Param Marikanka 10 - DAWAN BÎLA AISKA

Insal wauhkataya blakan bri kan ba

¹ Bara insal karnakira wala kum, kasbrika pura ba wina bal iwuya kan kaikri. Witin ba kasbrika kum ni dingkan kan, bara ai lal purara kumadura kum bri kan; ai mawan ba wan yu lapta baku ingwi kan, bara ai kuhma nani ba lika pauta lakni playa nani baku kan.

² Ai mihta ra wauhkataya sirpi blakan kum ilingki bri kan; bara ai mina aihkika ba kabu purara mangkan, bara ai mina smihka ba lika sauhka purara bri kan.

³ Bara ai bîla baikra tara ni winan, sim layan kum ihbi ba baku. Witin winan ba ra, alwani 7 ba ai bîla baikra nani saki winan.

⁴ Alwani 7 ba aisi kan ningkara, yang mahka ulbaia kapri; sakuna kasbrika purara ba wina bîla baikra kum ai aisan walri: “Alwani 7 diara nani aisan ba, pain yukuki bris; baha nani ba ulpara.”

⁵ Baha ningkara, insal kabu purara bara sauhka ra bûi kan nani ba kaikri, ai mihta aihkika kasbrika pura tani ra bukan,

⁶ bara Gâd nina mâki swer taki, witinka ban kaia ra raya iwi ba, bara kasbrika purara, tasba, kabu bara diara nani sut bahara banhwi ba paskan ba, bahara naku wisata: “Kau piua âpu kabia.

⁷ Sakuna insal 7 ba ai trumpitka mahka puhbaia piua balbia ba ra, Gâd dahra yukukan ba aimakan kabia, witin pali ba ai dukia dadaukra nani prapit nani ra win ba baku.”

⁸ Baha bîla baikra kasbrika pura wina aisi kan walri, yang ra kli aisin bara ai win: “Was, baha insalka kabu purara bara sauhka ra bûi ba mihta ra baha wauhkataya lupia ulbi karbi swin kan ba ilingki bri ba bris.”

⁹ Yang insalka ra wari, bara wauhtaya lupia ba aikbia wîri. Bara witin mita ai win: “Brih bara pis. Bîlam ra nasma baku damni kabia, sakuna biamra bilara lika tahpla takbia.”

¹⁰ Bara wauhtaika lupia ba insal ba mihta wina brih piri; baha ba bîli ra nasma baku damni kan, sakuna piri ningkara, biaira bilara tahpla takan.

¹¹ Bara yang ra ai win kan: “Man kli Gâd prapitka kaia sma upla ailal dukiara, nisan nani, bîla sât ailal, bara king nani dukiara sin.”