemí lika mayas bara luhpias yakan pali takaskan.

Noemí Rut wal Betlehem ra wan ba

⁶ Bamna yu kumi Noemí ai piarkika nani aikuki mahka Moab tasbaya wina taki waia buan, kan sturi walan Dawan bui ai uplika nani ra kli yamni kaikan, bara nanara baha tasbaya ra yan plun takisa.

⁷ Bara witin ai piarkika nani aikuki buan, bara Moab tasbaya wina taki kli Juda tasbaya ra wan;

⁸ sakuna Noemí witin nani aikuki yabal ra auya kan ba ra, naku win: —Man nani kumi bani, kli tawi yaptikam watla ra was. Dawan ai yamnika maikbia, man nani mayam prahki nani ra bara yang ra sin yamni ai munram ba baku.

⁹ Dawan bui man nani mayam wala maikbia, bara witin wal wamtla ra âmyapah kama. Noemí bui ai mawan kiawalan bara witin nani mahka karna inan.

¹⁰ Witin nani Noemí ra win: —¡Apia! ¡Yang nani lika man wal tasbayam ra wamna!

¹¹ Kuna Noemí bila: —Kli tawi was, luhpi mairin nani, ¿dîa dukiara yang wal wan mai daukisa? Yang biaira ra luhpa waitna wala âpu sa, man nani mayam kaia.

¹² Luhpi nani, wamtla ra mahka was. Yang lika almuk pali sna, kli mayi wala briaia sip apia sni. Ban kra naha tihmia waitna brih luhpa waitna nani kli baikaia wimna kra sin,

¹³ man nani ban sip baha nani bîla kaiki kama apia, witin nani tara pâwbia ba kat bara man nani mayam briaia. Ban daira walisni man nani mayam brima apia piuam lubia ba ra. Apia pali, luhpi mairin nani. Dawan lika pât tara pat aikan, sakuna man nani sin pât tara wauhma kaka, sairka na kau tara kabia.

¹⁴ Witin nani kli inan. Bara Orfá lika Noemí mawan kiawali si mahka wan, sakuna Rut witin wal ban takaskan.

¹⁵ Bara Noemí aisin: —Kaiks, man mamsaya prahki maya, kli ai tasbaya ra ai gâdka nani ra auya ba. Man sin witin wal was.

¹⁶ Sakuna Rut bui Noemí ra tawi win: —¡Yang na man wal dakwi takaia ai wipara! Man anira wama kra, yang sin man wal wamna; bara man anira wih iwma kra, yang sin bahara iwamna. Man uplikam nani ba yang upliki kabia, man Gâdkam ba yang Gâdki kabia.

¹⁷ Man anira pruma ba, yang sin bahara pruamna, bahara sin ai bikbia brin ai daukisa. ¡Dawan bui klala karna yang ra aikbia yawan dakwi takbia kaka! ¡Prura mita baman dakbi wan sakaia sip kabia!

¹⁸ Noemí kaikan Rut witin wal waia lukanka bri kan ba, bara kau diara wala aisaras kan.

¹⁹ Bamna witin nani wâlsut Betlehem kat wan. Betlehem tawanka ra diman ba ra, upla nani sut witin nani ra kaiki tâ iwan. Bara mairin nani ba bui aisi kan: —¿Naha na Noemí apia?

²⁰ Sakuna Noemí bui pana witin nani ra aisin: —Nini ba Noemí ai wipara, sakuna Mará ai wis, kan Gâd karnika sut pali bri ba mita kupi kriwan lâka tara ni ai banhkan.

²¹ Yang mihti banhki wari naha wina, ban sakuna nanara Dawan bui mihti bîla baman ai swin aulna. ¿Nahki muni Noemí ai wima, kan Dawan karnika sut bri ba lâika daukan bara pât tara aikan?

²² Baku sika Noemí ai piarkika Rut Moab wina ba wal kli tawi wan. Barli mâ dâkaia piua ra baha tasbaya wina ai tawanka Betlehem ra balan.