Param Marikanka 18 - DAWAN BÎLA AISKA

Babilon tawanka kauhi aisawan ba

¹ Naha ningkara, yang insal wala kum kasbrika pura ba wina bal iwuya kan kaikri. Witin na karnika bri kan, bara ai ingnika ba mita tasba aiska na ingni takan.

² Bara ai bîla baikra tara ni wini kan: “¡Pat kauhan, pat kauhan Babilon tara ba! Nanara witin na dibil nani bara pirit saura nani watla takan sa; pirit saura tâski nani watla daiwan wail tâski misbarkira nani watla takan.

³ Kan upla sut ai rugka lâka saura wainka karna ba dih bla taki banhwan. Naha tasba kingka nani sut witin wal tâski lâka daukan, bara tasba ra diara âiatkra nani ba lika, witin ai yuyaka ailal tanis tiki kan ba wina lalahkira nani takan.”

⁴ Bara yang bîla baikra wala kum, kasbrika pura ba wina naku aisi kan walatna: “Yang upliki nani, baha tawanka ba wina bal taks. Baku lika ai saurka nani ba aikuki brima apia bara ai pâtka tara nani ba sin mai alkbia apia.

⁵ Kan ai saurka nani ba aipaswi taki, kasbrika purara ba kat alkan sa, bara ai watawanka nani ba Gâd ai kupia ra bri kan.

⁶ Upla wala nani ra dîa yaban ba baku, witin ra sin yas, bara dîa daukan ba mana wâl prais aibaps. Ai kapka upla wala nani ra diaia dukia abalki yan ba, witin ra aima wâl prais kau karna abalki yas.

⁷ Witin ai wîna ra aimayuni ai liliaka tanis brin ba baku, sim daukan ba mana kat yas, witin ra latwan bara rausauhkan sin yas. Kan witin ai kupia ra wisa: ‘Yang lika nahara kwin mairin baku iwisna; piarka apia sni, latwan sin wahwamna apia.’

⁸ Baha tâwan, yu kumi bilara ai pâtka tara nani ba balbia: prura, sari, bara plun wahwan; witin ba pauta ni angkan kabia. Kan Dawan Gâd, witinka ra lâka dauki ba, karnakira sa.”

⁹ Tasba kingka nani witin wal tâski lâka daukan ba, ai yuyaka sin tanis tiki kan ba, baha tawanka ba pura mata ini yahwi kabia, witin ami ba kiasmika kaikbia ba ra.

¹⁰ Witin nani Babilon rausauhkanka ba sîa laihura takaski, naku aisi kabia: “¡Alai, alai, Babilon, tawan tara, tawan karnikira! Wan nakra klipan kum ra klalkam balan sa.”

¹¹ Tasba aiska ra diara âiatkra nani ba sin baha tawanka pura mata ini sari takbia, kan diara nani kwahki atki ba upla kumi sin atkaia âpu sa;

¹² diara nani kwahki gulka nani, ai silbarka nani, ai walpaya manira nani, ai walpaya klauhira nani, linin kwalka painkira nani, silk kwalka nani, balianta talia kwalka nani bara kwala pauni nani suni kan ba; dus kîa painkira sât sât, elepant napa ni paskan dukia nani, dus painkira ni paskan dukia nani, bras ni paskan dukia nani, ayan ni bara walpa pihni ni paskan dukia nani;

¹³ bara sinimint, sîka kîa yamni nani, dus mâka kîa yamni nani, bara isint, wain, batana, plawar kau pain ba, plawar sin; wark takaia daiwra nani sin brih balan, sîp nani, aras nani, karita nani, alba nani, upla rayaka nani sin.

¹⁴ Bara tawanka uplika ra wibia: “¡Dus mâ nani auhnira man bri kapram ba, nanara sip briras sma man uya want katma ba; baha sut man tikram sa, diara painkira nani bara yuyaka nani brisma ba sut!”

¹⁵ Naha dukia nani bisniska dauki, baha tawanka wina yuyakira nani takram ba, klala briaia ba sîa laihura takaskbia. Witin nani ini sari karna wini iwbia,

¹⁶ bara naku wibia: “¡Alai, alai, tawan tara ba mapara saura pali sa! Mairin kum linin kwalka painkira dimi bara kwala balianta talia pauni wal dimi baku kan, bara gul ni, walpa manakira nani bara walpa klauhira nani ni ai wîna tara ba skahki kan.

¹⁷ ¡Bara nakra klipan lupia kumi bilara yuyaka ailal kan ba sut âpu takan!” Duri tara kiaptinka nani sut, impapakra nani, selar nani bara kabu ra wark taki kan nani ba sin, sut laihura takaskan,

¹⁸ bara tawanka ami ba kiasmika kaiki, ai pura wini banhwan: “¿Ani tawanka wala naha tawanka tara na wal praki kaikbia?”

¹⁹ Ai lal nani purara yamhpus mangkan, bara ini sari taki, naku ai pura wini kan: “¡Alai, alai, tawan tara ba mapara saura pali sa! Ai yuyaka ni kabu ra slaup nani bri kan ba sut yuyakira takan; ¡bara aihni pali witin ba pat sauhki tikan sa!”

²⁰ Sakuna, man, kasbrika pura, liliam bas, baha tawanka tara ba tâka; man nani liliam bas, Gâd uplika nani sma ba, apastil nani bara prapit nani, kan Gâd mita witin ba pât ra lakan ba ra, kasakka lâka ba man nani ra daukan sa.

²¹ Bara insal karnakira kum ba walpa kum bukan, baha ba akbaia walpaya tara baku kan; bara kabu ra lulki, naku win: “Babilon, tawan tara ba, sim naha walpaya naku mai batakan kabia, bara upla kumi sin kli mai kaikbia apia.

²² Bara yabalkam nani bilara arp nani binka, plut nani binka, trumpit nani binka sin kli walbia apia; wark tatakra sât sât sin man ra kli âpu kabia, akbaia walpaya binka ba sin man ra kli walbia apia.

²³ Lamp kumi ingnika sin man ra kli angkan kabia apia, marit takan lilia binka nani sin kli walan kabia apia. Dukiam âiatkra nani ba tasba aiska ra kau karnika bri kan, bara sukikam lâka ni nisan sât sât nani ra kunin munram ba.”

²⁴ Kan baha tawanka ra sika, Gâd prapitka nani tâlia, Gâd uplika nani tâlia sin bahara kaikan bamna, naha tasba ra ikan nani tâlia ba sin sut.