Roman 13 - DAWAN BÎLA AISKA

¹ Upla sut ba wan tasba wihtka nani ra bawan kaia sa. Kan tasba wihtka kumi sin âpu sa Gâd wina mangkras ba, bara tasba wihtka bâra ba Gâd mita mangkan sa.

² Baku bamna, ya tasba wihtka mapara buisa kaka, witin lika Gâd lâ mangkan ba mapara buisa. Bamna ya tasba wihtka mapara ba, witin pâtkira takan sa, bara baha mita klala yaia aitani sa.

³ Kan tasba wihtka nani ba diara pain dauki uplika nani ra saura munaia mangkras sa, sakuna saura dauki nani ra lika. ¿Bamna man ba tasba wihtka nani sibrinka âpu iwi kaia mai daukisa ki? Pain bas, bara tasba wihtka nani ba mita pât ra mai dingkbia apia.

⁴ Kan tasba wihtka nani ba Gâd warkka daukisa man ra yamni mai munaia dukiara. Sakuna man saura daukisma kaka, sibri kaia sma, kan tasba wihtka nani mita pâtkas lika klala maikbia apia. Witin nani Gâd warkka dauki ba mita, saura dauki nani ra klala yabisa, witin nani briaia praiska ba kat.

⁵ Baha mita, aitani sa tasba wihtka nani ra bawaia, klala briaia apia dukiara baman luki mita lika apia, sakuna wan kupia klir lukanka wina baha ba yawan daukaia ba luki.

⁶ Baha tâwan sin man nani diara lal mana nani aibapisma ba; kan tasba wihtka nani Gâd warkka daukisa.

⁷ Ya bani ra yabaia sma ba uplika ra yas. Dîa lal mana nani aibapaia brisma ba, mahka aibaps; dîa dîa lal mana kaka, yaura pain kulkaia kaka pain kulks, kulkanka bri ba kulkanka ba yas.

⁸ Bamna upla kumi wal sin tras bripara, sakuna upla wala wal pana pana latwan kaikaia traska ba lika bri bas; kan ani uplika mita upla wala ra latwan kaiki ba lika, dîa Gâd lâka wan wi ba sut daukan sika.

⁹ Gâd lâka nani ba wisa: “Man marit lâka sauhkpara, upla ikpara, implikpara, upla dukia sin tumpara”; sakuna naha nani na lâ bîla wala nani sut ba naha bîla nani wal asla prakan sa: “Upla wala ba man wînam baku latwan kaikma.”

¹⁰ Latwan lâka bri uplika ba mita witin ai uplika ra sip saura munras sa; baku bamna, latwan lâka ni lâ aiska ba daukaia sip sa.

¹¹ Naha sut tilara, yawan wan piua iwi na tânka luki bas, bamna kaiki bas yapan wina buaia piua ra sa. Kan blasi kata ba wal nanara lika swaki wan sakan lâka ba kau wan lamara pali sa, yawan nan Dawan bîla smalkan wali kasak lukan ba wal.

¹² Tihmia ba pat aihkika luan sa bara yu baiwaia baila sa; baha mita tihmia ra daukanka saura nani ba mahka swiaia sa; bara suldiar kum baku war aiklabaia dukia nani ba buki bri baku, ingni prâka ba yawan dimaia sa.

¹³ Kakna ra wataukaia ba baku, painkira wataukpi. Yawan bla takbiara, bin dauki plun papira kabiara, tâski lâka daukbiara, lâkas tara baku taukbiara, unsabaia bara misbara lâka sin bribiara.

¹⁴ Sakuna, Dawan Jisas Kraist ba ni war aiklabaia prâka baku dims, bara wînam brinka saura nani baman pliki dauki âmyapah kaia upla natka kaia lukpara.