Param Marikanka 7 - DAWAN BÎLA AISKA

Israel kiamka nani tânka mariki ba

¹ Naha ningkara, yang insal walhwal kaikri, bara baha nani ba wan tasba mapa walhwal ba purara ai mina ra bûi banhwi kan, bara witin nani mita wan tasba payaska walhwal ba dutki alki kan, baha ba wan tasba purara wiria pan yaka krawbia apia dukiara, kabu purara sin apia, dus kumi purara sin apia.

² Insal wala kum sin lalma wina aula kan kaikri, bara witin lika Gâd rayakira sîlka ba bri kata. Naha insalka ba ai bîla baikra tara ni insal walhwal tasba ra bara kabu ra rausauhkaia karnika, Gâd wina brin nani ba ra wini, win:

³ “¡Man nani tasba ra saura munpara, kabu ra, dus nani ra sin watawi munpara, yang nani wan Gâdka dukia dadaukra nani ba lal purara sîl kum ni sain mangkamna ba kat!”

⁴ Bara sîl mangkan uplika nani kulkan ba walri; baha ba naku kata: Israel uplika kiamka sut wina 144,000.

⁵ Juda kiamka wina 12,000 sîl mangkan kan; Ruben kiamka wina 12,000; Gad kiamka wina 12,000;

⁶ Aser kiamka wina 12,000; Neftalí kiamka wina 12,000; Manasés kiamka wina 12,000;

⁷ Simian kiamka wina 12,000; Libai kiamka wina 12,000; Isacar kiamka wina 12,000;

⁸ Zabulón kiamka wina 12,000; Josep kiamka wina 12,000; bara Benjamín kiamka wina 12,000.

Upla kwâra tara kwala pihni diman kan ba

⁹ Baha ningkara yang kaikri, bara bahara upla ailal pali bâra kan, bara ailal kan bamna upla kum mita sin sip kulkras kata. Baha nani ba nisan sât sât wina, taika sât sât wina, bîla aisi sât wina, bara upla nani sât sât wina kan, bara king iwaika ba mawanra bara Sîp Luhpia ba mawanra sin bûi kan. Witin nani kwala pihni dimi kan, ai mihta nani ra sin dus wahia sâtka nani bri kata.

¹⁰ Witin nani sut ai bîla baikra tara wini, aisi kan: “¡Pura luan lâka ba wan Gâdka dukia sa, witinka king iwaika ra iwi ba, bara Sîp Luhpia ba dukia sin!”

¹¹ Bara insal nani ba sut king iwaika ba kir, almuk nani ba, bara diara rayakira walhwal ba sin kir bûi kan; bara king iwaika ba mawanra ai mawan nani ra kauhi, Gâd ra mayuni,

¹² naku aisi kan: “¡Baku kabia! Mayunra ba, prana ba, sins lâka ba, tingki lâka ba, kulkan lâka ba, karnika ba, bara karna kaia lâka ba sut sin, wan Gâdka ra yan kabia, ban kaia ban kaia ra. ¡Baku kabia!”

¹³ Bara almuk nani ba wina kum, yang ra ai makabi walan: “¿Naha nani kwala pihni dimi nani na, ya sa? ¿Bara ani wina witin nani balan?”

¹⁴ Yang bui wîri: “Dawan, man baman kaikisma; yang lika kaikras.” Bara witin ai wisata: “Naha nani sika trabil tara bâk lui aula ba, bara ai kwalka nani tuskan ba Sîp Luhpia ba tâlia ra pihni daukan sa.

¹⁵ Baha mita Gâd king iwaika mawanra buisa, bara ai tempelka ra kakna bara tihmia ai dukia daukisa. Witinka king iwaika ra iwi ba witin nani tilara ban takaski ai kaina kahbia.

¹⁶ Witin nani kli plun wauhbia apia, lî din sin daukbia apia; wan yu laptika ambia apia, lapta wala mita sin munbia apia,

¹⁷ kan Sîp Luhpia ba, witinka king iwaika lilapas kat ba witin nani ra sîp baku main kaikbia, bara witin nani ba raya kaia laya kârma nani kat brih wabia; bara Gâd bui witin nani nakra wina nakra laya nani ba sut diki sâkbia.”