Roman 4 - DAWAN BÎLA AISKA

Ebraham wan patrangka ba

¹ Bamna, ¿yawan dîa wibia, wan damika Ebraham ba dîa brin ki?

² Ebraham wark daukan ba tâka wina Gâd mita kasakkira kulkan sa kaka, witin baman sa lukaia, kuna Gâd mawanra lika apia.

³ Kuna, ¿Ulbanka ba dîa wisa? “Ebraham lika Gâd ra kasak lukan ba mita, Gâd mita kasakkira kulkan.”

⁴ Sakuna upla kumi wark kum daukan ba mana yabi ba, baha ba prisant lika apia, kuna witin wark kumi takan ba mana yabisa.

⁵ Ban sakuna, upla kumi wark kumi sin daukras pali kuna kasak lukisa Gâd mita upla saurakira ba kasakkira kulkisa, baha uplika kasak lukan bamna, Gâd mita kasakkira kulkisa.

⁶ Baku bamna, Debit mita sin aisin sa upla kumi wark nani âpu kira Gâd mita kasakkira kulkan ba ai âuyapah sa.

⁷ Bamna Debit aisin: “Nahki prais lilia sa baha uplika nani ai saurka ba Gâd mita swin tiwuya ba, bara saurka purak swin luan ba.

⁸ ¡Bahamna, lilia pali kaia sa baha uplika ai saurka Dawan mita kulkras ba!”

⁹ ¿Bamna, naha liliaka lâka na Aisa sainka bri nani ba baman dukia sa ki, apia kaka, Aisa sainka briras nani sin dukia sa? Yawan pat aisin, Ebraham kasak lukan ba mita baman Gâd mita kasakkira kulkan.

¹⁰ Sakuna, ¿ahkia Gâd mita Ebraham ra kasakkira kulkan: witin Aisa sainka mangkan ba ningkara, apia kaka kaina wina? Baha ningkara apia, kuna kaina wina.

¹¹ Ebraham Aisa sainka ba ningkara brin, kasak lukan ba mita Gâd mita witin ra kasakkira kulkan ba tukinka baku. Naha sim natka ra Ebraham lika Aisa sainka briras kuna kasak luki uplika nani sut aisika takan sa, baku bamna Gâd mita param aisisa witin mita sin baha nani ba kasakkira kulkisa.

¹² Kasak pali, Ebraham lika Aisa sainka mangkan uplika nani ba aisika sa; baha tânka ba lika, ai wîna ra baman Aisa sainka mangkras, sakuna wan aisika Ebraham Aisa sainka briras kainara kasak lukan lâka bri kan ba nina bliki banhwisa.

Kasak lukan lâka ba mita pramis ba aiska aimakisa

¹³ Bamna Gâd mita Ebraham bara ai kiamka nani ra sin pramis munan naha tasbaya na ai dukia pali kabia; naha pramiska na Gâd mita daukras kata, Ebraham lâ bîla wali daukan ba tâka mita, sakuna kasak lukan ba mita, Gâd mita kasakkira kulkan ba tâka mita sika.

¹⁴ Baku bamna, lâ bîla wali dauki banhwi ba baman Gâd mita pramis munan tasbaya ba alki brisa kaka, kasak lukan lâka ba lika bahki sa, bara Gâd pramiska ba sin diara bahki.

¹⁵ Kan lâ ba klala bri aula; kuna anira lâ âpu sa kaka, lâ bîla lui sauhkaia lâka sin âpu sa.

¹⁶ Baku bamna, pramis ba yan kasak lukan tâka ba mita, bara baku mika Ebraham kiamka nani ba mapa ra baha ba prisant kabia bara diara kasak pali aihwa sin kabia. Baha tânka ba lika, Gâd mita pramis munan ba lâ bîla wali dauki nani ba baman dukia apia sa, sakuna Ebraham baku kasak luki nani ba sut dukiara. Baku mika witin ba lika yawan sut wan aisika takisa.

¹⁷ Ulbanka ra aisi ba baku: “Man ba nisan ailal aisika mai daukri.” Bamna baha Gâd ra sika Ebraham kasak lukan ba, pruan nani ra rayaka yabi Gâdka ba bara diara kau âpu ba sin yan bal taki ba.

¹⁸ Bahamna bahara lika diara bîla kaikaia lâka âpu kan, sakuna Ebraham ban kasak luki bîla kaikan, bara baku witin “upla ailal aisika” takan, Gâd mita dîa win ba kat: “Man kiamkam numbika ba baku kabia.”

¹⁹ Bamna Ebraham lika pat mani 100 prais almuk kan, sakuna witin ai kasak lukanka lâka ba swapni takras kan. Witin bara Sara wal ba pat pruan praiska kata, luhpa sakaia mapa ra sin witin nani ba uya pali almuk takan kata.

²⁰ Sakuna Gâd bui dîa witin ra pramis munan ba bahki kulkras bara kasak luki kan ba sin swapni takras kata, sakuna kau kasak luki baha kat ai kupia mangki bri kan. Ebraham mita Gâd ra mayunan,

²¹ bamna witin kasak pali luki kan, Gâd karnika brisa dîa dîa witin pramis dauki ba sut daukaia.

²² Naha tâka mita, Gâd mita Ebraham ba kasakkira kulkaia aitani lukan witin kasak luki kan ba mita.

²³ Ebraham kasak lukanka lâka Gâd mita aitani kulkan ba, baha dukiara baman wisi lika ulbras sa;

²⁴ sakuna yawan wan dukiara sin ulban sa. Gâd, witinka mita Jisas wan Dawan pruan wina bukan bara yawan kasak luki ba mita wan kasak lukanka ba pain kulkisa;

²⁵ witin mita Jisas ba yan wan saurka tâwan pruan bara pruan wina kli buan, baku mika Gâd mita kasakkira wan kulkan kaia dukiara.