Roman 6 - DAWAN BÎLA AISKA

Saurka lâka mapara pruan kaia, sakuna Kraist ra raya kaia

¹ Bamna, ¿yawan dîa wiaia sa ki? ¿Saurka ba ban dauki kaia sa, bara Gâd mita ai kupia yamni lâka ba kau wan marikbia?

² ¡Sip apia pali! Yawan lika pat saurka lâka mapara pruan; bamna, ¿nahki yawan saurka lâka wal ban raya iwi kaia sa ki?

³ ¿Man nani kaikras sma ki, Kraist Jisas wal asla kaia wisi tahbi wan daukan ba sut lika, witin pruanka ba kat yawan sin aikuki asla tahbi wan daukan sa?

⁴ Baku bamna, tahbi wan sakan ba mita, Kraist wal pruanka ra wan bikan bara yawan pruan, witin wal kli buaia rayaka raya kumi brih iwi kaia dukiara, Kraist ba pruan nani tila wina Aisa karnika pranakira ba mita kli bukan ba baku.

⁵ Kan yawan Kraist wal asla taki ai pruanka ba kat pruan sa kaka, yawan lika witin wal baku ai pruanka ra asla kabia.

⁶ Yawan kaikisa, kaina piua ra yawan dîa kata ba lika Kraist wal dus prihni ra saban, baku mika saurka wan wîna tara ra ba sauhki tikan kabia, bara kli baha albika kaia apia dukiara, saurka lâka bîla wali dauki kaia wan wihtka kum baku.

⁷ Kan ya pat pruan sa kaka, witin lika saurka lâka ba wina pri sa.

⁸ Yawan na pat Kraist wal pruan sa kaka, kasak luki kaia yawan lika witin wal baku raya kabia,

⁹ kan yawan kaikisa Kraist ba aima kumi baman pruan nani tila wina bukan kata, kli sin prubia apia pali; kan prura mita witin mapara karnika nan sin âpu sa.

¹⁰ Bamna Kraist pruan ba lika, witin aima kumi baman saurka mapa ra pruan; kuna nanara witin raya iwi ba lika, Gâd mapa ra raya sa.

¹¹ Baku sin, man nani saurka lâka mapa ra pruram baku damra wali bas, kuna Jisas Kraist wal asla, Gâd mapa ra raya banhwi bas.

¹² Baku ba mita, man nani yarka wînam ra saurka lâka mita taibi munbiara bara adar maikbiara wînam brinka ba bîla wali daukaia.

¹³ Bamna wînam tara ba saurka lâka mihta ra mangks, sim saura daukaia dukia kum baku. Sakuna, wînam ba Gâd mihta ra mangki banhs, sim upla kumi pruan bara ningkara kli raya takan ba baku. Gâd mihta ra wînam ba mangks, sim diara pain daukaia dukia kum baku.

¹⁴ Kan saurka ba kli man nani puramra karnika bri kabia apia, kan man nani ba lâ mununhtara apia sma, sakuna Gâd kupia yamnika ba mununhtara banhwisma.

Alba lâka wina tânka kum sakan ba

¹⁵ ¿Baku ba mita, dîa? ¿Yawan lâ mununhtara apia sa, sakuna Gâd kupia yamnika mununhtara ba mita saura yaia sa ki? ¡Sip apia pali!

¹⁶ Man nani pain kaikisma, alba kum baku dawankam kum mihta ra aimakma witin bîla wali daukaia bara baha dawankam ba albikam takisma. Baku sin, man nani saurka lâka bîla wali daukma kaka, bara baha sin prura ra mai brih auya, bara baku Gâd bîla wali daukma rayakam wapni brih iwaia.

¹⁷ Sakuna Gâd ra tingki kabia, man nani lika kaina piua ra saurka lâka albika nani katma, kuna nanara mai smalkan ba kat kupiam aiska ni witinka mihta ra aimakram ba bîla wali daukisma.

¹⁸ Aima kumi man nani saurka lâka wina pri takram ba ra, kasakka lâka albika ni taki banhram.

¹⁹ (Naha na upla natka ba kat yang aisisni, kan man nani upla baku naha diara tânka nani ba sip param briras sma ba dukiara.) Kaina piua ra man nani wînam ba tâski lâka bara saurka lâka mihta ra mangkram kan, saura daukaia dukiara. Baha sim natka ba kat, nanara wînam ba kasakka lâka mihta ra mangks, aiska holikira lâka ra iwi kaia dukiara.

²⁰ Bamna man nani kau saurka lâka albika nani katma piua ra, kasakka lâka ba wina pri katma;

²¹ bara nanara baha dukia nani tâwan swiram mai dauki ba wina, ¿dîa pain sakatma ki? Baha ba prura mata baman mai brih auya kan.

²² Kuna nanara lika, saurka lâka nani ba wina pri takram, bara Gâd napakanka ni takram sa. Naha lika diara pain mai brih aula, kan Gâd tani ra rayaka kumi holi lâka kaia ba maikisa, bara tnata ra raya ban kaia lâka ba mata mai brih auya.

²³ Saurka ba mita mana baku wanki ba lika prura, sakuna Gâd wina prisantka ba lika, raya ban kaia lâka Kraist Jisas wan Dawan wal asla.