Param Marikanka 17 - DAWAN BÎLA AISKA

Rug mairin tara saurka pâtka ba

¹ Bara insal 7 kâp 7 bri kan ba wina kumi ba bal, yang ra naku ai win: “Bal, bara yang mairin rugkira tara klala briaia ba mamrikamna, witin lî nani purara iwi ba.

² Naha tasba kingka nani, witin wal rug lâka daukan, bara tasba ra iwi uplika nani ba witin rugka lâka wainka ba dih bla takan.”

³ Spirit ba ai karnika munhtara ai brin, bara insal ba mita upla iwras tasbaya ra ai brih wan. Bahara mairin kum kaikri daiwan saura pauni kum purara iwi kan, bara daiwra wîna tara pura aiska ba, Gâd mapara saura aisaia nina baman kan; baha ba lal 7 bri kan, aringka sin matawalsip.

⁴ Mairka na kwala balianta talia bara pauni sin dimi kan, gul ni, walpa painkira nani bara walpa manakira nani ni sin aiskahkan kan. Ai mihta ra gul kapka kum bri kan diara tâski baman banhki, ai rugka lâka dukia saura sin banhki.

⁵ Ai lal purara sin dahra prakan nina kum ulbi bri kan: “Babilon tara ba, mairin rugkira nani yaptika bara tasba ra misbara lâka nani ba sut yaptika sin kan.”

⁶ Bara kaikri mairka ba, Gâd uplika nani tâlia bara Jisas witniska taki kan tâwan ikan nani ba tâlia dih, witin bla takan. Yang baha kaikri ba ra, aihka pali tâ iwri.

⁷ Bara insal ba ai win: “¿Dîa kan aihka pali lukram sa ki? Yang mita mairka dahra prakan tânka ba mai wimna ba ra, daiwan saura witin ra brih auya dahra prakan ba sin, baha daiwra lal 7 bara aringka matawalsip bri ba.

⁸ Bara daiwra saura kaikram ba lika pas piua raya iwi kan, sakuna nanara âpu sa; ban sakuna, witin ba tihu tara ba wina uli balbia ai pruanka tnata pali ba ra waia kainara. Tasba ra iwi uplika nani, tasba paskan wina kau ai nina nani raya kaia wauhkataya ra ulbi mangkras ba, daiwan saura na kaikbia ba ra, aihka pali lukbia. Kan baha ba kanra raya kata, bara nanara lika âpu sa, sakuna witin kli balbia.

⁹ “Nâra sika ani uplika sins lâka bara diara tânka briaia sip ba mapa ra tânka kum sa: Lal 7 ba lika, il 7; baha ilka nani purara mairka iwi ba; baku sin baha lal nani ba king nani 7 tânka sa.

¹⁰ Baha nani wina matsip pat kauhan sa, kum ba nanara king aimakisa, bara wala ba lika kau balras; bara ningka pali ba balbia ba ra, witin wihka takaskbia apia.

¹¹ Daiwan saura kanra raya kan sakuna nanara âpu ba, baha kat 8 king; witinka na 7 ba wina kumi sa, sakuna baha ningkara sauhki tikan kaia pâtka ra auya.

¹² “Aringka matawalsip kaikram ba king matawalsip sika, bara baha nani king aimakaia lâka ba kau briras; sakuna witin nani king aimakaia karnika bribia awar kum prais, daiwan saura ba wal asla.

¹³ Kingka matawalsip ba sut ai lukanka kumi brisa, bara witin nani ai kamisanka ba, ai karnika ba sin daiwan saura ba ra yabia.

¹⁴ Witin nani Sîp Luhpia ba mapara aiklabi kabia, sakuna Sîp Luhpia ba witin nani pura lubia; kan witin ba Dawan nani dawanka sa, King nani kingka sin, bara witin wal nani ba lika, Gâd mita paiwan sa bara wahbi sakan sa, bara kasak sin banhwisa.”

¹⁵ Insal ba sin ai wisata: “Lî nani kaikram ba, baha nani purara mairin rugkira iwi ba lika upla nani atia, kwâra nani, bîla sât sât aisi nani, bara nisan sâtka nani sin.

¹⁶ Bara aringka matawalsip daiwan saura bri kan kaikram ba mita mairin rugkira ba ra misbara kaiki banhbia, bara witin dîa dîa bri ba sut mihta dakbia bara kwala luha swibia; ai wîna tara ba pibia, bara witin ba pauta ni angki sauhki tikbia.

¹⁷ Gâd mita witin nani kupia ra mangkan witin kupia lâka daukaia, baha nani wal ai lukanka kumi daukan bamna, bara daiwan saura ba ra king nani karnika yan ba mita, Gâd bîla nani aisan ba aimakbia ba kat.

¹⁸ Mairin kaikram ba lika baha tawanka tara ba sika, naha tasba kingka nani purara karnika alki taibi bri ba.”