Roman 16 - DAWAN BÎLA AISKA

Upla kumi bani lakula ba

¹ Bamna wan lakra Febe na man nani mihtam ra mangkisna, witin lika Cencreas sertska ra wark pain dauki kan.

² Bamna man nani bui witin na Dawan nina ra luki pain bris, wan muihni nani kasak lukan lâka ra nahki briaia ba baku, bara dîa dîa kra Febe want takbia kaka sin hilp muns, kan witin lika upla ailal ra hilp munan, bara yang pali ra sin.

³ Laikula wis Priscila ra bara Áquila ra, baha uplika nani yang wal asla luki Kraist Jisas warkka dauki kan ba.

⁴ Kan witin nani lika yang swaki ai sakaia tâwan ai rayaka ba pât mihta ra mangkan; yang baman witin nani ra tingki wiras, sakuna Ju apia uplika nani Kraist daknika nani ba sut sin tingki wisa.

⁵ Laikula wis wan muihni nani Priscila bara Áquila wal watla ra bal asla taki banhwi ba sut ra. Laikula wis upliki laitwankira Epéneto ra, witin sika Acaya ra pas upla Kraist ra kasak lukan ba.

⁶ Meri ra laikula yas, witinka man nani tilamra kasak wark takan ba.

⁷ Lakula wis yang kuntriki wina ba Andrónico bara Junias ra sin, witin nani wâl sika yang silak ra ai mangkan, bara witin nani pas sika yang kainira Kraist ra kasak lukan, bara apastil nani tilara tara pali kulkan sa bamna.

⁸ Amplias ra sin laikula wis, Dawan wal asla lâka ra pâinika laitwankira ba.

⁹ Laikula wis Urbano ra, Kraist Jisas wal asla lâka ra, yang nani aikuki wark tatakra ba, bara upliki laitwankira Estaquis ra sin.

¹⁰ Laikula wis Apeles ra, witin Kraist ra kasak luki ba tânka uya pali marikan ba, bara Aristóbulo watla uplika nani sut ra sin laikula wis.

¹¹ Bara laikula sin wis yang kuntriki wina Herodión ra bara Narciso watla uplika sut ra, witin nani Dawan ra kasak luki ba.

¹² Laikula wis Trifena ra bara Trifosa ra sin, witin nani Dawan warkka taki ba. Wan lakra Pérside ra laikula wis, witin uya pali Dawan warkka daukan.

¹³ Laikula wis Rufo ra, witin ba lika Dawan ra kasak lalukra pali sa, ai yaptika ba sin, witin ba yang pali yaptiki baku takan bamna.

¹⁴ Laikula wis Asíncrito ra, Flegonte ra, Hermes ra, Patrobas ra, Hermas ra bara wan muihni nani witin nani wal ba sut ra.

¹⁵ Laikula wis Filólogo ra, Julia ra, Nereo ai muihni wal ra, bara Olimpas ra bara wan muihni kasak lalukra nani witin nani aikuki ba sut ra.

¹⁶ Man nani sin pana pana holi lâka ra kiawali lamkula wis. Kraist sertska nani sut ba mita ai lakula man nani ra blikisa.

¹⁷ Bamna muihki nani, aman kaiki bas baha nani aihka dakwi takaia lâka bara mina prukaia lâka buki banhwi ba, kan baha uplika nani ba lika man nani dîa smalkanka lan takram ba mapara sa. Bamna witin nani wina aihka dakwi taks,

¹⁸ kan bahmuna sât uplika nani ba wan Dawan Jisas Kraist dukia daukras sa, sakuna ai biara warkka daukisa, bara witin nani ai bîla damnika bara ai bîla ni pain aisi ba mita upla sins aitani briras nani ra kunin munisa.

¹⁹ Upla sut kaikisa man nani nahki bîla pain wali daukram; baha ba mita yang uya lilia sna. Bamna yang brin ai daukisa man nani ba diara pain daukaia ridi taki kama, kuna diara saura daukaia lika apia.

²⁰ Bara naika pali kupia kumi Gâdka mita man nani minam mununhtara Sitan ba taibia. Bamna wan Dawan Jisas Kraist mita yamni mai munbia.

²¹ Pâinika Timoti yang wal wark dauki ba mita ai lakula blikisa, bara Lucio, Jasón bara Sosípatro sin, witinka nani kuntriki wina ba.

²² Yang Tercio, naha wauhkataya ulbisna na mita sin laikula blikisna, Dawan wal asla lâka ra.

²³ Gayo sin ai lakula blikisa, witinka mita ai watla ra dingki ai brisa, bara serts uplika wala nani ra sim baku daukisa. Erasto, witinka naha tawanka lalahka main kaiki ba mita sin ai lakula blikisa, wan muihni Cuarto mita sin.

²⁴ [Wan Dawan Jisas Kraist mita man nani sut ra yamni pali mai munbia. Baku kabia.]

Mayunra lâs ba

²⁵ Bara nanara, Gâd ra mayunpi, witinka sip pali ba man nani karnakira mai daukaia, dîa yang swaki sakan lâka bara Jisas Kraist tânka sin mai smalkisna ba baku. Naha tânka na lika Gâd kau tasba paskras kan piua wina, diara yukuki bri kata ba nanara param sakan ba sika,

²⁶ sakuna nanara baha tânka ba param marikan sa prapit nani bâk Ulbanka mita, Gâd ban rayakira adarka ba kat. Naha dahra yukukan kan tânka na nisan sut ra param marikan sa, kasak lukbia bara bîla kat wali daukbia.

²⁷ ¡Baha Gâdka yakan ba sin sinskira ba, Jisas Kraist bâk, ban kaia ra mayunan kabia! Baku kabia.