Param Marikanka 14 - DAWAN BÎLA AISKA

Upla 144,000 lawana aiwanan ba

¹ Baha ningkara yang kaikri, bara Sîp Luhpia ba Saion ilka ra bûi kan. Witinka wal upla 144,000 bâra kan, bara baha nani ai lal purara Sîp Luhpia nina ba bara ai Aisika nina ba sin ulbi bri kata.

² Bara kasbrika pura ba wina bin kum taki kan walri, baha ba lî aubra binka baku, bara alwani karna binka ba baku kan; arp kakangbra ailal ai arpka nani kangbi ba binka baku kan.

³ Bara witin nani lawana raya kum aiwani banhwi kan, king iwaika ba mawanra, diara rayakira walhwal ba mawanra, almuk nani ba mawanra sin. Upla kumi sin baha lawana ba sip lan takras kan, baha nani 144,000 tasba uplika nani tila swaki sakan ba baman lika.

⁴ Naha nani sika mairin nani wal tâski taki banhras kan ba, bamna witin nani sunu ban sa. Witin nani na Sîp Luhpia ba nina blikisa ani anira wabia ba; witin nani na upla nani tila wina swaki sakan sa, bara naha nani sika pas upla nani Gâd dukia bara Sîp Luhpia ba dukia sin.

⁵ Ai bîla nani ra kunin kumi sin sakras kan; witin nani na pât âpu sa, Gâd king iwaika mawanra.

Insal yumhpa smalkanka ba

⁶ Bara yang insal wala kum kasbrika pura ba lilapas kat pâli tauki kan kaikri. Naha lika ban kaia ra smalkanka kum bri kan, tasba ra iwi uplika nani ra smalkaia, nisan sât bani ra, taika bani ra, bîla sât bani ra, upla nani sut ra sin.

⁷ Bara witin ai bîla baikra tara ni aisi kan: “Man nani bui Gâd ra sibrin luks bara mayunra sin yas, witin ba lâ daukaia awarka ba pat aimakan sa bamna. Gâd ra puram suni mayuni bas, witinka ba kasbrika purara, tasba, kabu, bara lî kârma nani sin paskan ba.”

⁸ Insal wala kumi baha nina blikan, bara naku wisata: “¡Pat kauhan! ¡Babilon tara ba pat kauhan sa, witin ai tâskika lâka wainka laya ni upla nani sut ra dakaki bla ikan bamna!”

⁹ Insal yumhpika ba tâura wâl wata ba nina blikan, bara ai bîla baikra karna aisi kan: “Upla kum baha daiwan saura ba lilka ra ai pura sunisa kaka, bara markka ba sin ai lal purara ai mihta ra swika mangkbia kaka,

¹⁰ Gâd kupia baiwanka wainka ba diaia kabia, baha ba uya karna pali ai lawanka ba ra witin laikan sa. Ani uplika naha daukbia ba, pauta klauhan ni bara sulpa ni sin rausauhkan kabia Gâd insalka nani mawanra, Sîp Luhpia ba mawanra sin.

¹¹ Witin nani ra rausauhki kiasmika ba ban kaia ban kaia ra uli wisa. Bara baha nani daiwan saura ba bara ai lilka ra ai pura suni mayuni ba, ai nina markka ba sin bri ba, kakna bara tihmia bribia apia.”

¹² ¡Nâra sika Gâd uplika nani, ai kupia alki bri ba kaikbia, baha nani Gâd lâka nani wali dauki ba, bara Jisas ra sin ban kasak luki nani ba!

¹³ Bara bîla baikra kum kasbrika pura ba wina yang ra ai aisi kan walri: “Naha na uls: ‘Nanara wina pruan nani ba yamni pali sa, witinka nani Dawan ra lalukra nani taki si prubia ba.’ ” “Âu —Spirit ba baku wisa—, kan witin nani ai warkka karna nani wina ris brin sa, bara ai warkka nani mita ai yula kahbi kabia.”

Tasba ra mâ dâkaia piua

¹⁴ Bara yang kaikri, bamna kasbrika pihni kum bâra kan; bara kasbrika ba purara upla baku kum iwi kan. Witin ai lal purara gul kraunka kum bri kan, bara ai mihta ra lika ispara mala pali kum bri kan.

¹⁵ Bara tempel ba wina insal wala kum takan, bara ai bîla baikra tara ni kasbrika purara iwi kata ba ra wini kan: “Ispara ba ni mâ ba klaks; kan piua ba balan sa, bara insla mâ tasba ra ba pat pihwan sa.”

¹⁶ Bamna kasbrika purara iwi kan ba ai isparka ba tasba ra lulkan, bara tasba ra mâ nani ba dâkan.

¹⁷ Bara kasbrika purara tempel watla kum bâra ba wina, insal wala kum takan, bamna witin sin ispara mala bali kum bri kan.

¹⁸ Bara altar ba wina insal wala kum bal takan, bara witin lika pauta klauhan purkara karnika bri kan. Witin ispara mala pali bri kan bara ai bîla baikra tara ni wini, naku win: “¡Isparkam mala pali daukan ba ni wain kiwka mâ wihta nani tasba ra ba klaks, baha nani ba pawan sa bamna!”

¹⁹ Bara insal ba ai isparka mala pali ba tasba purara lulkan, bamna tasba wainka mâ nani ba wahbi, wain taibaia watlika tara kum ra auhban; baha sika Gâd kupia baiwanka tara ba.

²⁰ Wain mâ nani ba tawan lata tani ra taibi sakan kan, bara wain laikaika untika ba wina tala taki, aras nani un mangkan ba kat uli kan, mail handat wâl prais.