Param Marikanka 16 - DAWAN BÎLA AISKA

Gâd klalka kapka nani ba

¹ Bara yang bîla baikra tara kum, Dawan wal aisaia watla ba wina insal 7 ba aisi kan walri: “Man nani wih Gâd klalka saura tara kapka 7 ba tasba purara laiks.”

² Insal pas kata mahka wih, ai kapka ba tasba purara laikan. Bara ani uplika daiwan saura markka bri ba, ai lilka ra sin ai pura suni mayuni kan ba sut ra, wîna sukwan saura bara latwan pali sin yaban.

³ Insal wala ba kâp ba kabu purara laikan. Bara kabu laya ba tala takan upla pruan tâlia baku, bara dîa dîa kabu ra ai rayaka bri kan ba sut pruan.

⁴ Insal yumhpa ba kâp ba awala nani purara bara lî kârma nani purara sin laikan, bara baha nani sut ba tala takan.

⁵ Bara lî nani insalka ba naku aisan walri: “Dawan Gâd holikira, man ban sma ba, bara ban katma ba, man lika kasak pali sma naku lâ daukram bamna.

⁶ Kan witin nani sika Gâd uplika nani tâlia, bara prapit nani tâlia sin laikan, bara nanara man ba witin nani ra tala yabram diaia. Witin nani dîa briaia aitani kan ba nanara brisa.”

⁷ Altar ba wina sin bîla baikra kum aisi kan walri: “Âu, Dawan Gâd, karnika sut brisma ba, man ba kasak lâka kat bara wapni lâka kat lâ daukram sa.”

⁸ Insal walhwalka ba kâp ba yu lapta purara laikan, bara yu lapta ra karnika yan upla nani ra ai laptika ni angkaia.

⁹ Sut ba saura pali angkan kan, bara witin nani ba Gâd nina ra diara saura nani aisan, witinka naha pâtka tara nani purara karnika bri ba; sakuna witin nani ai kupia lakras, witin ra sin mayunras.

¹⁰ Insal matsip ba ai kapka ba, daiwan saura king iwaika ba ra laikan, bara king aimaki tasbaya ba tihmu takan. Upla nani ba latwan mita ai twisa nani sami kan;

¹¹ bara witin nani kasbrika pura Gâdka mapara diara saura nani aisan, ai latwanka nani bara ai wîna sukwanka tâka ba mita. Sakuna witin nani saura dauki banhwi kan ba swi si ai kupia lakras kan.

¹² Insal 6 ba ai kapka ba Éufrates awalka tara purara laikan. Awalka laya ba lâwan, king nani lalma wina aula ba yabalka kum klauhbaia dukiara.

¹³ Bara yang kaikri dragun, daiwan dahra aisasara kuninkira nani ba bîla wina, pirit saura yumhpa pikpik baku taki kan.

¹⁴ Naha nani sika dibil nani piritka sain tara nani dauki kan ba. Piritka yumhpa ba mita tasba aiska kingka nani asla daukaia taki auya kan, Gâd witinka karnika sut bri ba yua tara warkka ba dukiara.

¹⁵ “Man nani kaiks, yang na bîli kaikras kan aulni, âimplikra baku. Yamni pali sa, ya aihwaki bara ai kwalka sin ban bri ba, witin ba kwala âpu takbiara sîa, bara upla sut mawanra sin ai swira takbiara sîa.”

¹⁶ Bara piritka nani ba king nani sut plis kumi ra asla daukan, bara pliska ba Hibru bîla ra Armagedan mâkisa.

¹⁷ Insal 7 ba ai kapka pâsa ra laikan, bara Dawan wal aisaia watla ra king iwaika ba wina bîla baikra tara kum takan, bara naku wisata: “¡Pat daukan sa!”

¹⁸ Bara imyula nani, bin nani, alwani nani, tasba nikbanka tara kum sin takan. Baha tasba nikbanka karna ba sât upla nani paskan ba wina kau âpu kan; naha sika sut purkara kau saura kan ba.

¹⁹ Tawan tara ba baikanka yumhpa ra kriwan, bara tasba aiska tawanka nani ba sut kauhan. Babilon tawanka tara ba dukiara Gâd ai kupia kraukan, ai kupia baiwanka tara wainka laya blikan ba yaka lanhkaia dukiara.

²⁰ Bara kî dakura nani ba sut, lî nani ba sin lap tiwan.

²¹ Walpa tara nani sin kasbrika pura ba wina upla nani purara bal kauhan, bara walpaya bani ba 100 paun prais bri kata. Bara upla nani Gâd mapara diara saura nani aisan, walpa tara bal kauhan ba dukiara, baha ba pât saura kan bamna.