Roman 1 - DAWAN BÎLA AISKA

Lakula bîla

¹ Yang Pal, Jisas Kraist dukia dadaukra sna, Gâd ai paiwan witin ai apastil kaia bara Gâd bui witin swaki wan saki sturka ba upla nani ra smalkaia.

² Gâd, witin ai prapitka nani bâk, naha sturka na pat aisin kan Ulbanka holikira nani ra.

^3-4 Baha sturka ba sika, witin ai Luhpia wan Dawan Jisas Kraist dukiara aisi ba, witin lika upla aihwa baku king Debit kiamka wina takan, sakuna witin pruan wina kli buan ba tâka mita, karnika aiska wal Gâd Luhpia baku kulkanka yaban sa, holi dadaukra Spiritka baku.

⁵ Bara Jisas Kraist bâk, Gâd bui yang na witin ai apastilka baku ai blikan, witin ai nina sturka ba aisaia, nisan nani sut tilara witin ra kasak luki ai bîla wali dauki ba bâra kaia.

⁶ Man nani sin baha nani tila nani sma Rom ra iwi banhwisma ba. Gâd latwan mai kaikisa mita Jisas Kraist mai paiwan sa.

⁷ Bahamna man nani Rom ra iwi banhwisma ba sut ra mai ulbisni, Gâd latwan kaiki mai paiwan ba, witin bui ai uplika holikira kaia dukiara. Gâd wan Aisa bara Dawan Jisas Kraist mita yamni mai munbia bara kupia kumi lâka sin maikbia.

Pal Rom wih kaikaia ai brinka sa

⁸ Tâura Jisas Kraist bâk yang Gâdki ra man nani sut dukiamra tingki wisni, kan tasba aiska ra man nani kasak lukankam lâka ba aisisa.

⁹ Bamna Gâd, yang kupi aiska ni witin warkka daukisna bara ai Luhpia sturka yamni sin aisisna ba, witin ba witnis sa nahki puri sunra bani ra man nani ra lukisna ba,

¹⁰ piua bani Gâd ra makabisna, witin ai kupia lâka ba kat yang ra yabal kum sâkbia, man nani ra balaia.

¹¹ Kan yang bui man nani mai kaikan ai daukisa, bara spirit hilpka sin maikaia, bara baku lika man nani kau karna taki kama;

¹² baha tânka ba lika, kasak lukan lâka yang bara man nani brisma ba ni pana pana hilp munaia.

¹³ Bamna muihki nani, brin ai daukisa man nani kaiki kama, nahki aima ailal brin ai daukan bal mai kaikaia, sakuna naha piua kat sin ban sip apia sna. Man nani ra balan ai dauki ba lika upla tila nani Dawan ra laki brih balaia, sim nisan wala nani tilara briri ba baku.

¹⁴ Baha ba yang bui upla sut ra daukaia sna, sins lâka bri nani ra bara sins lâka aitani briras nani ra, diara tânka bri nani ra bara diara tânka briras nani ra sin;

¹⁵ baku bamna, yang maipa ra ridi pali sna, swaki sakan lâka sturka ba Rom ra iwisma nani ra sin mai smalkaia.

Sturi yamni karnika ba

¹⁶ Sturi yamni smalkanka ba dukiara yang swiri lukras sna, kan baha ba Gâd karnika sa swaki sakaia ya ya kasak lukbia ba, tâura Ju nani ra, bara Ju apia nani ra sin.

¹⁷ Naha smalkanka na wan marikisa, nahki natka ra mita Gâd wan pâtka ba wina pri wan sakisa, baha lika kasak lukan lâka bara kasak lukan lâka baman pali sa. Ulbanka ra aisi ba baku: “Kasakkira ba kasak luki ba mita raya kabia.”

Tasba uplika nani pâtka ba

¹⁸ Bamna yawan kaikisa, Gâd lawanka tara sibrinkira pali ba kasbrika pura wina aula, upla saura kasak apia nani ba purara, baha nani ai watawika lâka ba ni kasakka lâka tânka ba briaia apia daukisa.

¹⁹ Witin nani Gâd kakaira takaia tânka ba pain kaikisa, kan Gâd pali mita param marikan sa;

²⁰ Gâd wina yang nani sip kaikras ba, witin diara nani paskan bâk kaikisa. Baha ba sip sa param pali kaikaia, tasba paskan piua ba wina, witin ba Gâd sa bara piua bani karnika ban brisa; baku bamna, saura dadaukra nani ba aisi sip swak takbia apia.

²¹ Bamna baku Gâd ra kakaira sa, sakuna Gâd ra mayunras bara tingki sin wiras. Kau ni diara bahki nani ra baman ai lukanka mangkan, bara witin nani ai kupia tanis ba tihmia ra bamna, ba kat takaskan sa.

²² Witin nani bila sinskira nani sa, sakuna witin nani sika kau sinskas ba;

²³ kan ban kaia ra pruras, Gâd ra prana ba swi si, pruaia uplika lilka ra ni tawan, ban sin daiwan tnawira nani bara kwasi nani lilka ra, bara daiwan mina walhwal bri nani ra sin.

²⁴ Baha tâwan Gâd mita witin nani ra tâski brinka dauki kan ba kat lulki swin, bara baku witin nani wala wal wan swira dukia nani ba daukan;

²⁵ kan witin nani Gâd kasakka lâka ba kasak lukras, kunin lâka ni kulkan, bara Gâd paskan dukia nani ra ni ai pura suni mayunan, Gâd pali ra lika apia, bara witinka pali ra sika mayuni ban kaia ba. Baku kabia.

²⁶ Baha mita Gâd bui witin nani ba swira lâka tâski pali ra ban lulki swin; mairin nani waitna wal prawi daukaia lâka kata ba swi si, mairin ai tahkia wal daukan.

²⁷ Baha sim natka ra waitna nani mairin nani wal prawaia lâka kata ba swi si, witin nani ai brinka saura laptika ba kat ni ai walka nani wal lihkan. Waitna wih waitna ai tahkia wal swira lâka tara daukan. Bara pât wahwisa klauna ai wîna tara kat ai saurka klalka ba brisa.

²⁸ Witin nani Gâd kakaira takaia want apia sa bamna, Gâd mita witin nani ba ai lukanka saura nani ba kat lulki swin, swika baha nani dîa daukaia apia kan ba kat daukbia dukiara.

²⁹ Rausauhkan lâka sâtka nani sut ba ni banhwan sa lâ saura nani, gridi lâka bara lukanka saura, tuman lâka bri nani, upla âikra, unsasabra, kunin mamunra nani, saura dadaukra, bara upla nina aisasara.

³⁰ Witin nani lika upla wala nani dukiara saura aisisa, Gâd waihla nani, saura aisasara nani, diara lalihkra nani bara kakalra nani, saurka lâka sâtka nani daukaia pliki saki ba, ai aisika nani bîla walras,

³¹ sins lâka aitani briras nani, ai bîla aisi ba kat daukras nani, upla wala ra latwan kaikras nani, upla wala pâtka swih tikras nani, bara umpira kaikan lâka luha nani.

³² Witin nani pain kaikisa Gâd lâ mangkan sa, ya naha sât dukia nani dauki ba pruaia aitani sa; ban sakuna, witin nani mita ban daukisa, bara upla wala nani dauki ba sin pain lukisa.