Param Marikanka 20 - DAWAN BÎLA AISKA

Mani 1,000 ba

¹ Yang insal wala kum kasbrika pura ba wina bal iwuya kan kaikri, ai mihta ra tihu tara kî ba brih, bara sîn tara sin kum.

² Naha insalka na dragunka ba alkan, baha piutka almuk ba, witinka dibil bara Sitan ba, bara witin ba priskan mani 1,000 prais kat.

³ Tihu tara ra lulkan, bara bahara durka praki baha purara sîl mangkan, bara baku nisan nani ra kau kunin munbia apia dukiara, mani 1,000 ba lubia kat. Mani 1,000 ba lubia ningkara, witin ba lanhkan kaia sa piua wiria baman.

⁴ Bara yang lika king iwaika nani kaikri, baha nani purara iwi nani kan ba sin; witin nani ba lâ daukaia karnika brin kan. Bara yang kaikri baha nani Jisas witniska taki kan bara Gâd sturka yamni ba tâwan, lal dakban sulka nani ba sin. Witin nani lika daiwan saura nani lilka ra sin ai pura suni mayunras kan, baha markka sin ai lal purara bara ai mihta ra yan mangkras kata. Yang kaikri naha nani kli raya takan, bara Kraist wal mani 1,000 king aimakan.

⁵ Sakuna pruan nani wala ba lika kli raya takras kan, baha mani 1,000 luan ba kat. Naha sika pruan wina pas buanka ba.

⁶ Yamni pali bara holikira sa, baha nani naha pruan wina pas buanka tilara bubia nani ba. Prura wala ba witin nani purara karnika kumi sin âpu sa; ban sakuna, witin nani Gâd bara Kraist wal baku nani kabia, bara witin wal mani 1,000 king aimaki kabia.

Dibil ba sauhki tikisa

⁷ Mani 1,000 ba luan kabia ba ra, Sitan mihta ba lanhkan kabia,

⁸ bara tasba aiska nisanka nani ra kunin munaia taki wabia. Witin mita Gog bara Magog kunin munaia wabia, bara baha wal suldiarka daknika nani ba asla daukbia war aiklabaia dukiara; baha daknika nani ba lika ailal pali sa, sim kabu auhika baku.

⁹ Witin nani tasba bîla yahpika ra bal ulan, bara Gâd uplika nani kiampka ba, bara witin latwan kaiki tawanka ba sin kir kutbi brin. Sakuna Gâd mita kasbrika purara ba wina pauta klauhan blikan, bara baha nani sut angki âpu daukan.

¹⁰ Bara dibil ba, witin nani ra kunin munan kan ba, pauta klauhan sulpa wal klauhi kan lakunka ba ra lulkan kata; bahara sika daiwan saura ba prapit kuninkira ba wal lulkan kan ba. Bahara witin nani rausauhkan kabia kakna bara tihmia, ban kaia ra ban.

King iwaika pihni mawanra lâ daukan ba

¹¹ Bara yang lika king iwaika pihni kum kaikri, baha purara iwi kan ba sin. Ai mawan wina tasba bara kasbrika pura ba aiska lap tiwan, bara baha nani pliska kumi sin sip kaikras kan.

¹² Bara pruan nani ba kaikri, tara nani bara sirpi nani, Gâd mawanra ai mina ra bûi kan. Wauhkataya nani ba kwâkan kan, bara wauhkataya wala sin kum, baha sika raya kaia wauhkataya ba. Pruan nani ba dîa dauki kan ba kat lâka daukan kata, dîa baha wauhkataya nani ra ulban ba kat.

¹³ Kabu ba mita ai pruanka nani yan. Prura ba mita bara pruan nani pliska ba sin pruan nani bahara nani kan ba yaban; bara sut lâka daukan kan, kumi bani dîa daukan kan ba kat.

¹⁴ Baha ningkara, prura ba bara pruan nani pliska ba wâlsut pauta lakni lakunka ra lulkan kan. (Pauta lakni lakunka na sika prura wala ba.)

¹⁵ Ani uplika nina raya kaia wauhkataya ra ulbras kan ba, pauta lakni lakunka ra lulkan kata.