Param Marikanka 15 - DAWAN BÎLA AISKA

Insal nani 7 pât saura 7 bri kan ba

¹ Kasbrika purara sain tara aihkakira pali wala kaikri: insal 7 pât tara 7 lâs nani ba bri kan kaikri. Baha pâtka tara nani ba wal, Gâd kupia baiwanka ba tnata alki kan.

² Glas kabuka baku kum sin kaikri, pauta klauhan abalki daukan; bara witinka nani daiwan saura ba wina, ai lilka wina bara ai nina numbika ra sin sip muni pura luan nani ba, baha glas kabuka lamara kan, Gâd arp nani yaban kan ba brih.

³ Baha witin nani Gâd dukia dadaukra, Moses lawana aiwani nani kan, Sîp Luhpia lawana ba sin. Bara baha lika naku kata: “Dawan Gâd, karnika sut brisma ba, diara aihkakira daukram ba sut tara bara painkira pali sa. Nisan nani Kingka, yabalkam nani ba wapni bara kasakkira pali baman sa.

⁴ Dawan, ¿ya man ra sîam briras kabia? ¿Ya sin man ra mamyunras kabia? Kan man baman sika holikira, bara nisan nani sut bal man ra ai pura suni mamyunbia, daukankam kasak nani ba upla sut mita kaikan bamna.”

⁵ Naha ningkara kasbrika pura ba kwawan ba ra, Dawan wal aisaia watla ba kaikri, lâ bîla nani suni bri kan tintka ba sin.

⁶ Dawan wal aisaia watla ba wina baha insalka 7 pât tara 7 bri kan nani ba bal takan. Witin nani ba linin kwalka klin bara ingnikira ni dimi kan, bara gul maisa wila nani ni sin ai lama dusa kir wilkan kan.

⁷ Bara diara rayakira walhwal ba wina kumi mita insal 7 ba ra gul kapka 7 yan, Gâd kupia baiwanka ni banhki, witinka ban kaia ban kaia ra raya ban ba.

⁸ Bara Dawan wal aisaia watla ba kiasma pali baman banhwan, Gâd tara pali ba karnika ba mita, bara upla kumi sin sip tempel ra dimras kan, pât tara 7 insal 7 bri kan ba sut tnata alkbia ba kat.