Param Marikanka 21 - DAWAN BÎLA AISKA

Kasbrika pura raya bara tasba raya ba

¹ Baha ningkara, yang kasbrika pura raya kum bara tasba raya kum sin kaikri. Kasbrika pura pas kata ba, bara tasba pas kata ba sin lap tiwan, bara kabu sin kli âpu kan.

² Yang tawan holi ba kaikri, Jerusalem raya ba, kasbrika purara ba wina bal iwuya kan, Gâd mawan wina. Baha ba pain pali ridi daukan kan, marit takaia mairka kum ai waitnika wal prawaia kwala pain dimi ba baku.

³ Bara yang bîla baikra tara kum walri king iwaika ba wina naku aisi kan: “Kaiks, nanara Gâd ba upla nani tilara ai watla brisa. Witin nani wal iwbia, bara witin nani ba ai uplika nani pali kabia, bara Gâd lika witin nani wal kabia, ai Gâdka kaia dukiara.

⁴ Witin nani nakra laya ba sut dikbia, bara prura kau âpu kabia, inanka, pura mata inaia lâka, latwanka sin; kan diara almuk nani ba sut lui wan sa.”

⁵ Bara king iwaika ra iwi kan ba naku aisin: “Kaiks, nanara yang diara nani ba sut raya daukisni.” Naku sin win: “Naha na uls, kan bîla nani na kasak sa bara baha nani kat kasak kulkaia aitani sa.”

⁶ Baha ningkara ai win: “Pat daukan sa. Yang sika A ba bara Y ba. Ya diran dauki ba, yang raya kaia laya kârma ba wina yârika dibia, baha ba mana âpu pri pali.

⁷ Bamna ani uplika nani sip muni pura lui bubia ba, naha sut ai dukia bribia; bara yang na witin nani Gâdka kamna, bara witin nani ba yang luhpi nani kabia.

⁸ Sakuna sasibrira nani ba, kasak lukras nani ba, uya saura takan nani ba, upla âikra nani ba, tâski lâka baman dauki nani ba, sukia warkka dauki nani ba, aidul nani ra ai pura suni mayuni nani ba, bara kuninkira nani ba sut sin, witin nani lika pauta lakni sulpa ni klauhi ba ra waia kabia; baha sika prura wala ba.”

Jerusalem raya ba

⁹ Baha insal 7 kata ba wina kum ba kâp 7 bri balan lâs pât tara 7 ba, bahara banhki bri kan, bara naku ai win: “Bal, tiara Sîp Luhpia maya takaia ba mamrikaia sna.”

¹⁰ Spirit ba yang purira karnika brin, bara insal ba mita il tara kum purara ai brih wan. Witin Jerusalem, tawan holikira ba, ai marikan; baha ba lika kasbrika pura ba wina bal iwuya kan, Gâd mawan wina.

¹¹ Baha tawanka ba Gâd ingnika ni ingwi kan, bara ai ingnika ba walpa painkira pali baku kan, jasper walpaya baku, glas klin pali baku.

¹² Tawanka ba kir walpa ni kutban kan, baha ba tara bara purara pali; get 12 bri kan bara getka bani ra insal kum. Israel taika nina 12 ba sin getka nani ra ulban kan.

¹³ Tani bani ra get yumhpa bri kan: lalma tani ra yumhpa, yahbra tani ra yumhpa, waupasa tani ra yumhpa, bara muna tani ra yumhpa.

¹⁴ Tawanka walpaya kutbanka ba walpa 12 purara bapan kan, bara baha nani purara Sîp Luhpia apastil 12 nani nina ba ulban kata.

¹⁵ Yang ra ai aisi kan insalka ba lika kulkaia dusa gul ni paskan kum bri kan, baha ni tawan ba, ai getka nani, bara walpa kutbanka ba kulki kaikaia.

¹⁶ tawan ba skwir pali kata; yarika ba, bîla yahpika wal baku kan. Insalka ba kulkaia dusa ba ni tawan ba kulki kaikan, bara baha ba 1,500 mail bri kan; yarika ba bîla yahpika ba purara ba sut kumi baku kan.

¹⁷ Baha ningkara walpaya kutbanka ba kulkan, bara baha lika 216 pît pura kata, upla nani kulki praiska ba baku, insal kulki kan ba kat.

¹⁸ Walpaya kutbanka ba jasper walpaya ni paskan kan, bara tawan ba lika gul aihwa pali ni kan, glas klin talia baku.

¹⁹ Walpaya kutbanka playka nani ba walpa painkira sât sât ni skahkan kan: pas ba, jasper walpaya ni; wala, sapair walpaya ni; yumhpika ba, agat walpaya ni; walhwalka ba, esmeralt ni;

²⁰ matsipka ba, onis walpaya ni; matlalkahbika ba, karnilian walpaya ni; matlalkahbi pura kumika ba, krisopres walpaya ni; matlalkahbi pura wâlka ba, beril walpaya ni; matlalkahbi pura yumhpika ba, topas walpaya ni; matawalsipka ba, krisopres walpaya ni; matawalsip pura kumika ba, jasint walpaya ni; bara matawalsip pura wâlka ba lika, amatist walpaya ni.

²¹ Getka 12 ba walpa klauhira sâtka 12 ni paskan kan; get kumi ba walpa sât kumi. tawan wakpaska ba gul aihwa pali kan, glas sangnika baku.

²² Tawanka ba ra yang tempel kumi sin kaikras, baha ba Dawan Gâd, karnika sut bri ba, witinka sin Sîp Luhpia ba, witin ai tempelka sa bamna.

²³ Tawanka ba wan yu lapta ba, kati ba sin, ai ingnika yaia apia kabia, Gâd ingnika pali ba witin ra ingwisa bamna, bara Sîp ba ai lampka sa.

²⁴ Tasba ra iwi uplika nani swaki sakan ba, baha tawanka ingnika ra wapi kabia, bara tasba kingka nani ba ai prana bahara bri bal dingkbia.

²⁵ Ai getka nani ba kakna piua prakan kabia apia, bara bahara tihmia âpu kabia.

²⁶ Nisan nani prana ba bara yuyaka ba tawanka ba ra bri sal dingkan kabia.

²⁷ Sakuna tâski dukia kumi sin, upla diara saura pali bara kunin sin aisi ba, bahara sip dimbia apia. Baha nani ai nina ba raya kaia wauhkataya Sîp Luhpia bri ba ra ulbi mangkan ba baman, tawanka ba ra dimbia.