Param Marikanka 1 - DAWAN BÎLA AISKA

Lakula bîla

¹ Naha sika Gâd mita Jisas Kraist ra diara nani param marikan ba, witin mita laki ai dukia dadaukra nani ra diara nani pat pali takaia ba marikbia wisi. Jisas Kraist mita ai insalka bliki baha tânka ba ai warkka dadaukra Jan ra latan marikan.

² Diara nani Gâd bîla aisaia dukiara, Jisas Kraist mita marikan witin kaikan ba sut witniska ba kasak aisin.

³ Lilia kaia sa, ya naha wauhkataya aisi kaiki na, bara lilia sin kaia sa, naha sturka Gâd mita blikan bara nahara ulban na ra pain wali, bîla kat dauki nani ba, kan piua ba pat baila sa bamna.

Jan mita serts 7 ba ra ulbisa

⁴ Yang Jan, Asia tasbaya ra serts 7 ba ra ulbisna. Gâd wina yamnika nani bara kupia kumi lâka ba man nani bris, witinka bâra ban ba, ban kan ba, bara naika balaia ba; spirit 7 ai king iwaika mawan kat ba wina sin,

⁵ bara Jisas Kraist witnis kasakkira ba wina sin, witin sika pas upla pruan wina kli buan ba, bara naha tasba aiska kingka nani sut purara karnika bri ba. Kraist mita latwan wan kaikisa, bara ai tâlia laiki wan saurka nani sikbi sakan sa;

⁶ bara yawan na king tasbaya kum bara prîs nani sin wan daukan sa, ai Aisika Gâd warkka daukbia. ¡Bamna prana ba bara karnika ba sin, ban kaia ra witin dukia kabia! Baku kabia.

⁷ ¡Kraist ba kasbrika nani tilara balbia! Upla sut mita witin ba kaikbia, ai wîna tara dus prihni ra saban uplika nani sin. Tasba aiska uplika nani witin kaiki sari bri inbia. Âu, baku kabia.

⁸ “Yang sika tâ bara tnata lâs ba sin,”, Dawan karnika sut bri ba baku wisa, witinka bâra ban ba, kan wina sin ban kan ba, bara balaia ba sin.

Kraist pranakira tânka latan marikan ba

⁹ Yang Jan, man nani muihkam sna, bara man nani wal aikuki asla sna pât wahwan nani mapa ra, Gâd King aimaki ba lâka ra, bara ban bapi buaia lâka Jisas Kraist mita wanki ba ra sin. Kî dakura kum nina Patmos wi ba ra lulki ai swin kan, Gâd sturka yamni aisi smalkri ba tâwan, bara Jisas Kraist witniska aisari ba tâwan sin.

¹⁰ Bara Dawan yua kumi ra, Spirit Holikira mita ai karnika munhtara ai brisata, bara nini tani ra bîla baikra tara kum walri, sim trumpit binka baku,

¹¹ bara yang ra ai win: “Dîa dîa kaikma ba sut wauhtaya kum ra uls, bara 7 serts Asia ra ba ra blîks, baha ba naha nani sa: Epesus, Esmirna, Pergamum, Tiatira, Sardes, Filadelfia, bara Leodisia.”

¹² Bara ninira ai warbi tawi kaikri, bîla baikra aisi ba ya aisi kan sapa kaikaia wisi; bamna baku daukri ba ra, kiandil mina gul ni paskan 7 kaikri.

¹³ Baha kiandil bapaika nani 7 ba lilapas diara kum kum kaikri; mawan ba upla mawan talia kan, witin kwala kum dimi kan ba yari ai mina kat kan, bara gul ni ai maisa wila kum bri ban ba ai lama dusa kat kan.

¹⁴ Ai tâwa nani ba pihni kan, sim sîp tâwa pihni ba baku, bara sno pinhka baku, bara ai nakra nani ba lika pauta lakni klauhi ba baku kan.

¹⁵ Ai mina nani ba ingwi kan bras slilki lipni pali daukan ba baku; bara ai bîla baikra ba lika karna kan, sim lî aubra binka baku.

¹⁶ Ai mihta aihkika ra slilma 7 bri kan, bara ai bîla ba sord napa wâl mala ba baku kan. Ai mawan ba lika ingni kan sim wan yu lapta ai karnika aiska ni ingwi ba baku.

¹⁷ Yang bui witin ba kaikri ba ra, ai mina kat pruan baku kauhri. Sakuna witin mita ai mihta aihkika ba purira kahbi, ai win: “Si bripara; yang sika tâ bara lâs.

¹⁸ Yang sika raya sna. Âu, yang pruri kata, sakuna nanara lika ban kaia ra raya sna. Prura king aimaki tasbaya kîka ba brisna.

¹⁹ Bamna, dîa kaikram ba sut uls, dîa dîa nanara bâra ba bara naika ra takaia ba sin.

²⁰ Bara naha sika slilma 7 mihti aihkika ra kaikram ba bara kiandil mina sin 7 gul ni paskan kaikram dahra yukukan ba: slilma 7 ba lika serts 7 ba insalka nani sa, bara kiandil mina 7 ba lika sertska 7 ba.