Roman 3 - DAWAN BÎLA AISKA

¹ Bamna, ¿Ju kaia yamnika ba dîa? ¿Aisa sainka mangkaia ba dîa hilpka bâra sa ki?

² Baha ba uya bara aitani pali sin kulkan sa. Pas pali lika, Gâd mita ai smalkanka ba Ju nani mihta ra mangkan kata.

³ Bamna, ¿baha ba dîa sa ki? Witin nani wina tila nani kasakkira apia kan kaka, ¿baha tâwan Gâd mita baha nani ba kasak apia kaia tânka ra ban swibia?

⁴ ¡Sip apia pali! Sakuna, Gâd lika diara sut ba kasakka lâka kat baman daukisa, upla sut ba kuninkira pali sa sakuna; kan Ulbanka ba wisa: “Man dîa aisisma ba ni kasakkira mai kulkan kabia, lâmka daukan kabia ba ra, bara pura lalura kama.’’

⁵ Sakuna wan saurka lâka ba mita Gâd ba kasakkira sa tânka marikisa kaka, ¿yawan dîa sip sa ki aisaia? ¿Gâd ba saurakira sa ki, witin mita klala wanki ba mita? (Naha na upla natka kat yang aisisna.)

⁶ ¡Sip apia pali! Gâd ba kasak apia kaka, ¿nahki witin sip kabia tasba aiska na lâka daukaia?

⁷ Sakuna yang kuninki ba mita Gâd kasakka lâka ba kau pranakira sakisa kaka, ¿dîa muni upla mita lâika aisi daukisa ki, sim yang na kau upla saura kapri kan baku?

⁸ Bamna baku kaka, ¿dîa muni wiras, saura ba daukbia, diara yamni ba balbia dukiara? Upla kum kum lukan saura brih aisisa, baku pali yang nani mita smalkisna; sakuna baha sât uplika nani ba pât ra dingkan kaia aitani sa.

Yawan sut na pâtkira sa

⁹ ¿Bara dîa? ¿Yawan Ju nani na kau pain sa ki, Ju apia uplika nani ba wal? ¡Sip apia pali! Yawan mita pat winisa, Ju nani bara Ju apia uplika nani sut ba saurka karnika mununhtara sa.

¹⁰ Ulbanka nani ba wisa: “¡Upla yamni dauki ba âpu sa! ¡Kumi sin âpu sa!

¹¹ Tânka briaia uplika ba kumi sin âpu sa, bara Gâd pliki ba uplika kumi sin âpu sa.

¹² Upla sut ba yabal saura ra wan sa, bara sut sin saura lâka ra baman wan. ¡Bamna yamni dauki ba âpu sa! ¡Kumi sin âpu sa!

¹³ Ai kârma nani ba sin raiti durka kwâkan baku sa; ai twisa ba aisi kunin baman sa; ai un nani ba piuta puisinka nani yukuki brisa.

¹⁴ Ai bîla ba watawi bara tahpla lâka ni banhki sa.

¹⁵ Ai mina nani ba aihni plapi taukisa tala laikaia.

¹⁶ Witin nani ai yabalka ra swisa sauhki tikan lâka bara pât tara ba wal,

¹⁷ bara witin nani sin kupia kumi yabalka ba kakaira apia sa.

¹⁸ Piu kumi sin lukras banhwisa Gâd ra sibrinka briaia ba.”

¹⁹ Nanara yawan kaikisa, diara sut lâ wauhkataya ra aisi ba, baha lika baha lâka mununhtara banhwi ba nani dukiara aisisa, baku mika upla sut ai bîla prakan kabia, bara upla sut Gâd lâ dauki ba mununhtara kauhi banhwan kabia;

²⁰ kan Gâd ba upla kum ra sin pri sa wiras sa lâ aiska ba daukan wisa, lâ tânka ba sika naha baman wan marikisa yawan na upla saura nani sa.

Kasak lukan lâka bâk baman swaki wan sakisa

²¹ Sakuna nanara, lâ ba tnaya ra swi si, Gâd bui marikan sa, nahki yawan ra kasakkira nani wan dauki ba, bara naha na lâ wauhkataya nani bara prapit nani ba sin aisi kaiki baha ba kasak marikisa:

²² Jisas Kraist ra kasak luki ba mita, kasak lalukra nani sut ra Gâd bui kasakkira nani daukisa. Kan sât aihka natka âpu sa:

²³ upla sut saura yan bara Gâd mawan wina sin laihura takan.

²⁴ Kuna Gâd ai latwanka tara ba mita, ban mana âpu kira baha nani ba kasakkira kulkan sa, kan Kraist Jisas bâk upla sut swaki sakan sa.

²⁵ Gâd mita Kraist ba saurka mana sakripais kum baku mangkan witin pruanka bâk, bara naha na ai karnika brisa kasak lukan lâka ba mita. Naha na baku takan, kan marikaia want sa, nahki Gâd kasakkira sa bara ai kupia alki takaski kan, patitara saura yan saurka ba ban swin tiwan ba mita.

²⁶ Baha ba tânka nanara upla nani ra marikaia, Gâd lika kasakkira pali sa, bara kau ban kasakkira kabia, ya ya Jisas ra kasak luki ba kasakkira kulki ba mita.

²⁷ Bamna, ¿anira sa ki upla witin baman sa luki ba Gâd mawanra? ¡Âpu daukan sa! ¿Dîa kan baku daukisa? Lâ dîa wan win ba kat daukan ba mita lika apia, sakuna yawan kasak lukan ba mita.

²⁸ Baku bamna, yawan kaikisa upla kumi kasak lukan ba mita Gâd mita kasakkira kulkisa, lâ dîa win ba kat daukan tânka kumi sin âpu kira.

²⁹ ¿Dîa Gâd ba Ju nani baman Gâdka sa ki? ¿Ju apia uplika nani dukia sin apia? Latan sa nisan nani sut Gâdka sa.

³⁰ Gâd ba kumi baman sa, wala âpu; kasakkira luki nani ba witin mita pât wina pri sakisa, Aisa sainka bri nani ba briras nani ba lukras.

³¹ Bamna, ¿naha kasak lukanka lâka na mita yawan lâ ba bahki sakisa ki? ¡Sip apia pali! Sakuna, yawan mita lâ ba kau karna sakisa.