Oseas 8 - DAWAN BÎLA AISKA

Israel aidul ra ai purara sunan ba tâwan, pât ra lakan

¹ “Trumpitkam ba puhs, aihwawakra aihwaki kaiki ba baku Dawan uplika nani ba walbia. Kan witin nani wal lâika daukri lâka ba krikan, bara yang smalkanki nani ba mapara buan.

² Witin nani kau ban karna yang ra aula bara aisisa: ‘¡Yang nani mai kakaira sna, man ba Israel Gâdka baku!’

³ Sakuna Israel diara yamni ba lulki swin, baha mita ai waihla nani ai nina blîkbia.

⁴ “Witin nani ba yang ra walras, ai kupia lâka kat ai kingka nani ba mangkan; witin nani wihta nani sin mangkan, sakuna yang ra ai wiras. Witin nani gul, silbar nani sin aidul nani paskaia brin, ai paskanka nani ba wal, kli slingwi tiwaia.

^5-6 ¡Sameria, baha bîpka lilka lupia ra, yang misbara kaikisna ba ra, man puram sunisma! Bîpka ba mapara kupi baiwanka ba lapta pali takan sa. ¿Baha tâskika ba wina, Israel luhpia nani ba ahkia kat klin takbia ki? ¡Baha Sameria bîpka lilka lupia ba, Gâd apia! Baha lika diara papaskra kum mita paskan, bara yu kum yuya man krikan kabia.

⁷ Witin nani pâsa baman mangkan bara pâsa saura karna krawi ba baman dâkbia; plawar mangkan ba dusa wina plawar sin sâkbia apia, ban kra witin nani baha sâkbia kaka sin, witin wal kakaira apia nani baha pibia.

⁸ ¡Israel ba nisan wala mita aiska langkan! Baha nani mita witin nani ra diara kum bahki kulkisa,

⁹ Asiria ra hilpka briaia wan, biriku wail kum kupia karna ba baku. ¡Efraín lika prisant nani yan, ai latwankira nani atki briaia!

¹⁰ Sakuna nisan nani tilara, prisant nani yaban kabia sin, nanara yang auna munrika swih plapaia bara piua kum witin nani ra yabamna, king nani bara wihta nani âpu kaia ba.

¹¹ “Kan Efraín altar ailal pali paskisa, baha nani lika saura daukaia dukiara baman paskisa.

¹² Yang lika witin dukiara smalkanki nani ailal ulbri, ban sakuna baha nani ba, witin kaikras dukia baku kulkan.

¹³ Witin nani sika sakripais nani ba lihkisa, bara sakripais daukisa, bara wîna nani sakripais dauki ba wina pîsa; sakuna yang, Dawan, witin nani wal âiyapah apia sna: watawika lâka nani daukan ba luki ban kamna. Witin nani ba klala yabamna bara kli Idsip ra tawi waia daukamni.

¹⁴ Israel utla tara nani mâkisa, sakuna ai Papaskra ba ai âuya tikisa. Juda tawan tara karnakira nani ailal paskisa, sakuna baha nani yang pauta klauhan kumi ra angkamna, watla tara nani ba sut ambia.”