Roman 7 - DAWAN BÎLA AISKA

Marit lâka wal praki smalki ba tânka

¹ Bamna muihki nani, man nani Moses lâka tânka kakaira nani sma ba, pain kaikisma Moses lâka ba lika karnika brisa upla ba kau raya piua baman.

² Naha tânka na wal sip sa prakaia: mairin kum waitna kum wal marit takan ba, witin ai maya waitna ba raya piua baman lâ ba mita asla kaia wal prakan sa; sakuna maya waitna ba prubia kaka, mairin ba lâ ba mita ai maya waitna wal asla prakan kata ba wina pri takan sa.

³ Bara baha mairka ai maya raya ba piua ra waitna wala wal bribia kaka, witin lika marit lâka sauhkisa; kuna maya waitna ba prubia kaka lika, witin baha lâka ba wina pri sa bara sip sa waitna wala wal marit takaia, bara witin lika marit lâka sauhkras kabia.

⁴ Baha baku natka ra, yang muihki laitwankira nani, Kraist pruanka ba mita man nani sin witin wal pruram lâ ba mapara, waitna wala maya takaia dukiara. Nanara man nani Kraist dukia atia sma witin pruan wina buan ba, baku natka ra wan rayaka na Gâd mawanra diara pain kaia.

⁵ Bamna yawan upla saurakira nani baku kan ba piua ra, lâ ba wan wîna brinka saura nani buki kan, bara baha mita prura ra wan brih wan.

⁶ Sakuna nanara lika lâ mita ai karnika mununhtara wan bri kan ba mapara yawan pruan taki banhwan, bara baku mika rayaka raya tânka ba ni Gâd dukia daukaia yawan pri sika Spirit mita yabal raya wankan bâk, lâ almuk ulban ba karnika mununhta wina lika apia.

Baha saurka yang ra ba

⁷ ¿Bamna yawan dîa sip sa ki wiaia? ¿Lâ ba saurka sa ki? ¡Apia pali! Lâ ba apia kata, yang kaikras kaia kapri saurka ba dîa sapa. Kau klir dauki aisaia kaka, yang kaikras kaia kapri upla dukia tumaia, lâ ba naku wiras kan kaka: “Upla wala dukia tumpara.”

⁸ Saurka ba naha tânka bâk sans brin, bara lâ ba mita yang wîni ra saurka sât sât bal takan, kan lâ âpu kira saurka ba lika diara kum pruan sa.

⁹ Piua kum bâra kan, lâ âpu kan ba mita yang raya kapri. Sakuna lâ balan ba ra, saurka ba kli raya takan,

¹⁰ bara yang katna ba pruri. Baku bamna, lâ mita raya kaia lâka aikaia kan ba, prura ra ni ai brih wan.

¹¹ Bamna saurka ba sans brin lâ bâk kunin ai munaia, bara baha sin lâka bâk prura sin aikan.

¹² Baku bamna, lâ ba lika holi sa, bara lâ bîla ba sin holi sa, bara kasak pain sa.

¹³ Ban sakuna, ¿naha Moses lâka pain na mita ban prura ra ai brih wata ki? ¡Sip apia pali! Saurka ba mita sika yang ra prura balan, bara baku ni marikan sa baha ba saurka sa; diara yamni ba bâk baku daukan, bara lâ bîla mita latan marikan sa saurka ba lika saura sa.

¹⁴ Bamna yawan kaikisa lâ ba lika spirit tani dukia, sakuna yang na upla wîna tara pali brisna ba mita, saurka lâka albika kaia wisi ai atkan sa.

¹⁵ Bara dîa yang ra taki ba dukiara sip tânka briras pali sna, kan yang pali want sna dukia ba lika daukras, kuna yang mita misbara kaikisna dukia ba sika daukisna.

¹⁶ Sakuna want apia sna ba, baha sika yang daukisna kaka, baku ni lika kaikisna lâ ba pain sa.

¹⁷ Baku bamna, yang apia sika daukisna ba, sakuna saurka yang wîni ra ba mita sika dauki ba.

¹⁸ Bamna kaikisni yang pali ra, tânka ba kasak pali wibia kaka, yang pali wîni ra diara pain ba âpu sa; yang lika diara pain daukan ai daukisa, sakuna sip daukras sna.

¹⁹ Diara pain daukaia want sna ba lika sip daukras sna, sakuna saura daukaia want apia sna ba lika dauki taukisna.

²⁰ Bamna daukaia want apia sna dukia ni daukisna bamna, ban kaka baha ba lika yang pali apia sika, sakuna saurka yang wîni ra ba mita sika dauki ba.

²¹ Baku ba mita, naha yang ra takisa: ani piua ra diara pain daukan ai dauki ba ra, diara saura baman yang wîni ra kaikisni.

²² Kupi munhtara lika, Gâd lâka ba yamni kaikisna,

²³ kuna yang wîni tara ra diara aihka kum kupi brinka ba mapara aiklabi kan kaikisna; baha sika saurka lâka yang wîni ra bâra ba mita silak ra ai mangki ai bri ba.

²⁴ ¡Uba umpira pali sna na! ¿Bamna ya pali sip kabia ki, naha wîni tara na mita prura pâtka tara ra ai brih auya ba wina dakbi ai sakaia?

²⁵ Baha ba lika Gâd baman sip sa, wan Dawan Jisas Kraist bâk. ¡Gâd ra tingki kabia! Baha mita, kupi aiska ni Gâd lâka ba ra dimi auna, kuna wîni tara ba tani lika saurka lâka albika sna.