Param Marikanka 3 - DAWAN BÎLA AISKA

Sardes ra ulbi blikisa

¹ “Sardes sertska insalka ra sin ulbi wis: ‘Gâd spiritka 7 bri ba bara slilma sin 7 bri ba naha aisisa: Dîa daukisma ba, yang sut kaikisna, bara kaikisna man ba pruram sa sakuna sturka brisma ba lika raya sma.

² Rawi bus, bara diara nani kau brisma ba mahka dutki alki dauks, kau aiska pali pruras ba ra; kan yang kaikri man diara daukisma ba, Gâdki mapara kasak aihwa apia sa.

³ Kupiam krauki bas smalkanka briram ba, bara baha nina blîks bara kli tawi Gâd ra bal. Man raya apia kama kaka, âimplikra baku man ra wamna, bîli kaikras kama ba ra.

⁴ Ban sakuna, Sardes nani tilara brisma, baha nani lika kau ai kwalka nani tâski daukras; witin nani lika yang wal kwala pihni dimi tauki kabia, baha nani ba baku kaia aitani sa bamna.

⁵ Ani uplika nani sip muni pura lubia ba, kwala pihni ni dingkan kabia, bara raya kaia wauhkataya wina, yang ai nina nani ba diki sakamna apia. Aisiki mawanra bara ai insalka nani mawanra sin, yang param wimna witin nani ba yang duki kulkisna.

⁶ ¡Ya ai kiama bri, Spirit ba dîa serts nani ra aisi ba walaia sa!’

Filadelfia ra ulbi blikisa

⁷ “Filadelfia sertska insalka ra sin ulbi wis: ‘Naku wisa witinka holi bara kasakkira ba, king Debit kî mihta bri ba; witin dur ba kwâkuya ba ra, upla kumi mita sin sip prakras; bara witin prakuya ba ra, upla kumi mita sin sip kwâkras ba:

⁸ Dîa daukisma ba sut yang kaikisna; kaiks mamwanra dur kwâkan kum mangkri sa, bara baha ba upla kumi mita sin sip prakras sa; man karnika wiria man brisma, sakuna yang bîli ban wali kapram ba ra, yang ai kulkaia apia wiras kapram.

⁹ Baku bamna, Sitan daknika wina nani ba, witinka nani kuninkira Ju wisa sakuna baku apia ba, yang munrika wih minam ra ai lula krikbia, bara kaikbia yang bui man ra latwan mai kaikisna.

¹⁰ Ban bapi buaia lâika ba ban bri kapram, baha ba mita tasba aiska ra trabil balaia piua ba wina ban pain mai bri kamna; baha trabilka ba lika tasba ra iwi uplika sut ra traika kaikbia sa.

¹¹ Yang aihni aulni. Bamna dîa brisma ba pain alki bri bas, upla kumi mita sin prisantkam ba mihtam wina dakbi bribia.

¹² Ani uplika nani sip muni pura lubia ba, yang baha nani ra Gâdki tempelka ra walpa bapanka baku daukamna, bara baha wina kli taki wabia apia ban kaia ra. Witin nani ra Gâdki nina ba ulbamna, Gâdki tawanka nina ba sin, baha ba Jerusalem raya kasbrika purara ba wina bara Gâdki wina aula ba. Witin nani ra sin nini raya ba ulbamni.

¹³ ¡Ya ai kiama bri ba, Spirit mita serts nani ra dîa wi ba walaia sa!’

Leodisia ra ulbi blikisa

¹⁴ “Leodisia sertska insalka ra sin ulbi wis: ‘Naku wisa witinka Kasakkira ba, witnis kasak bara diara kasak kat aisi ba, Gâd diara sut paskan ba tâ wina:

¹⁵ Dîa daukisma ba, yang sut kaikisna. Yang kaikisna man ba kauhla apia sma bara lapta sin apia. ¡Aitani lukamna man ba kauhla, apia kaka lapta katma kaka!

¹⁶ Sakuna man ba bitu sma bamna, bara kauhla sin apia, lapta sin apia sma ba ra, bîli wina aikabi mai sakamna.

¹⁷ Kan man ba lalahkira wisma, bara diara sut mapara pain baman, bara diara luha apia sma; sakuna damra walras sma man ba trabil saura ra sma, umpira pali sma, diara âpu, blain, bara kwala sin âpu.

¹⁸ Baha mita, man ra mai smalki mai wisni, yang wina gul pauta ra pain pali slilkan ba atkma, bara baha mita kasak pali yuyakira kama. Yang wina sin kwala pihni atks, bara wînam kwala âpu swiram kira ba dimaia. Yang wina sin wan nakra saika atks, bara namkra diara kaikaia sip kama.

¹⁹ Yang lika latwan kaikisna bara uplika sut ra lawi daukisni, wapni sin daukisna. Baku bamna, man kasak bas bara kupiam sin laks.

²⁰ Kaiks, yang dur ra kingbisna; ya yang bîli baikra wali dur ba kwâkbia kaka, ai watla ra dimi witin wal plun pimna.

²¹ Ya ya sip muni pura lubia ba, yang king iwaiki ra plis kum yabamna, yang wal iwaia, sim yang mita pura lui Aisiki wal ai king iwaika ra iwisna ba baku.

²² ¡Ya ai kiama bri kaka, Spirit mita serts nani ra dîa wi ba walaia sa!’ ”